प्रदेश २ सरकारमा माओवादीबाट बने साह मन्त्री र कर्ण राज्यमन्त्री 

मन्त्री साहले कसैको नाममा शपथ खाएन भने राज्यमन्त्री कर्ण सहिदको नाममा शपथ लिइन् । उनीहरुले मातृभाषामा शपथ गर्न इच्छा देखाए पनि कानुनी जटिलताका कारण नेपाली भाषामै शपथ खाए ।

माओवादी केन्द्रलाई सरकारमा सहभागी गराउन सत्तारुढ दलकै दुईजना मन्त्रीको राजीनामा शनिबार मुख्यमन्त्री राउतले स्वीकृत गरेका थिए । मुख्यमन्त्री राउतसमक्ष आन्तिरक मामिला तथा सञ्चारमन्त्री ज्ञानेन्द्रकुमार यादव र राज्यमन्त्री सरोज सिंह कुशवहाले शुक्रबार राजीनामा बुझाएका थिए ।

जनता समाजवादी पार्टी (जसपा) अध्यक्ष उपेन्द्र यादव पक्षले अर्का अध्यक्ष महन्थ ठाकुर पक्षका भौतिक पूर्वाधार विकासमन्त्री र तीन राज्यमन्त्रीलाई बर्खास्त गरेर गत जेठ २६ मा कांग्रेसलाई सरकारमा सहभागी गराएका थिए । सोही दिन माओवादीलाई पनि सहभागी गराउने कसरत गरिएको थियो । तर मन्त्रालय बाँडफाँटमा कुरा नमिलेपछि सरकारमा सहभागी भएको थिएन ।