माग सकिएपछि मल आउँदै

कम्पनीका प्रमुख गोरखनाथ केसीका अनुसार ठेकेदार दुबइको स्विस सिंगापुर कम्पनीले चिनबाट मल ल्याउन लागेको हो । हाल भारतको कोलकाता बन्दरगाहमा आउने क्रममै रहेको उनको भनाइ छ । ‘चीनबाट मल बोकेर हिँडेको पानीजहाज हाल समुद्री मार्गमा छ,’ उनले भने, ‘यसै साताभित्र कोलकाता बन्दरगाहमा आइपुग्ने भए पनि नेपालमा ल्याउन कम्तीमा तीन साता लाग्नेछ ।’ केसीले दसैंअघि मल आइहाले पनि त्यसपछि मात्र बिक्रीवितरण हुने सम्भावना रहेको बताए ।

आउँदो डेढ साताभित्र युरिया मलको माग करिब सकिने भएकाले धान किसानका लागि भने उपयोगी नहुने उनले जानकारी दिए । ‘किसानकै कुरो सुन्दा अबको डेढ सातापछि धान बालीका लागि युरिया मलको आवश्यकता छैन,’ उनले भने, ‘तर, किसानको माग आएमा वितरण गर्न कुनै समस्या हुने छैन ।’ उनका अनुसार चीनबाट आएको मल गहुँ बालीका लागि भने काम लाग्नेछ । उक्त मल मध्ये १० देखि १२ हजार मेटन वीरगन्ज र बाकी बिराटनगर तथा भैरहवा प्रादेशिक कार्यालयले पाउने सम्भावना रहेको उनले बताए । ‘अहिले तालिका आइसकेको छैन,’ केसीले भने, ‘तर विगतको अभ्यास र मागअनुसार केन्द्रले यसरी नै मल उपलब्ध गराउने सम्भावना छ ।’

यस वर्ष मलको मौज्दात भदौ २५ गते सकिएको उनले बताए । भदौमा मात्र पर्सामा ३ हजार ५ सय १२ मेटन युरिया, १ हजार ३८ मेटन डीएपी र ६५ मेटन पोटास मल विभिन्न सहकारीमार्फत बिक्रीवितरण भएको उनको भनाइ छ । किसान संघ पर्साका अध्यक्ष असर्फी साह हाल युरिया मलको अत्यधिक माग रहेको बेला मल नपाउने र माग सक्किएपछि मात्र मल आउने भएपछि त्यसको किसानलाई कुनै उपयोग नहुने बताए । उनले झन्डै एक महिनादेखि नै जिल्लामा युरिया मलको हाहाकार रहेको बताए ।