पर्सामा ओरालो लाग्दै कोरोना संक्रमण- मधेस - कान्तिपुर समाचार
कान्तिपुर वेबसाईट
AdvertisementAdvertisement

पर्सामा ओरालो लाग्दै कोरोना संक्रमण

शंकर आचार्य

पर्सा — नारायणी अस्पतालको प्रयोगशालामा बिहीबार ३५ जनाको स्वाब परीक्षण गर्दा ११ जनामा कोरोना संक्रमण पुष्टि भयो । त्यसअघि बुधबार ४१ जनाको स्वाब परीक्षण गर्दा १८ जनामा कोरोना संक्रमण देखिएको थियो ।

त्यसभन्दा पहिले मंगलबार ५६ जनाको स्वाब परीक्षण गर्दा २७ जनामा र सोमबार ४२ जनाको स्वाब परीक्षण गर्दा २३ जनामा कोरोना संक्रमण पुष्टि भएको थियो । तुलनात्मक रुपमा सोमबार र मंगलबारभन्दा बुधबार र बिहीबारको प्रयोशालाको नतिजाले जिल्लामा कोरोना संक्रमण ओरोला लागेको संकेत गरेको छ ।

सोमबार र मंगलबारसम्म ५० प्रतिशत हाराहारी रहेको संक्रमण दर बुधबार र बिहीबारको नतिजाले ५० प्रतिशतभन्दा तल झरेको देखिन्छ । अस्पतालमा स्वाब परीक्षण गराउन आउनेहरूको संख्या पनि घट्दो क्रममा छ ।

अस्पतालका कोभिड संयोजक डा उदयनारायण सिंह पनि पछिल्लो नतिजाले जिल्लामा कोरोना संक्रमण दर दैनिक घट्दो क्रममा रहेको देखिएको बताउँछन् । ‘हाम्रो अनुमान पनि यही थियो,’ उनले भने, ‘माघ १ गतेतिर उच्च बिन्दुमा पुगेको कोरोना संक्रमण माघको दोश्रो साताको अन्त्यतिर ओरालो लाग्दै जान्छ भन्ने हाम्रो अनुमान थियो ।’

संक्रमण घट्दै गएकाले पीसीआर परीक्षण गराउन आउनेहरूको संख्या पनि घटदैगएको उनको बुझाइ छ । ‘कोरोनासँग मिल्दोजुल्दो लक्षण देखिएकाहरू अस्पतालमा स्वाब परीक्षण गराउन आउने हुन्,’ उनले भने, ‘संक्रमण घट्दै गएपछि परीक्षण गराउन आउनेहरू पनि घट्दै जानु स्वाभाविक नै हो ।’

संक्रमण दर घट्दो क्रममा रहे पनि गम्भीर संक्रमित भने थपिने क्रम बढेको डा सिंह बताउँछन् । ‘केही दिन यता संक्रमण दर घटेको छ तर गम्भीर संक्रमित बढेका छन्,’ उनले भने, ‘नारायणी अस्पतालमै हाल १२ कोरोना संक्रमित उपचाररत छन्, तीमध्ये ३ जनालाई अक्सिजन दिएर राखिएको छ भने १ जना भेन्टिलेटरमा छन् ।’ साताअघि सम्म कोरोना तेश्रो लहरमा गम्भीर संक्रमित कम थिए ।

जिल्लामा सक्रिय कोरोना संक्रमितको संख्या तीन सयमाथि पुगेको छ । जिल्ला प्रशासन कार्यालयका प्रशासकीय अधिकृत विनय कुमार श्रीवास्तवका अनुसार, बिहीबार सम्ममा जिल्लामा सक्रिय कोरोना संक्रमितको संख्या ३ सय ४५ पुगेको छ ।

सीमावर्ती जिल्ला र नेपालकै प्रमुख नाका रहेकाले पनि कोरोनाको तीन वटै लहरमा पर्सामा सबैभन्दा पहिले र बढी संक्रमण दर देखिने गरेको छ । पहिलो र दोश्रो लहरको तुलनामा तेश्रो लहरमा कोरोना संक्रमितको मृत्यु दर भने कम छ । कोरोना तेश्रो लहरमा हालसम्म नारायणी र वीरगन्जकै अन्य अस्पतालमा गरी ३ जना कोरोना संक्रमितको मृत्यु भएको छ । उनीहरू सबै छिमेकी बारा जिल्लावासी हुन् । उनीहरू सबैले कोरोना विरुद्धको खोप लगाएका थिएनन् ।

प्रकाशित : माघ १४, २०७८ १४:०९
प्रतिक्रिया
पठाउनुहोस्

छायानाथराराका ८२ बस्तीमा सडक

‘खेतबारीको उत्पादनले सहजै बजार पाएको छ, कोही बिरामी भए ढोकामै एम्बुलेन्स आइपुग्छ’
राजबहादुर शाही

मुगु — छायानाथरारा नगरपालिका–६ लिउडीका हरिबहादुर सेजुवालको आगनमै सडक सुविधा पुगेको छ । सडक सुविधा भएपछि गाउँको उत्पादनले बजार पाएको छ । दैनिक उपभोग्य सामग्री ढुवानी सहज बनेको छ ।


रोवागाउँका हस्त नेपाली पनि कतै जानुपरे घर अगाडिबाटै गाडी चढ्छन् । ‘गाउँमा सडक आएपछि सबै सुविधा आयो,’ उनले भने, ‘पिठ्युँमा बोकेर खाद्यान्न आसार्ने बाध्यताको अन्त्य भएको छ ।’

स्थानीय तह गठन भएसँगै नगरपालिकाले सडक निर्माणलाई तीव्रता दिएको थियो । नगरपालिकामा विकट मानिने चराप, झाकोट, पिना, झयारी, कार्कीबाडा, भामबाडा, रुघालगायत गाउँमा सडक पुगेपछि स्थानीयले विकासको अनुभूति गर्न थालेका छन् । नगरपालिकाभित्र पर्ने ८७ वटा गाउँमध्ये ८२ गाउँमा सडक सुविधा पुगेको नगरपालिकाले जनाएको छ । सडक पुगेपछि सदरमुकाम गमगढी र जिल्ला बाहिर आउजाउ गर्न सहज भएको रुघाका कमल मल्लले बताए । ‘खेतबारीको उत्पादनले सहजै बजार पाएको छ,’ उनले भने, ‘कोही बिरामी भए ढोकामै एम्बुलेन्स आइपुग्छ ।’

सडकले अरू विकासको पनि ढोका खोलेको नेपालीले बताए । ‘गाउँमा व्यवसाय गर्ने युवाहरूको संख्या बढ्दै गएको छ,’ उनले भने, ‘गाउँमा आर्थिक कारोबार बढिरहेको छ ।’ उनले सडक खुलेपछि दैनिक एक दर्जन गाडीहरू गाउँमा आउने गरेको बताए । उनले सडक सुविधा भएपछि सदरमुकाम गमगढीकै मूल्यमा खाद्यान्न र दैनिक उपभोग्य सामग्री पाइने बताए ।

नगरपालिकाको कम्फा, तिर्प, सुम्ली, मुर्मा र सालिम गाउँमा भने सडक पुग्न बाँकी छ । रारा निकुञ्जले गर्दा मुर्मा गाउँमा सडक लैजान समस्या भएको नगरपालिका प्रमुख हरिजंग शाहीले बताए । उनका अनुसार सडक निर्माण गर्न समस्या भएपछि पर्यटकीय गन्तव्य राराताल नजिकैका बासिन्दाले अझै विकासको अनुभूति गर्न पाएका छैनन् ।

निकुञ्जले गाउँको सडक छेकिएपछि घण्टौं हिँडेर सदरमुकाम गमगढी जानुपर्ने बाध्यता भएको मुर्मा गाउँका देविसिंह रोकायाले बताए । ‘अरू वडामा सबैका घर आँगनबाटै गाडी गुड्छन्,’ उनले भने, ‘हामीलाई भने गाडी चढ्नकै लागि २ घण्टा हिँड्नुपर्ने बाध्यता छ ।’

सडक पुगेपछि अरू सेवा सुविधा पनि गाउँमै भित्रिएको तल्लेखका अंकबहादुर बुढाले बताए । उनले गाउँमै एक वर्षदेखि ५ सय कुखुरा पाल्न थालेका छन् । ‘कुखुरा र कृषि उत्पादन बिक्री गर्न बजार जानुपर्दैन,’ उनले भने, ‘व्यापारीले घरमै गाडी ल्याएर कृषिजन्य उत्पादन खरिद गरी लैजान्छन् ।’

सडक पुगेपछि स्याउले मूल्य पाएको छायानाथरारा–१३ का वडाध्यक्ष चक्र रावतले बताए । ‘बारीको आलु र सिमी बेच्न पनि बजार जानुपर्दैन,’ उनले भने, ‘सडकले गाउँमा समृद्धि भित्र्याएको छ ।’ सबैजसो गाउँमा सडक पुगेपछि स्थानीयको जीवनस्तर उकासिएको नगरप्रमुख शाहीले बताए । उनका अनुसार यो वर्ष पनि सडक निर्माणलाई प्राथमिकता दिई झन्डै ५ करोड रुपैयाँ विनियोजन गरिएको छ । अहिलेसम्म सडक निर्माणमा झन्डै २० करोड रुपैयाँ खर्च भएको नगरपालिकाले जनाएको छ । ‘सडकसँगै विद्युत्, सञ्चार, स्वास्थ्य, शिक्षा, सिँचाइलगायत पूर्वाधार निर्माणमा जोड दिएका छौं,’ उनले भने, ‘सडकले अरू विकास योजना कार्यान्वयन गर्न पनि सहयोग पुर्‍याएको छ । उनका अनुसार नगरभरि झन्डै २ सय किलोमिटर सडक खनिएको छ ।

प्रकाशित : माघ १४, २०७८ १३:२६
पूरा पढ्नुहोस्
प्रतिक्रिया
पठाउनुहोस्
×