झा भए ‘महामूर्ख’- मधेस - कान्तिपुर समाचार
कान्तिपुर वेबसाईट
AdvertisementAdvertisement

झा भए ‘महामूर्ख’

श्यामसुन्दर शशि

जनकपुर — मधेस प्रदेश सरकारको नीति तथा योजना आयोगका उपाध्यक्ष भोगेन्द्र झा महामूर्ख घोषित भएका छन् । मिथिला नाट्यकला परिषद् (मिनाप) ले आयोजना गरेको होरी महोत्सवको दोस्रो दिन शुक्रबार जानकी मन्दिर प्रांगणमा आयोजित रंगारंग कार्यक्रमबीच झा महामूर्ख घोषित भएका हुन् ।

मनापले जनकपुरमा आयोजना गरेको होरी महोत्सवमा शुक्रबार भोगेन्द्र झालाई महामूर्ख घोषणा गरिँदै। तस्बिर : श्यामसुन्दर/कान्तिपुर

मिनाप अध्यक्ष परमेश झा, मधेस प्रदेशका भौतिक पूर्वाधार विकासमन्त्री रामसरोज यादव, उद्योग पर्यटन तथा वनमन्त्री शत्रुघ्न महतोले उनलाई तरकारीको कलात्मक माला, प्रशस्तीपत्र, कलात्मक टोपी र दोसल्ला ओढाएर सम्मानित गरेका थिए ।

कार्यक्रममा प्रदेश सांसद मञ्जु यादवलाई अदलबदली, जनकपुरधाम उपमहानगर पालिकाका प्रमुख प्रशासकीय अधिकृत प्रद्युम्न उपाध्यायलाई वैशाखनन्दन, व्यवसायी प्रमोद चौधरीलाई बोतलानन्द, मिथिला चित्रकलाकी कलाकार मिथिलेश्वरी कर्णलाई लालबुझक्कडी, लोकगायक तथा बादक रामरेखा पण्डितलाई बज्रकीट, बेलापट्टी गिद्धा माविका प्रधानाध्यापक पवन मण्डललाई डपोरशंख, पर्यावरण अभियानी देवनारायण मण्डललाई हराशंख उपाधि प्रदान गरियो ।

नेपाल पत्रकार महासंघ धनुषा अध्यक्ष मोनिका झालाई दिलतोडिया, अधिवक्ता सुदीप कोइरालालाई गोबर गणेश, मिथिला चित्रकलालाई देश–विदेशमा प्रचारप्रसार गर्ने मनीषा साहलाई गन्ही, समाजसेवी प्रकाशजंग राणालाई तरघुसका, काव्या अस्पतालका सञ्चालक डा. एसके सिंहलाई कफनचोर तथा युवा अभियानी राकेशविक्रम साहलाई टिटहीको उपाधि प्रदान गरी सम्मान गरिएको थियो ।

महामूर्ख घोषणा भएपछि झाले यो उपाधि जीवनको ‘अनुपम उपहार’ भएको बताए । शिक्षा मन्त्रालयद्वारा प्रदान गरिने शिक्षा पदक लिन इन्कार गरेका झाले भने, ‘सोर्सफोर्सका आधारमा कुनै पनि पुरस्कार स्वीकार गरेको छैन तर यो सम्मान मेरा लागि नेपाल रत्नभन्दा कम छैन ।’

प्रकाशित : चैत्र ५, २०७८ ०८:३७
प्रतिक्रिया
पठाउनुहोस्

उदयपुरगढीमा पुग्यो बिजुली

डिल्लीराम खतिवडा

उदयपुर — उदयपुरगढी गाउँपालिका–५ केउरेनीकी ७३ वर्षीया मनमाया सार्कीलाई गाउँमा बिजुली बल्दा औधी खुसी लागेको छ । सहरतिर जाँदा झलमल बलेको देखेकी उनलाई गाउँको अँध्यारोले छटपटी हुन्थ्यो । 


‘मेरो जीवनकालमा केउरेनीमा बिजुली बल्छ होला भन्ने सोचेको पनि थिइनँ,’ मनमायाले सुनाइन् । यतिबेला ३२ हजारभन्दा बढी पालिकावासीले बिजुली बाल्न पाएपछि खुसी छन् । उदयपुरगढी गाउँपालिका जनसंख्याका आधारमा जिल्लाकै सबैभन्दा ठूलो पालिका हो । करिब ६ हजार ५ सय घरधुरी रहेको यहाँका ९८ प्रतिशत घरमा अहिले बिजुली बलिसकेको गाउँपालिका प्रमुख मनबहादुर केप्छाकी मगरले बताए । ‘बाँकी २ प्रतिशत घरधुरीमा पनि चाँडै नै विद्युत् विस्तारको योजना छ,’ उनले भने ।

खानेपानी र विद्युत्का हिसाबले उदयपुरगढी धेरै पछाडि परेको स्थानीय तह हो । धेरै वर्षदेखिको लामो प्रयासपछि विगत ६ महिनायता यहाँ विद्युत् विस्तार गरिएको छ । करिब ८८ करोड रुपैयाँ खर्चमा पालिकाभरि नै विद्युत् विस्तार गरिएको मगरले बताए ।

२०७४ मा भएको स्थानीय तहको निर्वाचनअघिसम्म उदयपुरगढी गाउँपालिकामा बिजुली, सडक, खानेपानी, सञ्चार, स्वास्थ्य, कृषि र शिक्षा क्षेत्रमा खासै काम हुन नसकेको स्थानीयले बताए । तर पछिल्लो करिब ५ वर्षमा विकासका पूर्वाधारका क्षेत्रमा यो गाउँपालिकाले नयाँ फड्को मारेको उनीहरू बताउँछन् । ‘विकास पूर्वाधार क्रमशः पूरा गर्दै लैजाने लक्ष्य राखिएको थियो,’ प्रमुख मगरले भने, त्यसैअनुरूप पहिलो प्राथमिकता विद्युत्लाई राखेर काम गरियो ।’

सामुदायिक विद्युतीकरण कार्यक्रममार्फत उदयपुरगढी गाउँपालिकालाई उज्यालो गाउँपालिका बनाउने योजना राखिएको प्रमुख प्रशासकीय अधिकृत माधव सुवेदीले बताए । भने, ‘बिजुलीको योजना सफल भएपछि अब खानेपानीको पनि समस्या क्रमशः समाधान हुन्छ ।’

यो गाउँपालिकामा भएको विद्युत् विस्तारको कार्य अन्य पहाडी गाउँपालिकाहरूका लागि समेत उदाहरणीय बन्ने देखिन्छ । विभिन्न योजनामा अपुरो बजेट विनियोजन गर्नुभन्दा पूरा र सम्पन्न हुने योजनामा बजेट विनियोजन गरी खर्च गरे यसबाट सर्वसाधारणले बढी लाभ लिन सक्ने निश्चित छ ।

प्रकाशित : चैत्र ५, २०७८ ०८:२६
पूरा पढ्नुहोस्
प्रतिक्रिया
पठाउनुहोस्
×