पर्सामा ५५ दिनपछि कोरोना संक्रमितको मृत्यु- प्रदेश २ - कान्तिपुर समाचार

पर्सामा ५५ दिनपछि कोरोना संक्रमितको मृत्यु

शंकर आचार्य

पर्सा — पर्सामा ५५ दिनपछि एक जना कोरोना संक्रमितको मृत्यु भएको छ । नारायणी अस्पतालमा उपचाररत पर्साको पोखरिया नगरपालिका–१ निवासी ३३ वर्षीय पुरुषको बिहीबार बिहान १ बजेर ४५ मिनेटमा मृत्यु भएको हो । उनी भदौ १० गते अस्पतालमा उपचारार्थ भर्ना भएका थिए । त्यसै दिन गरिएको पीसीआर परीक्षणमा उनमा कोरोना पोजेटिभ देखिएको थियो ।

नारायणी अस्पतालका कोभिड संयोजक डा. उदयनारायण सिंहले असार २६ पछि अस्पतालमा कोरोना संक्रमणबाट मृत्युको यो घटना भएको बताए । मृतकसहित अस्पतालमा ३ जना कोरोना संक्रमित बिरामी उपचारार्थ भर्ना रहेको उनले बताए । अब सर्लाहीका एक जना र पर्साका एक जना गरी दुई जना संक्रमित मात्र उपचारार्थ भर्ना रहेको उनले बताए ।

डा. सिंहका अनुसार बिहीबार मृत्यु भएका युवक अस्पताल भर्ना हुनुभन्दा केही दिनअघि मात्र काठमाडौंबाट घर आएका थिए । भर्ना रहेका अन्य संक्रमितको परिवारका सदस्यको काठमाडौंसँग जोडिएको ‘ट्राभल हिस्ट्री’ रहेको उनले बताए । ‘भर्ना भएका ३ जनामध्ये कोही आफै काठमाडौंबाट फर्किएको र कोहीको परिवारका सदस्य हालै रुघाखोकी, ज्वरो आदि बिरामी भएर काठमाडौंबाट फर्किएको अवस्था छ, यसले वीरगन्ज वा तराई क्षेत्रभन्दा हाल काठमाडौंमै कोरोना संक्रमण तीव्र रुपमा फैलिएको संकेत गर्छ,’ उनले भने, ‘वीरगन्जमा भने सुरुवाती स्तरको संक्रमणको संकेत देखिएको छ ।’

प्रकाशित : भाद्र १७, २०७८ १६:०७
प्रतिक्रिया
पठाउनुहोस्

नेकपा (एस) प्रदेश २ को पक्षमा सनाखत गर्ने भनिएका दुई सांसद एमाले बैठकमा 

सन्तोष सिंह

धनुषा — नेकपा (एकीकृत समाजवादी) प्रदेश २ को पक्षमा सनाखत गर्ने सूचीमा रहेका २ जना सांसद एमालेको प्रदेश कमिटी बैठकमा सहभागी भएका छन् । खराब मौसमका कारण सनाखतका लागि प्रदेश निर्वाचन कार्यालय जनकपुरमा आउन नसकेको बताइएका प्रदेश सांसद सुन्दर विश्वकर्मा र सीता गुरुङ वीरगन्जमा एमालेले आयोजना गरेको प्रदेश कमिटी  बैठकमा सहभागी भएका छन् ।

सांसद विश्वकर्मा र गुरुङ पार्टीको विवाद सुरु भएदेखि कुन पक्षमा लाग्नेबारे खुलेका थिएनन् । यसअघि एमालेको माधव नेपाल समूहले प्रदेशसभामा सचेतक राख्ने भएपछि नेपालतिर लागेका थिए । बैठकमा सहभागी एमालेका जातीय मुक्ति समाजका केन्द्रीय सदस्य सन्त परियारले सांसद विश्वकर्मा र गुरुङ उपस्थित भएको पुष्टि गरे ।

प्रकाशित : भाद्र १७, २०७८ १५:३२
पूरा पढ्नुहोस्
प्रतिक्रिया
पठाउनुहोस्
×