चिसो र हुस्सुले सर्लाहीको जनजीवन प्रभावित
काठमाडौँ — अत्याधीक चिसो र हुस्सुका कारण सर्लाहीको जनजीवन प्रभावित बनेका छ । बाक्लो हुस्सु लाग्नुका साथै शीतलहर र चिसो हावा चलिरहेका कारण जिल्लाको न्यूनतम तापक्रम घटेको बताइएको छ ।
बादल, हुस्सु, शीतलहरले गर्दा सर्लाही र आसपासका जिल्लाका बासिन्दा पनि प्रभावित बनेका छन् । बिहान र बेलुकाको समयमा लाग्ने बाक्लो हुस्सु, कुहिरोका कारण नियमित सवारी आवागमनमा पनि समस्या भएको स्थानीयहरूले बताएका छन् ।
हुस्सु लागेर नजिकैको दृश्य देख्न मुस्किल परेकाले पूर्वपश्चिम राजमार्गसहित अन्य भित्री सडकमा अहिले सवारी साधनहरू बत्ती बालेर गुड्नुपरेको छ । यस्तै यात्रा गर्दा सावधानी अपनाउन जिल्ला ट्राफिक प्रहरी सर्लाहीले आग्रह गरेको छ ।
अत्याधीक चिसोका कारण विशेषगरी यहाँका वृद्ध, बालबालिका र विपन्न परिवारका व्यक्ति बढी प्रभावित भएका छन् । चिसो छल्न सार्वजनिक ठाउँ तथा चोकचोकमा दिउँसै आगो बालेर ताप्न थालिएको छ ।
प्रकाशित : माघ ३, २०७८ २१:४८