वीरेन्द्रनगर — विवादका कारण सुर्खेत विमानस्थल विस्तारको काममा ढिलाइ भएको छ । नेपाल नागरिक उड्डयन प्राधिकरणले २०७६ भदौदेखि विमानस्थल विस्तारको प्रक्रिया सुरु गरे पनि स्थानीयले विरोध गरेपछि अझै काम सुरु हुन नसकेको हो । 

२०२२ मा १ हजार ४० मिटर क्षेत्रफलमा विमानस्थल निर्माण गरिएको थियो । उक्त विमानस्थललाई करिब ७ वर्षअघि पहिलोपटक विस्तार गरी १ हजार २ सय ५५ मिटर लम्बाइ र ३० मिटर चौडाइको बनाइएको थियो । अहिले विमानस्थलमा एटीआर–४२ तथा साना सिट क्षमता भएका जहाजले मात्रै उडान भर्न सक्छन् । अहिले ठूला जहाज पनि अवतरण गर्न मिल्ने गरी दोस्रोपटक विस्तारको तयारी थालिएको हो ।

कर्णाली प्रदेश सरकार गठन भएदेखि नै विमानस्थल विस्तारको पहल थालिए पनि काम भने अगाडि बढ्न सकेको छैन । प्रदेश सरकारको अनुरोधमा नेपाल नागरिक उड्डयन प्राधिकरणले २०७६ भदौमा विमानस्थल विस्तारका लागि अध्ययन थालेको थियो । प्राधिकरणको अध्ययन टोलीले उत्तरतर्फ करिब १६ बिघा जग्गा अधिग्रहण गर्नुपर्ने निष्कर्ष निकालेको थियो । जसका लागि ८ अर्ब रुपैयाँको लागत अनुमान गरिएको छ ।

५ अर्ब रुपैयाँ जग्गा अधिग्रहण, क्षतिपूर्ति र अमरज्योति नमुना मावि स्थानान्तरण तथा रनवे विस्तारलगायतमा खर्च हुने प्राधिकरणले जनाएको छ । त्यस्तै भौतिक संरचना निर्माणका लागि ३ अर्ब रुपैयाँ खर्च हुने देखिएको छ । अध्ययन गरिएको एक वर्षपछि गत वर्ष असोज १६ गते विमानस्थलको विकास, विस्तार र स्तरोन्नतिको काम अघि बढाउन कर्णाली प्रदेश र नेपाल सरकारबीच समझदारी पत्रमा हस्ताक्षर भएको थियो । तर दुई सरकारबीच भएको समझदारीअनुसार विमानस्थल विस्तार कार्य अगाडि बढ्न सकेको छैन । विमानस्थल विस्तारका लागि गत वर्ष पुस १४ गते अधिग्रहण गरिने जग्गाको प्रारम्भिक लगत संकलन गर्ने काममा स्थानीयले अवरोध गरे । विमानस्थलको धावनमार्ग विस्तार गर्दा नगरपालिकाको १०, ११ र १२ वडाका २ सय ७६ घर, ३/३ वटा सरकारी र निजी विद्यालय, स्वास्थ्य चौकीलगायत संरचना मासिने भन्दै स्थानीयले विरोध गरेका हुन् । स्थानीयले नागरिक सरोकार समिति बनाई विभिन्न माग राख्दै अवरोध गरेपछि करिब ७ महिनादेखि विमानस्थल विस्तार कार्य रोकिएको हो ।

फागुन २८ गते बसेको बैठकले विमानस्थलको उत्तर र पश्चिमतर्फ मात्रै विमानस्थल विस्तार गर्ने र एक महिनाभित्र लगत संकलनको लागि सूचना निकालेर काम अघि बढाउने निर्णय गरेको थियो । तर काम नहुँदा यस वर्ष प्रदेश सरकारको ५० करोड र संघीय सरकारको ५१ करोड रुपैयाँ फ्रिज भएको छ । स्थानीयसँग सहमति नहुँदा काममा ढिलाइ भएको नागरिक उड्डयन प्राधिकरण सुर्खेतका प्रमुख उमेशकुमार पन्थीले बताए ।

उनका अनुसार विमानस्थल विस्तारबारे स्थानीय बासिन्दाको धारणा फरकफरक छ । ‘केहीले चाँडै बन्नुपर्छ भन्छन्,’ उनले भने, ‘केहीले बनाउनै हुँदैन भन्छन् भने केहीले उचित मुआब्जा पाएमा बन्न दिन्छौं भन्छन् ।’ उनले स्थानीयसँग थप छलफल गरी आगामी आर्थिक वर्षमा काम अघि बढाइने बताए । संघीय सरकारले आगामी आर्थिक वर्षको बजेटमा सुर्खेत र भरतपुर विमानस्थल विस्तारका लागि डेढ अर्व रुपैयाँ छुट्याएको छ । उत्तरतर्फको ५ सय १० मिटरमा विमानस्थल विस्तार गरिने कार्यालयले जनाएको छ ।