वृद्ध हत्याको खुलेन कारण- प्रदेश २ - कान्तिपुर समाचार

वृद्ध हत्याको खुलेन कारण

कान्तिपुर संवाददाता

सप्तरी — सप्तरीका ८१ वर्षीय वृद्धको हत्या भएको दुई साता पुगे पनि प्रहरीले दोषीलाई पक्राउ गर्न सकेको छैन । न त हत्याको कारण नै खुल्न सकेको छ । मंसिर ८ मा छिन्नमस्ता गाउँपालिका–६ खुदीबखारीका मिश्रीलाल मण्डलको हत्या भएको हो ।

राजविराज–छिन्नमस्ता सडक खण्डअन्तर्गत झौखराही फूलबारीमा धारिलो हतियार प्रयोग गरी घाँटी रेटेर हत्या गरेको अवस्थामा उनको शव फेला परेको थियो ।

उनी दिउँसो छिन्नमस्ता चोकमा चिया खाएर घर फर्कंदै थिए । स्थानीयले शव देखेपछि प्रहरीलाई खबर गरेका हुन् । तर हालसम्म प्रहरीले हत्याको कारणसमेत पता लगाउन सकेको छैन । ‘हामी अनुसन्धानमै छौं,’ सप्तरी प्रहरी प्रवक्ता डीएसपी माधवप्रसाद

काफ्लेले भने, ‘अझैसम्म हत्याको कारण र दोषी को हो भन्ने खुल्न सकेको छैन ।’ दैनिक रोजगारी गरेर छाक टार्ने हैसियतका वृद्धको हत्या कसले र किन गर्‍यो होला भन्नेबारे स्थानीयले पनि अनुमान गर्न सकेका छैनन् ।

यसअघि सप्तरीको खड्ग नगरपालिका–५ खरचुहियाका वृद्ध दम्पतीको हत्या पनि अझै रहस्यमै छ । २०७५ फागुन १४ गते बिहान ७५ वर्षीय सबुरी साह र उनकी श्रीमती ६५ वर्षीय बेचनीदेखि साहको शव आफ्नै घरभित्र जलेको अवस्थामा फेला परेको थियो । नियमित दूध दिन आउने व्यक्तिले बिहान आउँदा घरबाट कोही ननिस्केको र कोठाबाट धूवाँ आइरहेको देखेपछि प्रहरीलाई खबर गरेका थिए ।

प्रहरीले त्यतिबेला दम्पतीको हत्यापछि जलाइएको बताएको थियो । तर, घटना भएको ३३ महिना बित्दा पनि अझै अनुसन्धानमा रहेको प्रहरीले जवाफ दिँदै आएको छ ।

प्रकाशित : मंसिर २३, २०७८ ०९:३५
प्रतिक्रिया
पठाउनुहोस्

एट्लेटिको अन्तिम १६ मा

एएफपी

पेरिस — स्पेनको एट्लेटिको म्याड्रिडले तनावपूर्ण खेलमा एफसी पोर्टोमाथि जित हासिल गरी च्याम्पियन्स लिग फुटबलको अन्तिम–१६ मा स्थान बनाएको छ । इंग्लिस टोली लिभरपुल र नेदरल्यान्ड्सको अयाक्सले समूह चरणमा शतप्रतिशत जित पाएका छन् ।

सन् २०१४ र ०१६ को फाइनलमा रियल म्याड्रिडसँग पराजित डिएगो सिमोनीको एट्लेटिकोका लागि नकआउट चरणमा पुग्न पोर्टोमाथि जित आवश्यक थियो ।

तीन रातो कार्ड देखाइएको खेल स्पेनिस च्याम्पियन एट्लेटिकोले ३–१ ले जितेको हो । पोर्टोलाई छनोट हुन कम्तीमा बराबरी चाहिन्थ्यो । एट्लेटिको समूह ‘बी’ मा दोस्रो स्थानमा रहेर छनोट भएको हो । लिग चरणका सबै ६ खेल जितेको लिभरपुलभन्दा ११ अंकले पछि रह्यो । लिभरपुलले एसी मिलानलाई उसकै मैदानमा २–१ गोलले हरायो ।

यता सान्टियागो बेर्नाबेउमा इन्टर मिलानमाथि २–० को जितसँगै रियल म्याड्रिडले समूह ‘डी’ को शीर्षस्थान सुरक्षित गर्‍यो । एम्स्टर्डमको बन्द रंगशालामा अयाक्सले पोर्चुगलको स्पोर्टिङ लिस्बनमाथि ४–२ को जित निकाल्यो । समूह ‘सी’ मा अयाक्सले शतप्रतिशत जित निकाल्यो । लिस्बन पनि समूह उपविजेता भएर अगाडि बढ्यो ।

अन्तिम १६ का लागि छनोट भइसकेको म्यानचेस्टर सिटीले आरबी लाइप्जिगसँग २–१ को हार बेहोरेको छ । यो समूहमा पेरिस सेन्ट जर्मेन (पीएसजी) भने क्लब ब्रुगलाई ४–१ ले हराएर समूह उपविजेता बन्न सफल रह्यो ।

प्रकाशित : मंसिर २३, २०७८ ०९:३२
पूरा पढ्नुहोस्
प्रतिक्रिया
पठाउनुहोस्
×