रौतहटमा मोटरसाइकल दुर्घटना हुँदा २ को मृत्यु
रौतहट — रौतहटको गरुडा नगरपालिका ४ स्थित बैरियागाउँमा मोटरसाइकल अनियन्त्रित भई दुर्घटना हुँदा दुई जनाको मृत्यु भएको छ । मृत्यु हुनेमा गढीमाई नगरपालिका ८ का १९ वर्षीय महमद अलताफ आलम र २५ वर्षीय रवि साह रहेका छन् ।
बुधबार राति करिब ११ बजे ना ६२ प ३३९९ नम्बरको मोटरसाइकल गरुडाबाट मलाही टोल जाँदै गर्दा अनियन्त्रित भई दुर्घटना भएको थियो । दुर्घटनामा गम्भीर घाइते आलम र साहलाई तत्काल उपचारका लागि झाझपुलमा रहेको रौतहट ग्राण्डी अस्पतालतर्फ लैजाने क्रममा बाटोमै मृत्यु भएको ईलाका प्रहरी कार्यालय गरुडाका डिएसपी श्रीराम भण्डारीले बताए । उनका अनुसार घटनाबारे अनुसन्धान भइरहेको छ ।
प्रकाशित : माघ १३, २०७८ १५:५९प्रतिक्रिया