लागूऔषध कारोबारको आरोपमा भारतीय नागरिकसहित ४ जना पक्राउ- मधेस - कान्तिपुर समाचार
कान्तिपुर वेबसाईट
AdvertisementAdvertisement

लागूऔषध कारोबारको आरोपमा भारतीय नागरिकसहित ४ जना पक्राउ

शंकर आचार्य

पर्सा — प्रहरीले दुई फरक स्थानबाट लागूऔषध गाँजासहित ४ जनालाई पक्राउ गरेको छ । पक्राउ पर्नेमा एक भारतीय नागरिकसमेत छन् ।

बिहीबार राति साढे ८ बजे बहुदरमाई नगरपालिका–९ विश्रामपुर मौजे घर भएका ६० वर्षीय गणेश साह कलवार र उनका छोरा ३४ वर्षीय सन्तोष साह कलवार पक्राउ परेका हुन् ।

कलवारको घरबाट गँजाको बिक्री वितरण भइरहेको सूचनाको आधारमा जिल्ला प्रहरी कार्यालयबाट खटिएको टोलीले उनको घर खानतलासी गर्दा पूर्वपट्टीको कोठाको खाटमुनि सुनियोजित तरिकाले लुकाई छिपाई राखिएको ७४ किलो गाँजा फेला परेको प्रहरीले जनाएको छ ।

यस्तै बिहीबार राति ९ बजेर ४० मिनेटमा विन्दवासिनी गाउँपालिका –४ अमरपट्टीबाट झौवा जाने बाटोबाट थप २ जना गाँजासहित पक्राउ परेका छन् । प्रहरी चौकी अमरपट्टीको पैदल गस्ती टोलीले नेपालबाट भारततर्फ शंकास्पद रूपमा पैदल जाँदै गरेका पर्सा सखुवाप्रसौनी गापा–१ दोहोरी टोल बस्ने ३५ वर्षीय सुरेश दास र भारत बिहार जिल्ला मोतिहारी भेलाही थाना १ बस्ने ४२ वर्षीय दसाही दासलाई पक्राउ गरेको थियो ।

उनीहरूले बोकेको झोला जाँच गर्दा ७ किलो गाँजा फेला परेको थियो । पक्राउ परेका चारै जनालाई लागूऔषध सम्बन्धी कसुरमा अनुसन्धान अगाडि बढाइएको जिल्ला प्रहरी कार्यालयका प्रवक्ता डीएसपी ओमप्रकाश खनालले जानकारी दिए ।

प्रकाशित : माघ १४, २०७८ १५:३०
प्रतिक्रिया
पठाउनुहोस्

किसानले अझै पाएनन् राहत

कान्तिपुर संवाददाता

सल्यान — कालीमाटी गाउँपालिका–५ दम्दबालीका किसान रणबहादुर घर्तीले यो वर्ष झन्डै १० रोपनी खेतमा धान लगाएका थिए  । तर धानबाली भित्र्याउन नपाउँदै कात्तिक पहिलो भएको वर्षाले उनको धानबालीमा ठूलो क्षति पुर्‍यायो  ।

‘पोहरसाल ५० मुरी फलेको थियो,’ उनले भने,‘काटेर सुकाएको आधाजति धान भिजेर सखाप भयो ।’ बारीबाट १५ मुरी मात्र धान भित्र्याउन पाएको उनको गुनासो छ ।

वर्षाका कारण त्रिवेणी गाउँपालिका–१ का रत्नबहादुर ओलीको पनि झन्डै २० मुरी धानमा क्षति पुग्यो । ‘भित्र्याएको धान पनि न भात खान मिल्छ न बीउ राख्न नै,’ उनले भने, ‘यो वर्ष त छाक टार्नै मुस्किल भयो ।’ झन्डै ४० हजार रुपैयाँको धान क्षति भएको भन्दै जिल्ला कृषि विकास कार्यालयमा निवेदन दिएका उनले अहिलेसम्म राहत पाउन सकेका छैनन् ।

जिल्ला कृषि विकास कार्यालयका अनुसार वर्षाका कारण सल्यानका ७ हजार ८२ हेक्टरमा लगाएको धानबालीमा क्षति पुगेको थियो । क्षतिपूर्ति माग्दै झन्डै ५ हजार किसानले कार्यालयमा निवेदन पेस गरेका थिए । वर्षाले करिब २ हजार ८ सय ६ मेट्रिक टन धानमा क्षति भएको कार्यालयको तथ्यांक छ ।

वर्षाले झन्डै ४ करोड ९२ लाख रुपैयाँको धानमा क्षति पुर्‍याएको कार्यालयको अनुमान छ । तर बजेट नआएको भन्दै किसानलाई अझै राहत नदिइएको हो ।

प्रकाशित : माघ १४, २०७८ १५:२४
पूरा पढ्नुहोस्
प्रतिक्रिया
पठाउनुहोस्
×