किर्ते नियुक्ति दिएर ठगी गर्ने पक्राउ
धनुषा — सडक डिभिजन जनकपुर प्रदेश–२ को लेटर प्याड तयार गरी नक्कली नियुक्तिपत्र दिएर ठगी गर्नेलाई प्रहरीले पक्राउ गरेको छ ।
सडक डिभिजन जनकपुरको प्राविधिक सुपरभाइजर पदको नियुक्ति पत्र,मासिक तलब र सो पदसम्बन्धी उम्मेदवारको सम्झौतापत्र दिएर २ लाख रुपैयाँ ठगी गरेको आरोपमा धनुषा धनौजी गाउँपालिका–१ का २५ वर्षीय शहादत राईनलाई प्रहरीले पक्राउ गरेको छ ।
धनौजी गाउँपालिका–१ का १९ वर्षीय बब्लु पासमान, २० वर्षीय पारस कुमार पासवान र दीपेशकुमार पासमानलाई नियुक्तिपत्र दिएर २/२ लाख ठगी गरेको आरोपमा राइनलाई पक्राउ गरीएको जिल्ला प्रहरी कार्यालय धनुषाका प्रहरी नायब उपरीक्षक दीपक रायले बताए ।
तीनै जनाबाट राइनले २ लाखको दरले ठगी गरेको संयुक्त रूपमा किर्ते, ठगी शीर्षकमा जाहेरी दरखास्त दिएपछि राइनलाई जनकपुरधाम उप–महानगरपालिका–२ कदम चोकबाट पक्राउ गरीएको रायले बताए । धनुषा जिल्ला अदालतबाट सरकारी छाप दस्तखत किर्ते र ठगी मुद्दा शीर्षकमा १० दिनको म्याद थप गराई थप अनुसन्धान भइरहेको प्रहरीले जनाएको छ ।
प्रकाशित : माघ १४, २०७८ १२:३१