खोलाले बगाएर मृत्यु - प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

खोलाले बगाएर मृत्यु 

कान्तिपुर संवाददाता

बारा — तियर खोलाको बाढीले बगाएका वृद्धको शव बुधबार फेला परेको छ । करैयामाई गाउँपालिका–८ ईटहर गाउँ छेउको खोलाले स्थानीय ७७ वर्षीय मिश्रीलाल राउत कुर्मीलाई बगाएको वडाध्यक्ष सुरेन्द्रप्रसाद साहले बताए । उनका अनुसार कुर्मी गोठालो गएका बेला बाढीमा परेका थिए । 

मंगलबार बेलुकादेखि नै बृद्धको खोजी भइरहे पनि उनको शव १० किमि दक्षिण सुवर्ण गाउँपालिका–३ चरमोहना गाउँ छेउको सोही खोलामा फेला परेको हो ।

जिल्ला प्रहरी कार्यालयका प्रवक्ता प्रहरी नायब उपरीक्षक गौतम मिश्रले भने दसगजासित जोडिएको चरमोहना गाउँतर्फ बगेको सोही खोलामा कुर्मीको शव भेटिएको बताए । उनका अनुसार पहिले माझीले उनको शव फेला पारेका हुन् ।

प्रकाशित : श्रावण ६, २०७८ १९:२७
प्रतिक्रिया
पठाउनुहोस्

प्रधानमन्त्री देउवा र चन्दबीच भेटवार्ता

कान्तिपुर संवाददाता

काठमाडौँ — प्रधानमन्त्री शेरबहादुर देउवा र नेकपा (चन्द समूह) बीच छलफल भएको छ । बुधबार दिउँसो प्रधानमन्त्रीको सरकारी निवास बालुवाटारमा दुई पक्षबीच ओली सरकारसँगको ३ बुँदे सहमति कार्यान्वयन र नेकपाका नेता/कार्यकर्ताको रिहाईबारे छलफल भएको हो ।  

देशको राजनीतिक समस्या विषयमा बहस गर्दै जाने विषयमा छलफल भएको भन्दै चन्द समूहका नेता खड्गबहादुर विश्वकर्माले भने,'सरकार ३ बुँदे सहमतिको कार्यान्वयनमा सकारात्मक । भेटवार्ता प्रभावकारी र महत्वपूर्ण ।'

तत्कालीन प्रधानमन्त्री केपी ओलीको पालामा गत फागुन २० गते चन्द समूह र सरकारबीच ३ बुँदे सहमति भएको थियो । उक्त सहमतिपछि नेकपा महासचिव नेत्रविक्रम चन्द खुला राजनीतिमा आएका हुन् ।

बालुवाटारमा भएको भेटमा प्रधानमन्त्री देउवा, गृहमन्त्री बालकृष्ण खाँण, नेकपा महासचिव चन्द, नेताहरु विश्ककर्मा, धर्मेन्द्र बास्तोलालगायत सहभागी थिए ।

चन्द समूहका नेताहरुले यसअघि लगातारजस्तै सत्तारुढ नेकपा (माओवादी केन्द्र) का अध्यक्ष पुष्पकमल दाहाल, नेकपा (एमाले)का वरिष्ठ नेता माधवकुमार नेपाल, जनता समाजवादी पार्टी (जसपा) संघीय परिषद् अध्यक्ष बाबुराम भट्टराई, नेकपा (क्रान्तिकारी माओवादी) का महासचिव मोहन वैद्य लगायतसँग भेटवार्ता गरेका थिए । ती भेटमा ३ बुँदे सहमति कार्यान्वयन र मोर्चा गठनबारे कुराकानी भएको थियो ।

प्रकाशित : श्रावण ६, २०७८ १९:१४
पूरा पढ्नुहोस्
प्रतिक्रिया
पठाउनुहोस्
×