पर्सा निकुञ्जमा ३ वटा गैंडा- मधेस - कान्तिपुर समाचार
कान्तिपुर वेबसाईट
AdvertisementAdvertisement

पर्सा निकुञ्जमा ३ वटा गैंडा

कान्तिपुर संवाददाता

पर्सा — पर्सा राष्ट्रिय निकुञ्जमा ३ वटा गैंडा स्थायी रूपले बसोबास गरिरहेको पाइएको छ । निकुञ्जमा यस वर्ष गरिएको गैंडा गणनाको हालै आएको नतिजाले निकुञ्जमा ३ वटा गैंडा रहेको देखाएको हो ।

निकुञ्जका प्रमुख संरक्षण अधिकृत मनोजकुमार साहकाअनुसार निकुञ्जको मकवानपुरस्थित रमौली प्रतापपुर पोस्ट क्षेत्रमा ३ वटा गैंडा देखिएको छ । उनले निकुञ्जमा ८ वटासम्म गैंडा रहेको अनुमान रहे पनि गणनामा ३ वटा मात्र फेला परेको बताए । ‘निकुञ्जकर्मीको पटकपटकको स्थलगत भ्रमणबाट निकुञ्जमा ८ वटासम्म गैंडा रहेको हाम्रो अनुमान छ,’ उनले भने,‘तर गणनाको समयमा ३ वटा मात्र फेला परेको हुनसक्छ ।’

जनवरी ४ बाट १ महिनासम्म पर्सालगायत, चितवन, बर्दिया र शुक्लाफाँटा निकुन्जमा गैडा गणना गरिएको थियो । त्यतिबेला पर्सा र चितवन निकुञ्जलाई एउटै ब्लक बनाएर गैडा गणना गरिएको थियो । गणनामा करिब तीनसय जनशक्ति एकैसाथ खटिएको थियो । जसमा ५ दर्जन हात्तीका तालिम प्राप्त माहुतदेखि दक्ष गणक पनि थिए ।

गणनामा राष्ट्रिय वन्यजन्तु तथा संरक्षण विभागको ८० प्रतिशत र बाँकी अन्य साझेदारको लगानी थियो । प्रत्येक ५ बर्षमा गरिने राष्ट्रिय गैंडा गणना २ बर्षअघि कोभिड १९ महामारीको कारण हुन सकेको थिएन । यसअघि सन् २०१५ मा यो गणना गरिएको थियो । त्यतिबेला पनि पर्सा निकुञ्जमा ३ वटा गैंडा फेला परेको थियो । निकुञ्जको रमौली प्रतापपुर क्षेत्रमा गैंडा स्थायीरुपले बस्दै आएका छन् । त्यहाँ घाँसे मैदान र पानीको पर्याप्तता रहेकाले गैंडाले बासस्थानको रुपमा रुचाउने गरेका छन् ।

निकुञ्जकै रामभौरीभाठा क्षेत्रमा पनि बेलाबेलामा गैंडा आएर बस्ने गरेका छन् । जंगली हात्तीको रैथाने बासस्थानको चिनिएको पर्सा निकुञ्जमा दशक अघिसम्म पनि गैंडा थिएनन् । पछि रामभौरीभाठा र प्रतापपुरबाट मानवबस्ती स्थानान्तरण गरिएपछि त्यहा घाँसे मैदान विकास भई चितवन राष्ट्रिय निकुन्जबाट गैंडा आएर बस्न थालेका हुन् ।

प्रकाशित : चैत्र २१, २०७८ ११:३३
प्रतिक्रिया
पठाउनुहोस्

सिन्धुलीको ग्वाङखोलामा बन्दै गरेको पुल भत्कियो

राजकुमार कार्की

सिन्धुली — बेमौसमी वर्षापछि सदरमुकाम सिन्धुलीमाडीको ग्वाङखोलामा आइतबार राति आएको बाढीले निर्माणको अन्तिम चरणमा रहेको पक्की पुल भत्काएको छ । कमलामाई नगरपालिका वडा नं ६ को माढीबजार पुछार र वडा नं ५ को कारागार क्षेत्र जोड्ने ३० मिटर लामो पक्की पुल ग्वाङखोलाको बाढीले भत्काएको हो ।

ढलानको तयारीमा रहेको पुलका सबै संरचना भत्काएको निर्माण कम्पनी जनाएको छ । खोलामा पानी निकासका लागि राखिएको सानो ह्यूम पाइप पर्याप्त नहुँदा बाढीले पुलका संरचना भत्काएको हो ।

पुल भत्कँदा करिब तीन करोडको क्षति भएको आंकलन निर्माण कम्पनी देवीरमण जेभीका प्राविधिकले गरेका छन् । 'आइतबार दिनभर मौसम सामान्य नै थियो,' जेभीका प्रोजेक्ट म्यानेजर कुमार रिजालले भने, ‘वर्षा लागकै थिएन, चैत्र महिनामा नै यति ठूलो बाढी आउला भनेर आकलन नगर्दा ठूलो क्षति भयो ।’

तीन दिनपछि पुल ढलानका लागि सबै तयारी पूरा हुन लागेको रिजालले बताए । वाग्मती प्रदेश सरकार भौतिक पूर्वाधार मन्त्रालयको लगानीमा दुई वर्षअघि निर्माण सुरु भएको पुलको लागत पाँच करोड ४१ लाख रहेको छ ।

योसँगै केही महिनापछि नै पुलबाट वारपार गर्ने कारागार क्षेत्रका बासिन्दाको सपना धकेलिएको छ । खोलाको निकासका लागि पर्याप्त ठाउँ नराख्दा ठूलो क्षति भएको स्थानीयले जनाएका छन् ।

'खोलाको निकास सानो भयो, बाढी ठूलो आयो । त्यै भएर पुल भत्कियो,' स्थानीय रामप्रसाद देवकोटाले भने, ‘खोला थुनेर काम गर्दा यो क्षति भयो । अबचैं पुल बन्ला र खोला बाढीमा हेलिनु नपर्ला भनेको फेरि अब कति वर्षलाई धकेलिने हो ?’

पुलले ह्यूम पाइप राखेर निकास नहुँदा स्थानीयको घरमासमेत बाढी पसेको थियो ।

प्रकाशित : चैत्र २१, २०७८ ११:३१
पूरा पढ्नुहोस्
प्रतिक्रिया
पठाउनुहोस्
x
×