तालमा डुबेका युवकको शव फेला- प्रदेश २ - कान्तिपुर समाचार

तालमा डुबेका युवकको शव फेला

ओमप्रकाश ठाकुर

सर्लाही — सर्लाहीको वाग्मती नगरपालिका–१२ स्थित नवनिर्मित तालमा बेपत्ता भएका युवकको शव २६ घण्टापछि फेला परेको छ । हिलोमा गाडिएको अवस्थामा शव फेला परेको प्रहरीले जनाएको छ । शनिबार तालमा माछा मार्न गएका वाग्मती–१ का १८ वर्षीय सुशान्त थापा अपराह्न ४ बजेदेखि बेपत्ता भएका थिए । 

सर्लाहीको वाग्मती–१२ स्थित तालमा बेपत्ता युवकको खोजी गरिँदै । तस्बिर : ओमप्रकाश/कान्तिपुर


बेपत्ता युवक पत्ता लगाउन बाहिरबाट गोताखोरको टोलीसमेत बोलाइएको थियो । टोली नआइपुग्दै कम्प्रेसर मेशिनको सहयोगले युवकको शव फेला पारिएको जिल्लाका प्रहरी उपरीक्षक संतोष सिंह राठौरले जानकारी दिए । ‘निरन्तरको प्रयासमा पनि बेपत्ता युवकको खोजी गर्न समस्या भइरहेको थियो, हिलोमा खोज्ने सुरक्षाकर्मीलाई हम्मेहम्मे नै पर्‍यो,’ उनले भने । युवकको शव पोस्टमार्टम गरी आफन्तलाई जिम्मा लगाइने प्रहरी उपरीक्षक राठौरले बताए ।

युवकका दाजु हस्तबहादुरले ताल सुरक्षित नरहेकै कारण भाइ बेपत्ता भएको आरोप लगाए । अव्यवस्थित ताल भएका कारण यसको क्षतिपूर्ति नगरले बेहोर्नुपर्ने उनको माग छ । ‘ठूलो र गहिरो ताल सुरक्षित हुन जरुरी छ, सुरक्षित नभएकै कारणले यस्तो घटना भयो । भोलिका दिनमा यस्ता घटना नदोहोरिएला भन्न सकिन्न,’ उनले भने, ‘भाइको उद्धारका लागि तत्काल प्रयास पनि हुन सकेन, प्रयास गरेको भए यो घटना हुने थिएन ।’ छोराको खबरले बुबाआमा घरमै अर्धचेत अवस्थामा छन् । वाग्मती नगरपालिका–१ मिलन चोकका गोपालसिंह थापा र टीकाका कान्छा छोरा सुशान्त एसईई दिने तयारीमा थिए ।

नगरपालिकाले पर्यटक भित्र्याउने उद्देश्यले १ सय २१ बिघामा गहिरो ताल खनेको छ । निर्माणाधीन ताल रहेकाले यसको सुरक्षाको प्रबन्ध मिलाउन नसकिएको नगरले जनाएको छ । वैशाखमै ताल खन्ने काम सकिएपछि वाग्मती नदीको पानी हालिएको थियो । झन्डै डेढ महिना पानी हाले पनि एक दिन मुहान थुन्दा रातभरिमै सुकेको थियो । दोस्रोपटक बाढीको समयमा लेदो माटोसहितको पानी पसाउने योजनाअनुरूप तालमा पानी हाले पनि फेरि अधिकांश भाग सुकेको छ ।

नवनिर्मित तालमा अहिले आन्तरिक पर्यटक घुमफिरका लागि पुगिरहेका छन् । पानी कम भएसँगै स्थानीय माछा मार्न पनि आइरहेका छन् । तर अव्यवस्थित तालका कारण यसको तल्लो बस्ती जोखिममा छ । झन्डै दुई साताअघि वर्षाले तालको पानी निस्केर सागरनाथ वनको जग्गा कटान गरेको थियो । निकास नभएर बाटो र पुल पनि बगाएको थियो । स्थानीयको विरोधपछि नगरपालिकाले बाटोको मर्मत गरेको छ ।

प्रकाशित : श्रावण ४, २०७८ ०९:३०
प्रतिक्रिया
पठाउनुहोस्

डुबानले रोकियो रोपाइँ

तीन वर्षदेखि किसानले बाली लगाउन पाएनन्, बस्ती नै डुब्ने जोखिम
ओमप्रकाश ठाकुर

सर्लाही — सर्लाही मलंगवा नगरपालिका–५ भाँड्सरका अरुणकुमार यादवसँग डेढ बिघा खेतीयोग्य जग्गा छ । तर उनले तीन वर्षदेखि खेतमा धान रोपाइँ गर्न पाएका छैनन् । प्रत्येक वर्ष डुबानकै कारण उनले बाली लगाउन पाउँदैनन् । खेती किसानी पेसा भए पनि डुबान भएर आफ्नै खेतमा मिहिनेत गर्न नपाएको उनको गुनासो छ । रोपाइँ नभएर उब्जनी हुन नसकेपछि उनलाई चामल किनेर खानुपर्ने बाध्यता छ ।

सर्लाहीको मलंगवा नगरपालिका–५ भाड्सरमा जलमग्न खेत । तस्बिर : ओमप्रकाश/कान्तिपुर

मलंगवा नगरपालिका–५ भाड्सरमा सयौं बिघा खेतीयोग्य जग्गा यस वर्ष पनि डुबानमा परेको छ । गत वर्ष यो क्षेत्रमा लखन्देही खोलाको बाढी नै पसेको थियो । परार पनि डुबानकै कारण यस क्षेत्रमा रोपाइँ हुन सकेन । त्योभन्दा अगाडि वर्षाको समयमा सामान्य पानी पर्ने गरेकाले यादवले धान रोपाइँ गरेका थिए । ‘तीन वर्षदेखि खेत डुबानमा परेर रोपाइँ गर्न पाएका छैनौं, रोपाइँ नहुँदा आम्दानीको मुख्य स्रोत नै गुमेको छ,’ उनले भने ।

यादव जस्तै भाड्सरका सयौं किसान आयातित चामलमा भरमा छन् । सामान्य पानी पर्दा गाउँ नै डुबानमा पर्ने गरेको छ । किसानले राखेको धानको ब्याड पनि डुबानका कारण गलेर नष्ट भइसकेको छ । यहाँका किसानले वर्षाभन्दा पनि खडेरी राम्रो मान्दै आएका छन् । वर्षाका बेला डुबानका कारण रोपाइँ नहुने र खडेरीका बेला जसोतसो धान रोप्न पाइएको स्थानीय किसान समसुल हकले बताए । उनले डुबान समस्या समाधानका लागि जनप्रतिनिधिलाई आग्रह गरिए पनि काम हुन नसकेको जानकारी दिए ।

हकले लखन्देही खोलामा तटबन्ध भएपछि पानीको निकास रोकिएर डुबान भएको बताए । खोलामा तटबन्ध नहुँदा बाढीले रोपाइँ प्रभावित हुने गरेकोमा अहिले तटबन्ध भएसँगै पानीको निकास रोकिएको छ । ‘खोलामा तटबन्ध नहुँदा बस्ती जोखिममा थियो, तर ठूलो बाढी आएको वर्षबाहेक रोपाइँ प्रभावित भएको थिएन,’ उनले भने, ‘तटबन्ध भएपछि बस्ती जोगियो, तर वर्षाको पानीको निकास नभएर खेतबारीसहित बस्ती पनि डुबानमा छ ।’ मौसमविद्ले यस वर्ष ठूलै पानी पर्ने जनाएपछि उनीहरू यस वर्ष रोपाइँको कल्पनासमेत नगरेको जनाएका छन् । बर्सेर्नि डुबानकै कारण यहाँ भदौ अन्तिममा रोपाइँ हुँदै आएको हकले बताए ।

कृषी ज्ञान केन्द्रले सर्लाहीमा बर्सेर्नि ५ देखि १० प्रतिशतको हाराहारीमा रोपाइँ प्रभावित हुने गरेको जनाएको छ । भाँड्सरसहितको क्षेत्रमा डुबान तथा केही भागमा कहिलेकाहीं खडेरीका कारण रोपाइँ प्रभावित हुने गरेको कृषिको तथ्यांक छ । यस वर्ष जिल्लामा ४३ हजार हेक्टरमा धान खेती हुने अनुमान गरिएको ज्ञान केन्द्रका निमित्त प्रमुख कमलदेवप्रसाद कुशवाहाले जानकारी दिए । उनले दक्षिणी क्षेत्रका सय बिघाभन्दा बढी क्षेत्रफलमा डुबानका कारण रोपाइँ गर्न समस्या हुने बताए ।

७० प्रतिशत रोपाइँ

जनकपुर– धनुषाको कुल धान उत्पादन हुने भूमिमध्ये ७० प्रतिशतमा रोपाइँ सकिएको कृषि ज्ञान केन्द्रले जनाएको छ । केन्द्रका बालीविद् प्रदीप यादवका अनुसार समयमा पानी परेकाले चाँडै नै धेरै क्षेत्रफलमा रोपाइँ भएको हो । धनुषामा कुल ५४ हजार हेक्टरमा धान खेती हुन्छ । त्यसमध्ये झन्डै ४० हजार हेक्टरमा रोपाइँ भइसकेको छ भने अरू रोपाइँ हुने क्रममै छ । कृषिविद् यादवका अनुसार रोपाइँका लागि असार १५ देखि साउन १५ सम्मको समय उपयुक्त हुन्छ । पानीको अभाव भएन भने यस वर्ष जिल्लाको शतप्रतिशत जग्गामा धान रोपाइँ हुने दाबी यादवको छ । समयमा पानी परेकाले धान उत्पादनमा पनि वृद्धि हुने अनुमान गरिएको छ ।

प्रकाशित : श्रावण ३, २०७८ ०९:१२
पूरा पढ्नुहोस्
प्रतिक्रिया
पठाउनुहोस्
×