बाँध भत्काएर खेतमा पस्यो कमलाको बाढी- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

बाँध भत्काएर खेतमा पस्यो कमलाको बाढी

सन्तोष सिंह

धनुषा — कमला नदीको बाढीले धान खेत कटान गर्न थालेको छ । धनुषातर्फको बाँध कटान गरी बाढी खेतमा पसेको हो ।  किरतपुरनजिकको बाँध बचाउने प्रयास हुँदाहुँदै बाढीले क्षति पुर्‍याएको कमला नदी नियन्त्रण आयोजना कार्यालय जनकपुरका इन्जिनियर गुदरी यादवले बताए ।

कमला नदीको बाढी धनुषाका बस्तीहरूमा पस्ने जोखिम बढेपछि मंगलबार सबैला–१३ किरतपरमा कटान रोकथाम गरिँदै। तस्बिर : सन्तोष सिंह/कान्तिपुर

बाढीले बाँधको पूर्ण भाग भासिएर बगेको जिल्ला प्रहरी कार्यालय धनुषाका एसपी प्रकाश राणभाटले बताए । ‘नाइलनको जालीमा माटोको बोरा राखेर मंगलबार दिनभर बाँध बचाउन प्रयास गरे पनि राति बाढीले सबै बगाएको छ,’ उनले भने ।

अहिले कमलाको बाढी धान खेतमा पसेको पनि उनले बताए ।

सोमबार रातिदेखि सुरक्षाकर्मी परिचालन भए पनि बाढीले बाँध बगाएर खेत कटान गर्न थालेको सबैला नगरपालिका–१३ किरतपुरका श्यमसुन्दर महतोले बताए ।‘मंगलबार धेरै प्रयास गरिए पनि बाढीले बाँध बगाएको छ,’ महतोले भने, ‘बाँध बगेपछि बाढीले धान लगाइएको खेत कटान गर्दैछ । नदीमा पानीको सतह कम भएका कारण बस्तीमा कुनै क्षति भएको छैन ।’

कमला नदी नियन्त्रण आयोजना कार्यालय जनकपुरका प्रमुख एकराज भट्टराइले बाँध मर्मतका लागि स्रोत प्राप्त भएको र साधन परिचालन भइरहेको बताए ।


प्रकाशित : श्रावण ६, २०७८ १२:३४
प्रतिक्रिया
पठाउनुहोस्

सार्वजनिक यातायातमा मनपरी : लामो दूरीका यात्रुसँग १ हजार रुपैयाँसम्म बढी भाडा

भूषण यादव

वीरगन्ज — निषेधाज्ञा खुकुलिएसँगै लामो दूरीको सार्वजनिक यातायात चल्न थाले पनि यात्रुहरू तोकिएभन्दा बढी भाडा तिर्न बाध्य भएका छन् । व्यवसायीहरूले दूरीका आधारमा ४० रुपैयाँदेखि एक हजार रुपैयाँसम्म अतिरिक्त उठाउने गरेको पाइएको छ । 


बाराको पथलैयास्थित २ नम्बर प्रदेश ट्राफिक प्रहरी कार्यालयको पछिल्लो दुई दिनको तथ्यांकले यसलाई पुष्टि गर्छ । कार्यालयले दुई दिनयता ३० वटा सवारी साधनलाई कारबाही गरेको छ । ती सवारीका ४ सय ३२ यात्रुसँग लिइएको बढी भाडा फिर्ता गराइएको प्रदेश ट्राफिक प्रहरी कार्यालयले जनाएको छ ।

सोमबार गरिएको जाँचमा ११ वटा बस र १२ वटा टाटा सुमोलाई एक हजार रुपैयाँदेखि लिएर ५ हजार रुपैयाँसम्म जरिवाना गरिएको कार्यालयका सूचना अधिकृत प्रहरी नायब उपरीक्षक सन्तुलालप्रसाद जैसवारले जनाए । उनका अनुसार नवलपुर, निजगढ, गौर, वीरगन्ज, चपुर, बंकुल, मौलापुरलगायत सहरबाट काठमाडाँै जाने टाटा सुमोले यात्रुसँग ४० रुपैयाँदेखि १ हजार ६० रुपैयाँसम्म बढी भाडा लिएका थिए । यसै गरी काँकडभिट्टा, बहरथवा, गौर, पोखरिया, गडैता, रघुनाथपुर, गौशाला, मलंगवाबाट काठमाडौं जाने बसले यात्रुसँग ५ सय रुपैयाँसम्म बढी भाडा असुलेका थिए ।

डीएसपी जैसवारका अनुसार आइतबार पथलैयामा जाँच गर्दा बाराको कलैयाबाट पोखरा जाने ना७ख ११११ नम्बरको बसले २८ जना यात्रुसँग एक हजारको दरले बढी भाडा लिएको पाइएको थियो । त्यस्तै रौतहटको गौरबाट काठमाडौँ र पोखरा जाने बसहरूले ७ सय रुपैयाँ थप लिएका थिए । सर्लाहीको चक्रघटादेखि काठमाडौँ जाने ना७ख २७९० नम्बरको बसले प्रत्येक यात्रुसँग ८ सय रुपैयाँ बढी असुलेको थियो ।

‘आइतबार मात्र प्रहरीले १ सय ८३ जना यात्रुसँग असुलिएको १ लाख २४ हजार दुई सय रुपैयाँ फिर्ता गराएको थियो,’ जैसवारले भने, ‘बढी भाडा लिने यात्रुवाहक सवारी साधनलाई ५ हजार रुपैयाँसम्म जरिवाना गरिएको छ ।’

सार्वजनिक सवारी सञ्चालकले भने राजमार्गमा खटिएका प्रहरीले सवारी पास नभएकासँग ५ सयदेखि १ हजार ५ सय रुपैयाँसम्म असुल्ने गरेकाले यात्रुसँग बढी भाडा लिएको बताएका छन् । ‘लामो दूरीका सवारीसाधन एकबाट अर्को जिल्ला प्रवेश गर्दा राजमार्गका प्रहरीले प्रशासनको पास माग्ने गरेका छन्,’ वीरगन्जका एक बस व्यवसायी भन्छन्, ‘पास नहुनेले प्रत्येक चौकीमा ५ सयदेखि पन्ध्र सय रुपैयाँसम्म बुझाउन पर्छ ।’ सिमराबाट काठमाडौं पुग्दा एउटा बसले कम्तीमा ९ हजार र पोखरा पुग्दा ८ हजार रुपैयाँ अतिरिक्त खर्चिनुपरेको ती व्यवसायीले खुलाए ।

प्रहरी स्रोतका अनुसार राजमार्गमा खटिएका प्रहरीले सार्वजनिक सवारीसँग रकम असुलेको गुनासो बढेपछि प्रहरी प्रधान कार्यालयबाट उपरीक्षकको टोली आइतबार निरीक्षणमा आएको थियो । त्यस क्रममा पथलैया प्रहरी चौकीका प्रहरी जवानले अवैध रकम असुलेको पाइएपछि मंगलबार सम्पूर्ण टोली नै जिल्ला प्रहरी कार्यालय बारामा तानिएको छ ।

बाराका प्रहरी उपरीक्षक दीपेन्द्र शाही भने आवश्यकताअनुसार पथलैया प्रहरी चौकीको टोली परिवर्तन गरिएको दाबी गर्छन् । ‘आवश्यकताअनुसार जहाँसुकैको पनि चेन्ज गर्न सकिन्छ,’ उनले भने, ‘काठमाडाँैबाट कुनै टोली अनुगमनमा आएको हामीलाई जानकारी छैन ।’ बिना पास सञ्चालनमा आएका र यात्रुसँग बढी भाडा लिएका सवारी साधनलाई आफूहरूले पनि कारबाही गरेको उनले बताए ।

प्रकाशित : श्रावण ६, २०७८ १२:२९
पूरा पढ्नुहोस्
प्रतिक्रिया
पठाउनुहोस्
×