रामजानकी विवाह महोत्सवमा निकालियो शोभायात्रा- प्रदेश २ - कान्तिपुर समाचार

रामजानकी विवाह महोत्सवमा निकालियो शोभायात्रा

श्यामसुन्दर शशि

जनकपुर — सप्ताहव्यापी रामजानकी विवाह महोत्सवमा शोभायात्रा निकालिएको छ । बुधबार अपराह्न २ बजे जानकी मन्दिरबाट जानकीको तथा राम मन्दिरबाट रामको डोला (डोली) बाजागाजासहित शोभायात्रा सुरु गरिएको हो । यात्रामा हजारौं श्रद्धालु सहभागी छन् ।शोभायात्रा निकाल्ने तयारी भइरहँदा हेलिकोप्टरबाट पुष्पवर्षा गरेर हर्षबढाई गरिएको थियो । 

शोभायात्राको भिड नियन्त्रण गर्न सयौको संख्यामा जनपथ र सशस्त्र प्रहरी परिचालन गरिएको थियो भन्ने नेपाली सेनाको संगीत टोलीले मंगलध्वनी बजाउँदै यात्रामा सहभागी भएको थियो । जानकी मन्दिरका महन्त रामतपेश्वर दासको नेतृत्वमा निस्केको जानकीको डोलासँग प्रदेश २ का पर्यट मन्त्री शत्रुघन महतो, संघीय सांसद राजेन्द्र महतो, जनकपुर उपमहानगरपालिकाका मेयर लालकिशोर साहसहित उच्च सुरक्षा अधिकारीहरुको सहभागिता थियो ।

यसैगरी राम मन्दिरका महन्त रामगिरीको नेतृत्वमा निस्केको रामको डोलासँग पनि हजारौं श्रद्धालु सहभागी थिए । दुबै डोला बारहवीघा रंगभूमि मैदान पुगी त्रिपेक्षणपश्चात नगर परिक्रमा गरेको थियो । सर्वसाधारणले सडक पेटी र आ-आफ्ना घरको कौसीबाट राम जानकीको दर्शन गरेका थिए ।

संयुक्त शोभायात्रा नगर परिक्रमा गरी सन्ध्या जानकी मन्दिर प्रवेश गर्नेछ । जहाँ अबेर रातिराम सीताको मिथिला विधिअनुसार विवाह हुने छ । त्रेता युगमा राम जानकीको विवाह भएको अवसर पारी मंसिर शुक्ल पञ्चमीको दिन सीताको जन्मस्थल जनकपुरधाममा प्रत्येक वर्ष विशेष महोत्सव आयोजन हुँदै आएको छ ।

पाँच दिनअघि नगर दर्शनसँगै सुरु भएको विवाह महोत्सवको दोस्रो दिन फूलबारी लीला, तेस्रो दिन धनुषयज्ञ, चौथो दिन तिलकोत्सव, चौथो दिन मंगलबार मटकोर र पाँचौदिन बुधबार विवाह उत्सव मनाइने छ । बिहीबार जन्तीहरुलाई रामकलेवा अर्थात् विवाह भोज खुवाएर विदा गरिने छ ।

यसैबीच, प्रदेश २ स्वास्थ्य निर्देशनालयले जानकी मन्दिर प्रांगणमा कोरोना डेस्क संचालन गरेको छ । स्वास्थ्य निर्देशक विजयकुमार झाका अनुसार डेस्कमा कोरोनाबाट जोगिने जनचेतनामूलक कार्यक्रमसँगै खोप, स्वाब परीक्षण, हात धुने तथा मास्क वितरण गरिँदैछ ।

प्रकाशित : मंसिर २२, २०७८ १६:१७
प्रतिक्रिया
पठाउनुहोस्

खोटाङमा कम्पोस्ट मल उत्पादन सुरु

डम्बरसिं राई

खोटाङ — खोटाङमा कम्पोस्ट मल उत्पादन सुरु भएको छ । दिक्तेल रुपाकोट मझुवागढी नगरपालिका–२ सोल्मामा स्थापना गरिएको कम्पोस्ट मल उद्योगबाट उत्पादन सुरु भएको हो ।

कृषिजन्य उत्पादनलाई बजारीकरण र व्यवसायिक कृषि प्रणालीको विकास गर्न नमुना कृषि स्रोत केन्द्र पनि स्थापना गरिएको नगरपालिकाले जनाएको छ । एक करोड २१ लाख ६९ हजार रुपैयाँको लगानीमा प्रति घण्टा एक टन कम्पोस्ट मल उत्पादन गर्ने क्षमताको उद्योग र २१ लाख २० हजारको लगानीमा नमूना कृषि स्रोत केन्द्र संयुक्त रुपमा सञ्चालन गरिएको हो ।

दिक्तेल बजारको फोहर संकलन तथा अन्य ठाउँबाट समेत संकलित फोहोर संकलन गरेर मल निर्माण गर्ने उद्देश्यले उद्योग स्थापना गरिएको हो । कम्पोस्ट मलमा दुई जना र नमुना कृषि स्रोत केन्द्रमा अफिसरसहित चार जना कर्मचारी कार्यरत छन् ।

मल उद्योगमा एक प्राविधिक र एक ड्राइभर कार्यरत छन् भने नमुना कृषि स्रोतमा एक अधिकृतसहित चारजना कर्मचारी खटिएर मल उत्पादन सुरु गरिएको दिक्तेल रुपाकोट मझुवागढी नगरपालिकाका सूचना अधिकारी मोहनकुमार भट्टराईले बताए ।

प्रकाशित : मंसिर २२, २०७८ १५:५५
पूरा पढ्नुहोस्
प्रतिक्रिया
पठाउनुहोस्
×