अख्तियारले प्रदेश सरकारलाई बद्‍नाम बनाउन खोज्यो : मुख्यमन्त्री राउत- प्रदेश २ - कान्तिपुर समाचार

अख्तियारले प्रदेश सरकारलाई बद्‍नाम बनाउन खोज्यो : मुख्यमन्त्री राउत

सन्तोष सिंह

जनकपुर — प्रदेश २ का मुख्यमन्त्री लालबाबु राउतले अख्तियार दुरुपयोग अनुसन्धान आयोगले प्रदेश सरकारलाई बद्नाम गर्न जालझेल गरेको टिप्पणी गरेका छन् । प्रदेश सभालाई समबोधन गर्दे मुख्यमन्त्री राउतले प्रदेश सरकारलाई बदनाम हुने षड्यन्त्र भएको बताए ।

मुख्यमन्त्री ‘बेटी पढाउ, बेटी बचाउ अभियान’ अन्तर्गत साइकल वितरण कार्यक्रमलाई विवादित बनाउने राजनीति षड्यन्त्र भएको उनले आरोप लगाए । प्रदेश सभाबाट पारित बजेट कार्यान्वयन मुख्यमन्त्रीले गर्ने होइन, राउतले भने, ‘मुख्यमन्त्री र प्रदेश सरकारलाई जालझेल गरी बद्नाम गरिएको छ । सरकारविरुद्ध षड्यन्त्र भएको छ ।’

मुख्यमन्त्री कार्यालयले प्रक्रिया पूरा गरी साइकल खरिद गरेको कागजात प्रदेश सांसदलाई देखाउँदै मुख्यमन्त्री राउतले अख्तियार दुरुपयोग अनुसन्धान आयोगले मुख्यमन्त्री कार्यालयमा छापा मारेर प्रदेश सरकारको गरिमामाथि प्रहार गरेको बताए । ‘अख्तियारको छापा संस्था माथिको आक्रमण हो,’ राउतले भने, ‘अख्तियारले पत्र नै नपठाइ छापा मारे । यो व्यवहार ठीक हो त ? प्रदेशको सिंहदरबारको अख्तियारले छापा मार्न मिल्छ ?’ आयोगले समन्वय गरेको भए आफै सबै कागजात उपलब्ध गराउने पनि उनको भनाइ थियो ।

साइकल खरिदको लागत र कम्पनी सार्वजनिक

प्रदेशसभालाई सम्बोधन गर्दै मुख्यमन्त्री राउतले प्रदेश सरकारले वितरण गरेको साइकलले प्रदेशको छोरीको सुरक्षा र शिक्षामा सहयोग भएको बताए । इबिडिङ गरी न्यूनतम मूल्यमा साइकल खरिद गरिए पनि साइकल खरिदलाई विवादित बनाएको आरोप लगाए । ‘सुशासनका लागि प्रतिबद्ध म आफै अनुसन्धानमा सहयोग गर्न तयार छु,’ मुख्यमन्त्री राउतले भने, ‘जालझेल गरी प्रदेश सरकारमाथि आक्रामण भयो । मुख्यमन्त्री कार्यालयमा आउँदा समन्वय हुनुपर्थ्यो । कार्यालयमा अपनाएको प्रक्रिया सही भएन ।’

कर्मचारीको असहयोग र जनशक्ति अभावका कारण प्रदेश सरकारका चर्चित अभियानहरु प्रभावित भएको राउतले आरोप लगाए । ‘कर्मचारीबाट पाउनु पर्ने सहयोग नपाउनु र न्यून कर्मचारीका कारण सरकारलाई सिस्टम बसाल्न समस्या भएको छ,’ मुख्यमन्त्री राउतले भने, ‘मुख्यमन्त्री बेटी पढाउ, बेटी बचाउ अभियान’ कर्मचारीकै असहयोगका कारण प्रभावित भएको छ ।’

अभियानअन्तर्गत प्रदेशमा जन्मिने छोरीहरुको बिमा कार्यक्रम कर्मचारीकै कारण अवरुद्ध भएको राउतले आरोप लगाए । प्रदेश सरकारले ल्याएको ‘बेटी पढाउ, बेटी बचाउ अभियान’ले अन्य प्रदेशलाई समेत पाठ सिकाएको बताउँदै छोरी बिमा कार्यक्रम प्राविधिक कारणले अगाडि बढ्न नसकेको बताए । एक लाखबाट सुरु भएको छोरी बिमा कार्याक्रम तीन लाख पुगेको जानकारी गराउँदै प्राविधिक कारणले अभियान रोकिएको बताए । साढे तीन वर्षमा प्रदेश सरकारले सीमित स्रोत साधनबाट उदाहरणीय काम र प्रदेशका लागि आवश्यक उत्कृष्ट कानुन बनाएको राउतले दाबी गरे ।

प्रदेशसभाको सातौ अभिवेशनको पहिलो बैठकमा प्रदेश प्रमुख हरिशंकर मिश्रले पठाएको पत्र पढेर सभामुख सरोजकुमार यादवले जानकारी गराएका थिए । प्रदेश प्रमुखको कार्यालयबाट प्रदेशसभामा प्राप्त छैटौं अधिवेशन अन्त, सातौँ अधिवेशन आह्वान, मन्त्रिपरिषद पुनर्गठन बारेको पत्र सभामुखले वाचन गरेका थिए । प्रदेशसभामा मुख्यमन्त्री राउतले आज विश्वासको मत लिँदैछन् । सातौँ अधिवेशनको पहिलो बैठकमा दलका सांसदहरुलाई बोल्ने समय दियएको छ । दोस्रो बैठकमा राउतले विश्वासको मत लिने छ ।

प्रकाशित : आश्विन २०, २०७८ १३:४१
प्रतिक्रिया
पठाउनुहोस्

विश्वासको मत लिँदै मुख्यमन्त्री राउत

चार दलको गठबन्धनले प्रदेश सरकार बलियो स्थितिमा
सन्तोष सिंह

धनुषा — दल विभाजनपछि झन् शक्तिशाली बनेका प्रदेश २ का मुख्यमन्त्री लालबाबु राउतले बुधबार प्रदेशसभाको बैठकमा विश्वासको मत लिँदै छन् । मुख्यमन्त्री राउतले प्रतिनिधित्व गर्ने जनता समाजवादी पार्टी विभाजन भएको ३० दिनभित्र राउतले विश्वासको मत लिने प्रस्ताव पेस गरेको प्रदेशसभा संसद् सचिवालयले जनाएको छ । 

तत्कालीन राष्ट्रिय जनता पार्टी र संघीय समाजवादी पार्टीको गठबन्धन सरकारमा राउत मुख्यमन्त्री बनेका थिए । पछि, दुवै दल मिलेर बनेको जसपाबाट पनि राउत नै मुख्यमन्त्री रहे । जसपा विभाजन भएर लोकतान्त्रिक समाजवादी पार्टी गठन भएपछि मुख्यमन्त्री राउतले प्रदेशसभा संसद् सचिवालयलाई पत्र पठाएर विश्वासको मतका लागि प्रस्ताव राख्ने जनाएका थिए ।

अहिले मुख्यमन्त्री राउतसँग दुई तिहाइभन्दा बढी मत छ । पार्टी विभाजनसँगै राउतले आफ्ना सरकारमा कांग्रेस र माओवादी (केन्द्र) लाई समावेश गरिसकेका छन् भने छिट्टै माधवकुमार नेपाल नेतृत्वको नेकपा (एकीकृत समाजवादी) पनि सरकारमा सहभागी हुने तयारी भइरहेको छ ।

यी चारैवटा दलसँग प्रदेशको दुई तिहाइभन्दा बढी सांसद छन् । प्रदेशसभामा १ सय ४ जना सांसद रहेकाले मुख्यमन्त्री राउतलाई विश्वासको प्रस्तावको पक्षमा बहुमतका लागि ५३ मत आवश्यक पर्नेछ । प्रदेशसभामा सतापक्ष जसपाको ३८, कांग्रेसको १९, माओवादीको ८ जना सांसद छन् । १३ जना प्रदेश सांसद रहेको एकीकृत समाजवादीले पनि सरकारलाई समर्थन गरेको छ । प्रमुख प्रतिपक्ष दलका लोकतान्त्रिक समाजवादी पार्टी (लोसपा) को १६ र प्रतिपक्ष नेकपा एमालेको ८ जना सांसद छन् ।

प्रदेश प्रमुख हरिशंकर मिश्रले सातौं अधिवेशन आह्वान गरेपछि अधिवेशनको पहिलो बैठकमा मुख्यमन्त्री राउतको विश्वासको मतको प्रस्ताव पेस गर्ने कार्यसूची राखिने प्रदेशसभा संसद् सचिवालयका निमित्त सचिव रञ्जित यादवले बताए । त्यसपछि सांसदलाई पक्ष र विपक्षमा हस्ताक्षर गराउने तयारी संसद् सचिवालयको छ । बुधबार अधिवेशनको पहिलो दिन प्रदेशसभाको २ पटक बैठक बस्नेछ । पहिलो बैठकमा शुभकामना र दोस्रो बैठकमा मुख्यमन्त्रीको प्रस्ताव पेस हुने संसद् सचिवालयले जनाएको छ ।

मुख्यमन्त्रीले संविधानको धारा १८८ अनुसार दल विभाजन भएको ३० दिनभित्र विश्वासको मत लिने व्यवस्था छ । निर्वाचन आयोगले भदौ ९ गते जसपा विभाजन भएर लोसपा गठन भएको र प्रदेश सांसदहरू सनाखत गरेको जानकारी भदौ २५ गते प्रदेशसभालाई दिएको छ । दल विभाजनको मिति भदौ ९ लाई मानेको खण्डमा मुख्यमन्त्रीले विश्वासको मत लिने समय असोज ७ गतेसम्म मात्रै थियो । मुख्यमन्त्रीले प्रदेश सांसद सनाखत गरेको विवरण प्रदेशसभालाई पठाएको मितिले ३० दिनभित्र विश्वासको मत लिन लागेका हुन् ।

लोसपा संसदीय दलका नेता जितेन्द्र सोनलले मुख्यमन्त्री नेतृत्वको सरकार यही कारणले अवैधानिक रहेको दाबी गरे । ‘यो प्रदेश सरकार संविधानको धारा १८८ को उपधार २ को व्याख्यालाई अपव्याख्या गरी चलेको छ’, नेता सोनलले भने, ‘निर्वाचन आयोगबाट भदौ ९ गते लोसपाले प्रमाणपत्र लिएको थियो । दल विभाजन ९ गते नै भयो । विश्वासको मत असोज ७ सम्म लिनुपर्ने थियो ।’

निर्वाचन आयोगले दल विभाजनको मिति भदौ ९ गतेलाई मानेको प्रदेशसभा संसद् सचिवालयका यादवले बताए । ‘लोसपा रोजेका प्रदेश सांसद भदौ २२ सम्म जसपाकै थिए,’ निमित्त सचिव यादवले भने, ‘२२ गतेअघि त जसपा संसदीय दलकै ह्वीप लाग्थ्यो । प्रदेश सांसदहरू जसपाबाट छुट्टिएर लोसपा रोजेपछि भदौ २५ पछि मुख्यमन्त्रीले विश्वासको मत लिन सक्नुहुन्थ्यो ।’ नेकपा एमालेका सचेतक किशोरी साहले मुख्यमन्त्रीले प्रदेशसभामा राख्ने विश्वसको मत प्रस्तावमा एमालेका सांसदले विपक्षमा मत हाल्ने बताए । ‘मुख्यमन्त्रीको पक्षमा प्रस्ट बहुमत छ,’ साहले भने, ‘प्रदेशसभाबाट मुख्यमन्त्रीज्यूले विश्वासको मत पाउनेछन् ।

प्रकाशित : आश्विन २०, २०७८ ०९:२५
पूरा पढ्नुहोस्
प्रतिक्रिया
पठाउनुहोस्
×