सप्तरीमा डुबेर थप एक बालिकाको ज्यान गयो- प्रदेश २ - कान्तिपुर समाचार

सप्तरीमा डुबेर थप एक बालिकाको ज्यान गयो

अवधेशकुमार झा

राजविराज — सप्तरीमा बुधबार थप एक जना बालिकाको पोखरीमा डुबेर मृत्यु भएको छ । मंगलबार मात्र जिल्लामा ३ जनाको डुबेर मृत्यु भएको थियो । 

बुधबार दिउँसो महदेवा गाउँपालिका २ अकवरपुरका रामचरित्र मण्डलकी ५ वर्षीया छोरी शिवानीको घर नजिकै रहेको पोखरीमा डुबेर मृत्यु भएको प्रहरीले जनाएको छ । पोखरीमा नुहाउने क्रममा शिवानी डुबेपछि आफन्तले शव निकालेका थिए । त्यसपछि गएको प्रहरी टोलीले शव पोस्टमार्टमका लागि गजेन्द्रनारायण सिंह अस्पताल राजविराज ल्याएको छ ।

मंगलबार खडग नगरपालिका ८ मुसहरनियामा रहेको पोखरीमा डुबेर स्थानीय ३ वर्षीया एलिजाकुमारी चौधरी, महदेवा गाउँपालिका ४ परसाही टोलस्थित सार्वजनिक पोखरीमा स्थानीय ३० वर्षीय लक्षनकुमारी सदा र तिलाठी कोईलाडी गाउँपालिका २ लौनियाका १२ वर्षीय सवाना खातुनको स्थानीय नहरमा डुबेर मृत्यु भएको थियो ।

पछिल्लो समय सप्तरीमा पोखरी, नहर, पानी जमेको खाल्टो लगायतका स्थानमा डुबी मृत्यु हुनेको संख्या बढ्दै गएको छ । गत आर्थिक वर्ष ०७७/७८ मा जिल्लामा २१ जनाको डुबेर मृत्यु भएको थियो । २१ जनामा काखे बालकदेखि ८२ वर्षीया वृद्धसमेत रहेको प्रहरी तथ्यांकले देखाएको छ । एक वर्षको अधधिमा मृत्यु भएका २१ जनामध्ये १३ जना १७ वर्ष मुनिका छन् ।


प्रकाशित : आश्विन ६, २०७८ १५:५३
प्रतिक्रिया
पठाउनुहोस्

जग्गा विवादमा हत्या

पर्वत पोर्तेल

काँकडभिट्टा — देवरसँगको जग्गा विवादका कारण एक महिलाको हत्यामा संलग्‍न चार जनालाई प्रहरीले पक्राउ गरेको छ । जिल्ला प्रहरी कार्यालय झापाले बुधबार पत्रकार सम्मेलनमार्फत आरोपीलाई सार्वजनिक गरेको हो ।

झापा गाउँपालिका-१ माइती घर भई भारत विहारको किसनगञ्ज जिल्ला सिंघीमारी ग्राम पञ्चायत बस्ने करिब ५० वर्षीया डोली भन्ने धोन्नी टुडुको हत्यामा संलग्न भएको आरोपमा मृतकको भान्जा किसनगञ्ज जिल्ला सिंघीमारी ग्राम पञ्चायत बस्ने २३ वर्षीय ऐतवार सोरेन, मृतकको सौताको छोरो झापा गाउँपालिका-१ बस्ने ३७ वर्षीय लखन टुडु सतार, सोही स्थान बस्ने ५६ वर्षीय सिरी साइला भन्ने सोमाई हेमरम सतार र सोही स्थान बस्ने २७ वर्षीय हेमरम सतारलाई प्रहरीले पक्राउ गरेको हो ।

गत भदौ २४ गते राति धोन्नी टुडुको माईखोला किनारमा धारिलो हतियारको प्रयोगबाट हत्या भएको प्रहरीले जनाएको छ । हत्या भएको भोलिपल्ट आधा शरीरसहितको शव फेला पारेको थियो । हत्याका मुख्य योजनाकार भनिएका मृतकका देबर किसनगञ्ज जिल्ला सिंघीमारी ग्राम पञ्चायत बस्ने ४५ वर्षीय हेमरम मण्डल (सतार) भने फरार छन् । उनकै योजना अनुसार महिलाको हत्या भएको प्रहरीले जनाएको छ ।

प्रहरीको प्रारम्भिक अनुसन्धान अनुसार मृतकका छोराछोरी कोही छैनन् । उनको हत्या भएको १५ दिनअघि मात्रै पतिको मृत्यु भएको थियो ।‘हत्याको मुख्य कारण चाहीँ देवरसँगको जग्गा विवाद देखिन्छ, ’ जिल्ला प्रहरी कार्यालय झापाका एसपी सानुराम भट्टराईले भने ।

प्रकाशित : आश्विन ६, २०७८ १५:५०
पूरा पढ्नुहोस्
प्रतिक्रिया
पठाउनुहोस्
×