मध्यरातमा पेस्तोल देखाएर लुटपाट

मत्सरीका सरोजानन्द झाको घरमा डाँका समूहले डेढ महिनाको शिशुको टाउकोमा पेस्तोल राखेर झण्डै एक घण्टासम्म बसेर नगद, सुन–चाँदीका गरगहना लुटेको पीडित मुकेश झाले बताए । मुकेश सरोजानन्दका माईला छोरा हुन् । मास्क लगाएर आएका हतियार समूहले मध्यरातमा झाको घरबाहिरबाट भर्‍याङ लगाएर भित्र पसेका थिए ।

पीडित मुकेशका अनुसार उक्त समूहले बुबाआमा सुतेको कोठालाई बाहिरबाट लक गरेका थिए । त्यसपछि भाउजुको कोठा खोलेर डेढ महिनाको बच्चाको टाउकोमा पेस्तोल राखेर दराज फुटाई बहुमूल्य समान लगेका थिए । सानो बच्चाको कन्चटमा पेस्तोल राखेपछि घरमूली लगायतका मानिस चुप बसे । केही बेरपछि झ्यालबाट गुहार मागेका थिए । छिमेकीहरु होहल्ला गर्नासाथ हतियारधारी समूह पछाडिको ढोकाबाट भाग्न सफल भयो । नजिक रहेको इलाका प्रहरी कार्यालय मत्सरीलेसमेत लुटपाटको पत्तो पाएन । जिल्ला प्रहरी कार्यालय गौरका डिएसपी नारायणप्रसाद चिमोरियाले इलाकाको गस्ती टोली राति मत्सरी बजार क्षेत्रमा खटेको बताए ।

चोकबाट केहीभित्र घर भएकाले प्रहरीले चाल पाएन । बिहान घटनास्थल पुगेका डिएसपी चिमिरयाले सुक्ष्म तवरबाट अनुसन्धान भइरहेको र लुटपाटमा संलग्न चाँडै पक्राउ पर्ने बताए । प्रहरीका अनुसार हतियारधारी समूहले नगद,गरगहना गरी ४ लाख ६५ हजारको लुटेको छ । तर पीडित परिवारले १० लाख बढीको दाबी गरेका छन् ।