कोसीको कनेक्टिङ बाँधमा कटान- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

कोसीको कनेक्टिङ बाँधमा कटान

बाँध भत्के ३ सयभन्दा बढी परिवार विस्थापित हुने जोखिम
अवधेशकुमार झा

सप्तरी — कोसी नदीको पश्चिमी तटबन्धअन्तर्गत सप्तरीको हनुमाननगर कंकालिनी नगरपालिका–१४ मा रहेको कनेक्टिङ बाँध भत्किने जोखिम बढेको छ । शुक्रबारदेखि डलवास्थित कनेक्टिङ बाँधमा कटान हुन थालेपछि भत्किने खतरा बढेको हो ।

सप्तरीको हनुमाननगर कंकालिनी–१४ डलवास्थित कोसीको कनेक्टिङ बाँधमा कटान रोक्न राखिएको बोरा र बाँस ।

उक्त कनेक्टिङ बाँध भत्के तत्कालै ३ सयभन्दा बढी परिवार विस्थापित हुनेछन् भने मूल पश्चिमी तटबन्धलाई समेत क्षति गर्दै बाढी बस्तीतर्फ पस्ने खतरा छ । हनुमाननगर कंकालिनी–१४ का धिरेन्द्रकुमार यादवले विगतमा पानीसमेत नजाने स्थानमा यस वर्ष कटान हुन थालेको बताए । तर, कोसी योजनाका अधिकारी र ठेकेदारले कटानबारे ध्यान नदिएको उनले गुनासो गरे ।

‘यहाँ कनेक्टिङ बाँध भत्कियो भने हाम्रो बस्तीका ३ सय घर त तत्कालै विस्थापित हुन्छन् । मूल बाँधमा समेत क्षति पुर्‍याएर कैयौं बस्तीको उठीबास हुन्छ,’ उनले भने, ‘कनेक्टिङ बाँध भत्किने डरले दुई दिनयता सुत्न पाएका छैनौं ।’ अर्का स्थानीय युसुफ मियाँले कटान नियन्त्रणका नाममा टालटुल मात्र भइरहेको आरोप लगाए । ‘जतिबेला ध्यान दिनुपर्ने हो त्यतिबेला कोसी योजनाका अधिकारी र भारतीय ठेकेदारहरू ध्यान दिँदैनन् । गाउँलेहरूले पटकपटक भन्दा मान्दैनन् तर अहिले कटान हुँदा टालटुल गर्न सुरु गरेका छन्,’ उनले भने ।

कोसी योजनाका ठेकेदारले शनिबार साँझदेखि बाँस हाल्नुका साथै बालुवाको बोरा राखेर कटान भइरहेको बाँध मर्मत थालेका छन् । आइतबार नेपाल प्रहरी र सशस्त्र प्रहरीका अधिकारीहरूले कटान भइरहेको स्थलमा पुगेर जानकारी लिएका छन् । भारतीय पक्षले तत्काल मर्मत गरिरहे पनि दीर्घकालीन रूपमा काम नभए खतरा हुन सक्ने जिल्लाका सशस्त्र प्रहरी उपरीक्षक राजु श्रेष्ठले बताए । ‘अहिले बाढीले हानिरहेको स्थानबाट उत्तरतिर च्यानल खनेर पानीको चाप कम गर्नुपर्ने सुझाव दिएका छौं,’ श्रेष्ठले भने ।

कटानस्थलमा पुगेका पूर्वसिँचाइ मन्त्री उमेश यादवले कटानका कारण स्थिति खतरापूर्ण बनेको बताए । ‘हल्का ढंगबाट लिइए ठूलो क्षति हुन सक्छ,’ पूर्वमन्त्री यादवले भने, ‘तीनै तहका सरकार गम्भीर बन्नुपर्छ । मर्मत र निर्माणको जिम्मा लिएको भारतीय पक्ष पनि तत्काल कटान रोक्न र दीर्घकालीन रूपमा तटबन्ध बलियो गर्नेतर्फ लाग्नुपर्छ ।’

प्रकाशित : श्रावण ११, २०७८ १४:१८
प्रतिक्रिया
पठाउनुहोस्

एकै जिल्लामा ६ अर्ब १५ करोड फ्रिज

छिन्नमस्ता गाउँपालिकामा पुँजीगत खर्च शून्य
अवधेशकुमार झा

राजविराज — गत आर्थिक वर्षमा सप्तरीका लागि आएको बजेटको ठूलो हिस्सा खर्च हुन सकेन । संघीय, प्रदेश र स्थानीय तहसमेतको गरी जिल्लामा ६ अर्ब १५ करोड रुपैयाँ खर्च हुन नसकेको हो ।

कोष तथा लेखा नियन्त्रण कार्यालय राजविराजका प्रमुख मनोज साहका अनुसार संघ र प्रदेशतर्फको बजेटमध्ये ३ अर्ब १९ करोड ८३ लाख ९१ हजार र स्थानीय तहतर्फ २ अर्ब ९५ करोड १६ लाख ५५ हजार रुपैयाँ खर्च हुन सकेको छैन । संघीय सरकारबाट चालुतर्फ १० अर्ब ७० करोड ३७ लाख बजेट आएकोमा त्यसको ९५ प्रतिशत १० अर्ब १६ करोड ८१ लाख ६० हजार खर्च भएको छ । संघीय सरकारको कुल बजेटमध्ये चालुतर्फकै ५३ करोड ५५ लाख ४९ हजार खर्च हुन नसकेको हो ।

संघीय सरकारअन्तर्गत नै पुँजीगततर्फ ४५ प्रतिशत रकम मात्र खर्च भएको छ । पुँजीगततर्फ ४ अर्ब २२ करोड ६० लाख रुपैयाँ बजेट विनियोजन गरिएकोमा १ अर्ब ८९ करोड ७५ लाख ६८ हजार रुपैयाँ मात्र खर्च भएको कोष तथा लेखा नियन्त्रण कार्यालय प्रमुख साहले बताए । संघको पुँजीगततर्फ २ अर्ब ३२ करोड ८४ लाख ३१ हजार रुपैयाँ खर्च हुन सकेन । पुँजीगततर्फ खर्च हुन नसकेको रकममध्ये सबैभन्दा बढी महेन्द्र राजमार्गअन्तर्गत कञ्चनपुर–कमला सडक योजना पूर्वी खण्डको बजेट बढी हो । उक्त योजनाका लागि १ अर्ब ९८ करोड रुपैयाँ छुट्याएकोमा २२ दशमलव ७७ प्रतिशत ४५ करोड १२ लाख रुपैयाँ मात्र खर्च भएको छ ।

यसैगरी प्रदेश सरकारअन्तर्गत बजेटमा चालुतर्फ ७४ करोड ८५ लाख बजेट विनियोजन गरिएकोमा ६९ करोड ६५ लाख ७१ हजार रुपैयाँ खर्च भएको छ । ९४.६ प्रतिशत खर्च भएकोमा ५ करोड १९ लाख २८ हजार रुपैयाँ खर्च हुन नसकेको हो । यस्तै प्रदेश सरकारकै पुँजीगततर्फ ७४ दशमलव ४७ प्रतिशत बजेट मात्र खर्च भएको छ । कोलेनिका प्रमुख साहका अनुसार प्रदेश सरकारबाट सप्तरीमा पुँजीगततर्फ १ अर्ब १० करोड ६४ लाख बजेट रहेकोमा ८२ करोड ३९ लाख ५८ हजार रुपैयाँ मात्र खर्च भएको छ । २८ करोड २४ लाख ८२ हजार रुपैयाँ प्रदेशअन्तर्गत पुँजीगततर्फ खर्च हुन नसकेको हो ।

गत आवमा सप्तरीका १८ वटै स्थानीय तहमा गरी १० अर्ब ४४ करोड ८० लाख बजेट विनियोजित थियो, जसमध्ये चालुतर्फ ६ अर्ब ६७ करोड ८९ लाख बजेट रहेकोमा ५ अर्ब ७ करोड ४ लाख रुपैयाँ खर्च भएको छ । स्थानीय तहले चालुतर्फ ७६ प्रतिशत बजेट खर्च गरेका छन् । १ अर्ब ६० करोड ८५ लाख रुपैयाँ खर्च गर्न सकेनन् । पुँजीगततर्फ स्थानीय तहहरूले ३ अर्ब ७६ करोड ८९ लाख ७५ हजार रुपैयाँ बजेटमध्ये २ अर्ब ४२ करोड ५९ लाख ४१ हजार मात्र खर्च गरेका छन् । पुँजीगततर्फको ३५ प्रतिशत बजेट अर्थात् १ अर्ब ३४ करोड ३० लाख ३४ हजार रुपैयाँ जिल्लाका स्थानीय तहले खर्च गर्न सकेनन् ।

गत आर्थिक वर्षकै गाउँसभा गर्न नसकेको छिन्नमस्ता गाउँपालिकाले एक रुपैयाँ पनि पुँजीगत खर्च गर्न सकेन । कोष तथा लेखा नियन्त्रण कार्यालय प्रमुख साहका अनुसार गत आर्थिक वर्षमा छिन्नमस्ता गाउँपालिकाको कुल बजेट ५१ करोड ३७ लाख ७ हजार रहेकोमा १७ दशमलव ९७ प्रतिशत मात्र खर्च भएको छ ।

उक्त खर्च सबै चालुतर्फ तलब भत्तामा खर्चिएको हो । उक्त पालिकाले कुल बजेटमध्ये ९ करोड ३३ लाख १४ हजार रुपैयाँ मात्र खर्च गर्न सकेको छ । जनप्रतिनिधिबीचको विवाद, प्रमुख प्रशासकीय अधिकृत नहुनु, गाउँसभा समयमा गर्न नसक्नुका कारणले गाउँपालिकाले बजेट खर्च गर्न नसकेको हो ।

प्रकाशित : श्रावण १०, २०७८ ०९:३२
पूरा पढ्नुहोस्
प्रतिक्रिया
पठाउनुहोस्
×