२० महिलालाई तालिम

सप्तरीको राजविराज नगरपालिका–१ चनौराकी पवनीदेवी राजमिस्त्री हुन् । पहिले उनी इँटा, गिट्टी, बालुवा र सिमेन्ट उठाउने लेबरको काम गर्थिन् । ‘लेबरको काम गर्दा दैनिक ६ सय रुपैयाँ कमाइ हुन्थ्यो ।

अहिले सीप सिकेर मिस्त्री बनेको छु,’ उनले भनिन्, ‘दैनिक एक हजार रुपैयाँ कमाइ हुन्छ । घरको कमाइ पनि दोब्बर भएको छ ।’ १५ वर्षअघि विवाह गरेकी उनका १ छोरा र ३ छोरी छन् । जेठी छोरी १० कक्षामा पढ्छिन् । ‘पहिले छोराछोरीको पढाइमा पैसा नपुग्दा ऋण लिनुपर्थ्यो,’ उनले भनिन्, ‘मिस्त्री भएर कमाउन थालेपछि ऋण लिनुपरेको छैन ।’

पवनीदेवीकी छिमेकी उषादेवी रामको दैनिकी पनि एक महिनायता फेरिएको छ । इलेक्ट्रिसियन काम गर्ने उनका पति शिवनारायणको कमाइबाट परिवार चल्दै आएको थियो । तर सीप सिकेर मिस्त्री भएपछि उषादेवीले पनि दैनिक एक हजार रुपैयाँ कमाउन थालेकी छन् । उनीहरूजस्तै राजविराज–१ चनौराका चमार समुदायका २० महिलाले राजमिस्त्रीको सीप सिकेका हुन् । सीपसँगै उनीहरूको जीवनस्तर पनि परिवर्तन हुन थालेको छ । साथै आर्थिक रूपमा समेत सक्षम बन्दै गएका छन् ।

संघीय सरकारको उद्योग, वाणिज्य तथा आपूर्ति मन्त्रालयअन्तर्गतको ग्रामीण उद्यम तथा विप्रेषण आयोजना (समृद्धि) मार्फत उनीहरूले तालिम पाएका हुन् । उनीहरूलाई ६५ दिनको तालिम दिइएको हो । आयोजनाका अनुगमन अधिकृत रोशन दर्नालले महिलाहरू घर बनाउन सक्षम भएको बताए । अब स्थानीय ठेकेदारसँग समन्वय गरेर उनीहरूको रोजगारीलाई दिगो बनाइने उनको भनाइ छ ।