किसानका माग पूरा गर्न भन्दै जनमत पार्टीको प्रदर्शन- मधेस - कान्तिपुर समाचार
कान्तिपुर वेबसाईट
AdvertisementAdvertisement

किसानका माग पूरा गर्न भन्दै जनमत पार्टीको प्रदर्शन

अवधेशकुमार झा

राजविराज — सिके राउत नेतृत्वको जनमत पार्टीले किसानका माग पूरा गर्नुपर्ने माग राख्दै शुक्रबार राजविराजमा प्रदर्शन गरेको छ । बाढी तथा पहिरो पीडित किसानहरूलाई उचित राहत उपलब्ध गराउनुपर्ने उनीहरूको माग छ । प्रदर्शनको क्रममा राजविराजसहित विभिन्न गाउँबाट समेत किसानहरूको उपस्थिति रहेको थियो ।

जनमत पार्टीका नेता तथा कार्यकर्ताले यसअघि पनि पीडित किसानलाई राहत उपलब्ध गराउनुपर्ने भन्दै प्रदर्शन गरेका थिए । जसअनुसार उनीहरूले राजमार्ग नै अवरुद्ध पारेर प्रदर्शन गरेका थिए ।

सरकार र स्थानीय प्रसासनले २५ जनाभन्दा बढी एकै ठाउँमा भेला नहुन जारी गरेको सूचना विपरीत जनमत पार्टीका कार्यकर्ताले प्रदर्शन गरेका हुन् । साथै शुक्रबारको प्रदर्शनमा सहभागी सयौं कार्यकर्ताहरू बिनामास्क उपस्थित भएका थिए ।

शुक्रबार मात्रै सप्तरीमा ३ जना न्यायाधीशसहित १० जनामा कोरोना संक्रमण पुष्टि भएपछि वीरगन्ज कोरोना संक्रमणको उच्च जोखिममा परेको भन्दै स्वास्थ्यकर्मीले सचेत रहन आग्रह गरेका छन् ।

यस्तै प्रमुख जिल्ला अधिकारी जर्नादन गौतमले स्वास्थ्य मापदण्ड उल्लंघन गरेको भन्दै प्रदर्शनका अगुवाहरूमाथि कानुन बमोजिम कारबाही चलाउउने बताएका छन् ।

जनमत पार्टीका सप्तरी सचिव थानेश्वर साहले भने किसानको समस्या बिकराल रहेकाले उक्त माग पूरा गराउन आफूहरू आन्दोलनमा रहेको बताए ।

प्रकाशित : पुस ३०, २०७८ १७:१५
प्रतिक्रिया
पठाउनुहोस्

१५ कर्मचारीमा कोरोना देखिएपछि एक साताका लागि कावासोतीको नापी कार्यालय बन्द

नारायण शर्मा

पूर्व नवलपरासी — नापी कार्यालय कावासोतीका १५ कर्मचारीमा कोरोना संक्रमण देखिएपछि माघ ७ गतेसम्म कार्यालय बन्द गरिएको छ । अत्यावश्यक सेवाबाहेकका सबै काम शुक्रबारबाट माघ ७ गतेसम्म बन्द रहने कार्यालयका प्रमुख नापी अधिकृत खिमलाल गौतमले बताए । 

अधिकृत गौतमले शुक्रबार सूचना जारी गर्दै अत्यावश्यकबाहेकका सबै सेवा एक सातासम्मका लागि बन्द रहने जानकारी गराएका हुन् ।

१५ जनालाई एकै पटक कोरोना संक्रमण देखिएकाले कार्यालय सञ्चालन हुन नसक्ने जानकारी दिँदै गौतमले संक्रामक रोग नियन्त्रण ऐनअनुसार कार्यालयको नियमित सेवा बन्द गरिएको जानकारी दिए । अदालतको आदेश र अत्यावश्यक अंश मुद्दाबाहेकका सबै सेवा बन्द गरिएको उनले सुनाए ।

कार्यालयका कर्मचारीमा कोरोना संक्रमणसँग मिल्दोजुल्दो लक्षण देखिएपछि जिल्ला अस्पतालमा जचाउँदा जम्मा २७ कर्मचारीमध्ये १५ जनामा कोरोना संक्रमण पुष्टि भएको हो ।

एउटै कार्यालयमा १५ कर्मचारीमा कोरोना देखिएपछि पूर्वी नवलपरासीमा समुदाय स्तरमा कोराना संक्रमण फैलनसक्ने भन्दै प्रमुख जिल्ला अधिकारी सुमन घिमिरेले संक्रमणको चेनब्रेक गर्न सामाजिक दूरी कायम गर्ने, भेला,सभा-सम्मेलन बन्द गर्ने र वडा तहमा कोरोना खोप लैजाने गरी व्यवस्थापन गरिएको जानकारी दिए ।

प्रकाशित : पुस ३०, २०७८ १७:०७
पूरा पढ्नुहोस्
प्रतिक्रिया
पठाउनुहोस्
×