पर्सा कांग्रेसमा देउवा समूहको वर्चस्व- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

पर्सा कांग्रेसमा देउवा समूहको वर्चस्व

भूषण यादव

वीरगन्ज — कांग्रेसको १४ औं महाधिवेशन अन्तर्गत पर्सामा महाधिवेशन प्रतिनिधिका लागि भएको निर्वाचनमा देउवा समूहको वर्चस्व देखिएको छ । जिल्ला निर्वाचन समितिका निर्वाचन अधिकृत नरेन्द्र कुमार केसीका अनुसार चार निर्वाचन क्षेत्र रहेको जिल्लामा दुई पदेन सदस्यसहित कूल एक सय ४ जना महाधिवेशन प्रतिनिधि निर्वाचित भएका छन् ।

जसमध्ये २० महाधिवेशन प्रतिनिधि संस्थापन इतर समूहका विजयी भएका छन् । पर्सामा महाधिवेशन प्रतिनिधिका लागि भएको निर्वाचनमा संस्थापन समूहका ८४ जना महाधिवेशन प्रतिनिधि चुनिएका हुन् ।

पर्साको क्षेत्र नम्बर ४ मा केन्द्रीय सदस्य रमेश रिजालको पहलमा सर्वसहमतिमा क्षेत्रीय सभापतिसहित २४ महाधिवेशन प्रतिनिधि चुनिएका थिए । बाँकी ३ वटा निर्वाचन क्षेत्रमा बुधबार निर्वाचन भएको थियो ।

चार जना क्षेत्रीय सभापतिमध्ये एक जना मात्र संस्थापन इतर समूहका विजयी भएका छन् । क्षेत्र नं. १ का क्षेत्रीय सभापति अरविन्द गुप्ता संस्थापन इतर समूहका हुन् । गुप्ताले आफूलाई नेपाली कांग्रेसको समूह बताएका छन् ।

क्षेत्र नम्बर २ मा मो.सहाबुद्दिन, ३ मा श्रीकृष्ण चौहान र ४ मा श्रीकान्त यादव सभापतिमा निर्वाचित भएका हुन् । सहाबुद्दिन, चौहान र यादव संस्थापन समूहबाट निर्वाचनमा होमिएका थिए । पूर्व सांसद राजेन्द्रबहादुर अमात्य महाधिवेशन प्रतिनिधिमा पराजित भएका छन् । केन्द्रीय निर्वाचन समितिले पर्साको पालिका र जिल्ला अधिवेशन केन्द्रीय महाधिवेशनपछि गरिने जनाएको छ ।

प्रकाशित : मंसिर १७, २०७८ १९:०५
प्रतिक्रिया
पठाउनुहोस्

नेपालमै पहिलो पटक ‘साइबर सेक्युरिटी एण्ड डिजिटल फरेन्सिक’ विषय पढाई हुने

कान्तिपुर संवाददाता

काठमाडौँ — प्रतिष्ठित ब्रिटिस एक्रिडेसन काउन्सिल (बीएसी)को मान्यता प्राप्त शैक्षिक संस्था द ब्रिटिस कलेजमा नेपालमै पहिलो पटक ‘बीएससी (हन्स) साइबर सेक्युरिटी एण्ड डिजिटल फरेन्सिक विषय’को पढाई हुने भएको छ । कलेजले बिहीबार एक औपचारिक कार्यक्रमको आयोजना गरेर ब्रिटिस इन्जिनियरिङ काउन्सिल तथा ब्रिटिस कम्प्युटर सोसाइटीबाट समेत मान्यता पाएको सो विषयको पढाई युनिभर्सिटी अफ द वेस्ट अफ इंग्ल्याण्ड (युडब्लुई)को सम्बन्धनमा सुरू गर्ने जानकारी दिएको हो । कलेजले सन् २०२२ को जनवरीबाट ‘बीएससी (हन्स) साइबर सेक्युरिटी एण्ड डिजिटल फरेन्सिक’कार्यक्रमको पढाई सुरू गर्दैछ ।

राष्ट्र बैंकका डेपुटी गभर्नर बमबहादुर मिश्रले शैक्षिक कार्यक्रमको औपचारिक सुरूआत गरे । राष्ट्र बैंकले पनि साइबर सेक्युरिटीको क्षेत्रमा दक्ष जनशक्तिको अभाव महसुस गरेको बताउँदै मिश्रले ब्रिटिस कलेजले यस्तो पाठ्यक्रमलाई संचालन गर्न लागेकोमा खुसी व्यक्त गरे । नेपालमा एटीएम ह्याक हुँदा त्यसको अनुसन्धान गर्न सिंगापुरबाट महँगो रकम तिरेर जनशक्ति ल्याउनुपरेको तीतो यथार्थ पोख्दै उनले ब्रिटिस कलेजबाट यस क्षेत्रलाई योगदान पुर्‍याउने जनशक्ति निर्माण हुने विश्वास व्यक्त गरे । उनले साइबर सेक्युरिटी विषय पढ्नको लागि अब विदेश जान नपर्ने अवस्था आएको समेत बताए ।

एनसेलका प्रमुख सूचना अधिकारी विशाल उपाध्यायले पछिल्लो समय सूचना प्रविधिले फड्को मार्दा चुनौति पनि थपिएकोले यस क्षेत्रमा काम गर्ने जनशक्ति देशलाई आवश्यक रहेको औंल्याए । सञ्चार तथा सूचना प्रविधि मन्त्रालयका सह–सचिव अनिलकुमार दत्तले ब्रिटिस कलेजले मात्रै नभई अन्यले पनि यस्तो विषयको पढाई थाल्नुपर्नेमा जोड दिए ।

कार्यक्रमलाई सम्बोधन गर्दै कलेजका संस्थापक तथा सीईओ राजन कँडेलले नेपाल डिजिटल अर्थतन्त्रतर्फ द्रुत गतिमा अघि बढेकोले साइबर सेक्युरिटी तथा डिजिटल फरेन्सिकको क्षेत्रमा जनशक्तिको ठूलो माग रहेको बताए । यसै क्षेत्रसँग सम्बन्धित शैक्षिक कार्यक्रम नेपालमै नौलो भएको भन्दै उनले भने, ‘नेपाल डिजिटल अर्थतन्त्रतर्फ द्रुत गतिमा अघि बढिरहेको छ त्यसैले देशभित्र साइबर सुरक्षा र डिजिटल फरेन्सिकको ठूलो आवश्यकता छ । यस्ता शैक्षिक कार्यक्रमहरु मार्फत हाम्रो सुरक्षा हुनेछ र सुरक्षित डिजिटल नेपाल निर्माण गर्न मद्दत पुग्नेछ ।’ साथै नेपाली युवाहरुले विश्व बजारमा प्रतिस्पर्धाका लागि ज्ञान र सीप पाउने उनले बताए ।

प्रकाशित : मंसिर १७, २०७८ १९:०३
पूरा पढ्नुहोस्
प्रतिक्रिया
पठाउनुहोस्
×