‘गहुँ फुल्न थालिसक्यो, मल पाइएन’- मधेस - कान्तिपुर समाचार

‘गहुँ फुल्न थालिसक्यो, मल पाइएन’

कान्तिपुर संवाददाता

पर्सा — मल ढुवानी गर्न ल्याइएका सवारीसाधन र किसानको भीडभाडले चहलपहल हुनुपर्ने कृषि सामग्री कम्पनी प्रादेशिक कार्यालय वीरगन्ज परिसर अहिले सुनसानजस्तै छ । लामो समयदेखि यहाँ न मल नै आयात भएको छ, न किसानले चाहेजति मल लैजान नै पाएका छन् । अहिले गहुँबाली फुल्ने समय हो ।

सिँचाइपछि रासायनिक मल राख्नुपर्ने मुख्य सिजनमै यो कार्यालयमा युरिया मलको अभाव छ । डीएपी मलको मौज्दात सकिएको त झन्डै एक महिनै भइसक्यो ।

कार्यालयको गोदाममा अहिले करिब ३ सय टन मात्र युरिया मलको मौज्दात छ । त्यो पनि किसानले सहजै पाउने अवस्था छैन । कोटा प्रणालीमार्फत सहकारी संस्थामा पुग्ने मल किसानले पाउँदा परिमाण न्यून र सास्ती भनिसाध्यै हुँदैन । किसान संघ पर्साका अध्यक्ष असर्फी साह आफूहरूले गहुँ बालीका लागि आवश्यक भए जत्ति युरिया मल अझै नपाएको गुनासो गर्छन् । ‘गहुँ फुल्न थालिसक्यो, पैसा तिरेर मल किनौं भन्दा पनि पाइएन,’ उनले भने, ‘यसरी मलकै अभाव भइरहने हो भने अन्नको उत्पादन नै घट्छ । त्यसले हामीलाई मात्र होइन देशलाई नै घाटा हुने हो ।’

कार्यालयका निमित्त प्रमुख योगेन्द्रप्रसाद पराजुलीले कार्यालयमा मलको मौज्दात नै कम भएकाले पर्याप्त मात्रामा किसानसम्म नपुगेको बताए । ‘युरिया मल अत्यधिक माग भए पनि कार्यालय मातहतका अन्य जिल्लाहरूमा थोरै मात्रामा मात्रै पठाइरहेका छौं,’ उनले भने, ‘पर्सामा कोटा प्रणालीबाट सहकारीहरूमार्फत किसानलाई मल उपलब्ध भइरहेको छ ।’ गहुँ बालीका लागि अब केही दिनपछि युरिया मलको आवश्यकता नपर्ने र हाल उपलब्ध परिमाणबाटै गर्जो टार्नुपर्ने अवस्था रहेको उनको भनाइ छ ।

तत्कालै युरिया मल आयात हुने कम्पनीको कुनै कार्यतालिकासमेत नरहेको उनले स्पष्ट पारे । ‘जीटुजी माध्यमबाट सरकारले भारतसँग सोझै मल खरिद गर्ने कुरो चलिरहेको सुनेको हुँ,’ उनले भने, ‘योभन्दा बढी जानकारी मलाई पनि छैन ।’

प्रकाशित : माघ २१, २०७८ १०:२०
प्रतिक्रिया
पठाउनुहोस्

प्रशासनमा कारागारका कर्मचारी झिकाएर सेवा

नागरिकता बनाउन एक महिनासम्म पालो पर्खिनुपर्ने भएपछि कारगारका ७ कर्मचारी झिकाएर सेवा चुस्त बनाउने प्रयास
ओमप्रकाश ठाकुर

सर्लाही — कर्मचारी अभावका कारण नागरिकता पाउन सेवाग्रहीले एक महिना लामो पालो कुर्नुपर्ने भएपछि जिल्ला प्रशासन कार्यालय, मलंगवाले अन्य कार्यालयबाट कर्मचारी थपेर सेवा दिन थालेको छ । प्रशासनमा सेवाग्रहीको चाप नघटेपछि कामविहीन अवस्थामा रहेका जिल्ला कारागारका ७ कर्मचारीलाई झिकाएर प्रशासनको सेवा चुस्त बनाइएको हो ।

अहिले आवेदन दिएकै दिनमा नागरिकता पाउन सकिने भएको सेवाग्राहीको भनाइ छ । तर कार्यालयमा भीड भने अझै उस्तै छ ।

दरबन्दीअनुसारका कर्मचारी नहुँदा सेवाग्रहीले सास्ती खेप्न बाध्य भएका हुन् । कार्यालयमा नागरिकता, राहदानीलगायत बनाउन पुगेका सेवाग्रहीले आवेदन दिन नै ४ दिनसम्म लाइन बस्नुपरेको र बनिसकेर कागजात हातमा पर्दा एक महिनासम्म लागेको गुनासो सुनिएको थियो । कर्मचारी थपिएपछि आवेदन दिएकै दिनमा नागरिकताको प्रतिलिपि पाएको कविलासी नगरपालिका–१ पिपरियाकी ६८ वर्षीया बैदेही देवीले बताइन् ।

‘पहिला लामो समयसम्म लाइन बस्नुपर्ने सुनेपछि प्रतिलिपि बनाउन आएकी थिइनँ, अब एक दिनमै बन्ने भएपछि आएकी हुँ,’ उनले भनिन्, ‘पहिला सुनेको जस्तो अहिले सास्ती खेप्नुपरेको छैन ।’ प्रशासन कार्यालयका अनुसार ३ अधिकृतको दरबन्दी रहे पनि लामो समयदेखि २ जना मात्रै कार्यरत छन् । नायव सुब्बाको १० दरबन्दी रहेकामा ३ जना र खरिदारको ५ दरबन्दी हुनुपर्नेमा ३ जना मात्रै खटिएका छन् । कार्यालयमा दरबन्दीअनुसारका कर्मचारी नभएपछि सेवाग्रहीले सास्ती खेपिरहेको जानकारी विभागलाई गराएपछि एक अधिकृत पठाएको थियो । तर त्यसपछि पनि समस्या समाधान नहुने देखेर आन्तरिक रूपमा व्यवस्थापन गरी कारागारका ७ कर्मचारीलाई बोलाएर खटाइएको प्रमुख जिल्ला अधिकारी थानेश्वर गौतमले बताए । यसअघि नागरिकता लिन टोकन वितरण गर्दै आएकोमा अहिले उक्त व्यवस्था हटाइएको उनले जानकारी दिए ।

उनका अनुसार सम्भव भएसम्म एक दिनमै नागरिकता दिने व्यवस्था मिलाइएको छ । समय अभावले नभ्याइए भोलिपल्ट पहिलो सत्रमै नागरिकता दिने गरिएको छ । सेवाग्राहीलाई थप सहजताका लागि गोडैता र हरिपुर नगरपालिकाबाट समेत एक/एक जना कर्मचारी ल्याउने सम्बन्धमा छलफल गरिरहेको उनले बताए । अब २ जना कर्मचारी थपिएसँगै केही घण्टामै सेवाग्रहीले नागरिकता पाउने उनले विश्वास व्यक्त गरे । ‘नागरिकता लिन फागुनसम्मको कुपन बाँडिसकिएको थियो । भीडले सेवाग्रहीलाई सास्ती भएकोमा हामी जानकार पनि थियौं । यस्तोमा कारागारका कर्मचारी ल्याएर सेवामा सहजता थप्ने प्रयास गरेका हौं । सोहीअनुसार काम धमाधम भइरहेको पनि छ,’ उनले भने ।

विद्यालय बन्द भएकाले त्यही मौकामा उमेर पुगेका विद्यार्थीहरू नागरिकता बनाउन र नजिकिँदै गरेको निर्वाचनका लागि मतदाता परिचयपत्र बनाउन पनि नागरिकता चाहिने भएकाले प्रशासनमा सेवाग्रहीको भीड बढेको हो । जिल्लामा राष्ट्रिय परिचय पत्र बनाउन थालिएकाले पनि नागरिकता बनाउने चाप बढेको हो । यसअघि कर्मचारी अभावका कारण दिनमा सय जनाजतिले मात्र नागरिकता पाउँदै आएकोमा अहिले साढे २ सय जना जतिले नागरिकता पाइरहेका छन् ।

प्रकाशित : माघ २१, २०७८ १०:२०
पूरा पढ्नुहोस्
प्रतिक्रिया
पठाउनुहोस्
x
×