औषधि खरिदमा ‘हिनामिना’- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

औषधि खरिदमा ‘हिनामिना’

अवधेशकुमार झा

सप्तरी — सप्तरीको तिरहुत गाउँपालिकाअन्तर्गत रहेका स्वास्थ्य चौकीहरूमा सामान्य प्रकृतिका औषधि समेत छैनन् । पालिकाले आर्थिक वर्ष २०७७/७८ मा खरिद गरेको औषधि भने थन्किएको छ । गाउँपालिकाले गुणस्तरहीन खरिद गर्दा प्रयोग हुन नसकेको हो ।

गाउँपालिका अध्यक्ष हेमन्तकुमार बहरखेर र प्रमुख प्रशासकीय अधिकृत रेणुका साहबीचको विवादले गत आर्थिक वर्षको अन्त्यमा विकास कामका भुक्तानीसमेत रोकिएको बेला औषधि खरिदमा अनियमितता भएको पाइएको छ । गाउँपालिकाले गत आर्थिक वर्षमा १८ लाख रुपैयाँ बराबरको औषधि खरिदको टेन्डर गरेको थियो । सिरहाको एक स्थानीय पत्रिकामा टेन्डर छापेर कोष तथा लेखा नियन्त्रण कार्यालय, जिल्ला प्रशासन कार्यालयसहितका नियामक निकायका प्रतिनिधिसमेत नराखी प्रमुख प्रशासकीय अधिकृत साहले टेन्डर स्वीकृत गरेकी थिइन् ।

तर टेन्डर कबोलकर्ताले गाउँपालिकामा पठाएको औषधि गुणस्तरहीन हुँदा स्टोरमा थन्काइएको छ । गुणस्तरहीन र कम दिए पनि पालिकाले असारको अन्तमा उक्त सप्लायर्सलाई १० लाख र ८ लाख गरी २ वटा चेकसमेत दिएको पालिका स्रोतले बतायो । तीमध्ये एउटा चेक साटिएको र अर्कोमा विवरण सच्याउनुपर्ने भएकाले अझै साटिएको छैन । प्रमुख प्रशासकीय अधिकृत साहले औषधि खरिदमा अनियमितता भएको स्वीकारिन् । टेन्डर स्वीकृत गर्दा नियामक निकायका प्रतिनिधि आए/नआएको विषयमा आफूलाई थाहा नभएको उनको भनाइ छ । ‘स्टोरको औषधि गुणस्तरहीन र कम छ । हामीले वितरण गरेका छैनौ । बैकमा भुक्तानी नदिनसमेत आग्रह गरिसकेका छौं,’ साहले भने ।

गाउँपालिकासम्बन्धी टेन्डरको कागजात नै भेटिने गरेको छैन । प्रमुख प्रशासकीय अधिकृत साहले उक्त टेन्डरको फाइलहरू तथा स्टोरको चाभी स्वास्थ्य शाखाका कर्मचारीसँग रहेको बताए । तर उक्त फाइल र टेन्डरबारे बुझन कार्यालय पुग्दा कर्मचारीहरू विभिन्न बहानामा अन्यत्र जाने गरेका छन् ।

‘यस्तो महामारीका बेला जनतालाई दिन स्वास्थ्य चौकीमा औषधि छैन । तर औषधिको नाममा लाखौं लाखको खेल भइरहेको छ,’ स्थानीय ज्ञानेन्द्रकुमार लगरवारले भने, ‘आर्थिक वर्ष सकिन लाग्दा खरिद गर्नु, गुणस्तर नै जाँच नगरी र परिमाण नै नहेरी भुक्तानी दिनुले बदनियत देखिन्छ ।’

प्रकाशित : श्रावण १४, २०७८ १३:०२
प्रतिक्रिया
पठाउनुहोस्

कोसीको कनेक्टिङ बाँधमा कटान

बाँध भत्के ३ सयभन्दा बढी परिवार विस्थापित हुने जोखिम
अवधेशकुमार झा

सप्तरी — कोसी नदीको पश्चिमी तटबन्धअन्तर्गत सप्तरीको हनुमाननगर कंकालिनी नगरपालिका–१४ मा रहेको कनेक्टिङ बाँध भत्किने जोखिम बढेको छ । शुक्रबारदेखि डलवास्थित कनेक्टिङ बाँधमा कटान हुन थालेपछि भत्किने खतरा बढेको हो ।

सप्तरीको हनुमाननगर कंकालिनी–१४ डलवास्थित कोसीको कनेक्टिङ बाँधमा कटान रोक्न राखिएको बोरा र बाँस ।

उक्त कनेक्टिङ बाँध भत्के तत्कालै ३ सयभन्दा बढी परिवार विस्थापित हुनेछन् भने मूल पश्चिमी तटबन्धलाई समेत क्षति गर्दै बाढी बस्तीतर्फ पस्ने खतरा छ । हनुमाननगर कंकालिनी–१४ का धिरेन्द्रकुमार यादवले विगतमा पानीसमेत नजाने स्थानमा यस वर्ष कटान हुन थालेको बताए । तर, कोसी योजनाका अधिकारी र ठेकेदारले कटानबारे ध्यान नदिएको उनले गुनासो गरे ।

‘यहाँ कनेक्टिङ बाँध भत्कियो भने हाम्रो बस्तीका ३ सय घर त तत्कालै विस्थापित हुन्छन् । मूल बाँधमा समेत क्षति पुर्‍याएर कैयौं बस्तीको उठीबास हुन्छ,’ उनले भने, ‘कनेक्टिङ बाँध भत्किने डरले दुई दिनयता सुत्न पाएका छैनौं ।’ अर्का स्थानीय युसुफ मियाँले कटान नियन्त्रणका नाममा टालटुल मात्र भइरहेको आरोप लगाए । ‘जतिबेला ध्यान दिनुपर्ने हो त्यतिबेला कोसी योजनाका अधिकारी र भारतीय ठेकेदारहरू ध्यान दिँदैनन् । गाउँलेहरूले पटकपटक भन्दा मान्दैनन् तर अहिले कटान हुँदा टालटुल गर्न सुरु गरेका छन्,’ उनले भने ।

कोसी योजनाका ठेकेदारले शनिबार साँझदेखि बाँस हाल्नुका साथै बालुवाको बोरा राखेर कटान भइरहेको बाँध मर्मत थालेका छन् । आइतबार नेपाल प्रहरी र सशस्त्र प्रहरीका अधिकारीहरूले कटान भइरहेको स्थलमा पुगेर जानकारी लिएका छन् । भारतीय पक्षले तत्काल मर्मत गरिरहे पनि दीर्घकालीन रूपमा काम नभए खतरा हुन सक्ने जिल्लाका सशस्त्र प्रहरी उपरीक्षक राजु श्रेष्ठले बताए । ‘अहिले बाढीले हानिरहेको स्थानबाट उत्तरतिर च्यानल खनेर पानीको चाप कम गर्नुपर्ने सुझाव दिएका छौं,’ श्रेष्ठले भने ।

कटानस्थलमा पुगेका पूर्वसिँचाइ मन्त्री उमेश यादवले कटानका कारण स्थिति खतरापूर्ण बनेको बताए । ‘हल्का ढंगबाट लिइए ठूलो क्षति हुन सक्छ,’ पूर्वमन्त्री यादवले भने, ‘तीनै तहका सरकार गम्भीर बन्नुपर्छ । मर्मत र निर्माणको जिम्मा लिएको भारतीय पक्ष पनि तत्काल कटान रोक्न र दीर्घकालीन रूपमा तटबन्ध बलियो गर्नेतर्फ लाग्नुपर्छ ।’

प्रकाशित : श्रावण ११, २०७८ १४:१८
पूरा पढ्नुहोस्
प्रतिक्रिया
पठाउनुहोस्
×