सुक्खा बन्दरगाहबाट अझै हटाइएन साल्टको बिग्रिएको डीएपी मल- मधेस - कान्तिपुर समाचार
कान्तिपुर वेबसाईट
AdvertisementAdvertisement

सुक्खा बन्दरगाहबाट अझै हटाइएन साल्टको बिग्रिएको डीएपी मल

शंकर आचार्य

पर्सा — १६ महिनाअघि सिर्सिया सुक्खा बन्दरगाहमा आइपुगेको साल्ट ट्रेडिङ कर्पोरेसनको बिग्रिएको १ हजार २ सय २५ टन डीएपी मल यहाँबाट अझै हटाइएको छैन । बिग्रिएको मल लामो समयसम्म नहटाउँदा मल राखिएको स्थान वरपरका रुख बिरुवाहरू मर्न थालेका छन् ।

सिर्सिया सुक्खा बन्दरगाहमा थन्किएको साल्ट ट्रेडिङको बिग्रिएको डीएपी मल । तस्बिर : शंकर आचार्य/कान्तिपुर

पुस २ गतेको अर्थमन्त्री स्तरीय निर्णयबाट उक्त मल कृषि तथा पशुपन्छी विकास मन्त्रालयलाई हस्तान्तरण गर्ने तय भएको थियो । अर्थले पुस ११ गते उक्त निर्णयबारे कृषिलाई औपचारिक रुपमा जानकारीसमेत गराएको बन्दरगाहस्थित भन्सार कार्यालयका सूचना अधिकृत सन्तोष न्यौपानेले बताए । त्यसपछि साल्ट ट्रेडिङ र कृषि मन्त्रालयका अधिकारीहरूको संयुक्त टोली आएर उक्त मलको निरीक्षण गरेर फर्किए पनि त्यसपछि भने केही प्रगति हुन नसकेको न्यौपाने बताउँछन् ।

‘हामी पनि जति सक्दो यो मल बन्दरगाहबाट लगियोस् भन्ने पक्षमै छौं,’ उनले भने, ‘लामो समय ठूलो परिमाणमा मल एकै ठाउमा थन्किँदा त्यसले माटोको उर्वरा शक्तिको सन्तुलन बिग्रिन्छ, हाल बन्दरगाहमा मल थुप्रिएको स्थानको वरपरका हरिया रुख तथा बुट्यानहरू पनि मर्न थालेका छन् ।’

बन्दरगाह भन्सार कार्यालयले उक्त कन्साइन्मेन्टको करिब १ हजार २ सय २५ टन डीएपी मल भिजेर उपयोगविहीन अवस्थामै आएकाले उक्त मल जफत गरेर नष्ट गर्ने निर्णय यसअघि नै गरेको थियो । तर‚ पछि अर्थ मन्त्रालयले उक्त मल कृषि मन्त्रालयलाई दिने निर्णय गर्‍यो ।

स्विस सिंगापुर ओभरसिज सप्लायर रहेको तथा जोर्डनबाट खरिद गरी ल्याइएको डीएपी मल सुरुमा भारतको कोलकाता बन्दरगाह आएको थियो । समुद्रीमार्गमै रहँदा सन् २०२० को अगस्टको दोस्रो साता बंगालको खाडीमा आएको ‘अफान’ नामक समुद्री आँधीको चपेटमा उक्त मल बोकेको पानी जहाज परेको थियो ।

पानी जहाजमै रहँदा पानी पसेर मल भिजेको थियो । भिजेको मल सप्लायरले कोलकाताबाट वीरगन्जसम्म ल्याएपछि त्यतिबेला सुक्खा बन्दरगाह भन्सार कार्यालयले जाँचपास गर्न मानेको थिएन ।

त्यतिबेला साल्टले कुल २५ हजार टन डीएपी मल आयात गरेकोमा त्यसमध्ये पछिल्लो लटको दुईवटा रेल्वे र्‍याकमा आएको २ हजार ५ सय टनमध्ये आधा अर्थात् १ हजार २ सय २५ टन डीएपी मल काम नलाग्ने थियो ।


प्रकाशित : माघ २०, २०७८ १६:१८
प्रतिक्रिया
पठाउनुहोस्

वीरगन्जमा २ दिनमा ३ संक्रमितको मृत्यु 

शंकर आचार्य

पर्सा — जिल्लामा कोरोना संक्रमण दैनिक ओरालो लागि रहँदा संक्रमितको मृत्युको दर भने बढ्दो छ । शुक्रबार र शनिबार गरी वीरगन्जमा ३ जना कोरोना संक्रमितको मृत्यु भएको छ । 

नारायणी अस्पतालमा उपचाररत २ संक्रमितको शनिबार र एकको शुक्रबार मृत्यु भएको हो । अस्पतालका कोभिड संयोजक डा. उदयनारायण सिंहका अनुसार शनिबार बिहान साढे ५ बजे वीरगन्ज प्रगतिनगर घर भएका ७५ वर्षीय पुरुषको उपचारको क्रममा मृत्यु भएको छ । उनी अस्पतालमा शुक्रबार मात्र भर्ना भएका थिए । भेन्टीलेटरमा राखेर उपचार गरिएका उनी मुटु रोगीसमेत थिए । उनले कोभिसिल्डको दुई डोज लिएका थिए ।

अन्य अस्पतालले रिफर गरेपछि उनलाई उपचारका लागि नारायणी अस्पतालमा भर्ना गरिएको थियो । त्यसैगरी, शनिबार बिहान साढे ७ बजे अस्पतालमै अर्का एक संक्रमित पुरुषको मृत्यु भएको छ । बारा कलैया उमनपा– ५ घर भएका ६५ वर्षीय ती पुरुषलाई शुक्रबार अस्पतालमा भर्ना गरिएको थियो । निमोनियाले ग्रस्त उनमा मधुमेह लगायत अन्य स्वास्थ्य समस्यासमेत थियो । उनले भेरोसेलको २ डोज लगाएका थिए ।

यस अघि शुक्रबार बिहान अस्पतालमा थप एक संक्रमितको उपचारको क्रममा मृत्यु भएको थियो । वीरगन्ज मनपा – २७ घर भएकी ६५ वर्षीया महिलाको मृत्यु भएको थियो । निमोनियाले ग्रस्त ती महिलाले पनि भेरोसेलको दुई डोज खोप लगाएकी थिइन् ।

कोरोनाको तेश्रो लहरमा शनिबार सम्ममा गरी वीरगन्जका विभिन्न अस्पतालमा ६ कोरोना संक्रमतिको मृत्यु भएको छ । ती मध्ये ४ बारा र २ पर्साका हुन् ।

मृत्युदर बढ्दो क्रममा रहेपनि नारायणी अस्पतालकै प्रयोगशालाको नतिजाले जिल्लामा कोरोना संक्रमण दर भने घट्दो क्रममा रहेको देखाई रहेको छ । अस्पतालमा शुक्रबार ५० जनाको पीसीआर परीक्षण गर्दा १८ जनामा कोरोना संक्रमण पुष्टि भएको छ । संक्रमित पुष्टि भएका मध्ये ८ मात्र पर्साका हुन् । बिहीबार ३५ जनाको स्वाब परीक्षण गर्दा ११ जनामा कोरोना संक्रमण पुष्टि भएको थियो । ती मध्ये ८ पर्साका हुन् । त्यस अघि बुधबार ४१ जनाको स्वाब परीक्षण गर्दा १८ जनामा कोरोना संक्रमण पुष्टि भएको थियो । ती मध्ये १० पर्साका हुन् ।

मंगलबार ५६ जनाको स्वाब परीक्षण गर्दा २७ जनामा र सोमबार ४२ जनाको स्वाब परीक्षण गर्दा २३ जनामा कोरोना संक्रमण पुष्टि भएको थियो । तुलनात्मक रुपमा हेर्दा बुधबार देखि संक्रमण दर ओरालो लागी रहेको डा. सिंह बताउँछन् । मंगलबार सम्म ५० प्रतिशत भन्दा माथि रहेको संक्रमण दर बुधबार यता भने २५ देखि ३० प्रतिशतको बीचमा झरेको छ ।

प्रकाशित : माघ १५, २०७८ १३:०७
पूरा पढ्नुहोस्
प्रतिक्रिया
पठाउनुहोस्
×