१९.१२°C काठमाडौं
काठमाडौंमा वायुको गुणस्तर: १७०

सप्तरीमा 'अज्ञात रोग'ले एकको मृत्यु, २५ जनाभन्दा बढी बिरामी

अवधेशकुमार झा

राजविराज — सप्तरीमा 'अज्ञात रोग'ले एक जनाको मृत्यु भएको छ भने २५ जना भन्दा बढी बिरामी परेका छन् । जसमध्ये ६ जनाको अवस्था गम्भीर छ । टाउको दुख्ने, ज्वरो आउने र पखालाको लक्षण देखिएका महदेवा गाउँपालिका–२ चकलाकी ४० वर्षीया सीतादेवी रजकको मृत्यु भएको हो ।

सप्तरीमा 'अज्ञात रोग'ले एकको मृत्यु, २५ जनाभन्दा बढी बिरामी

बिहीबार साँझ साढे ७ बजे टाउको दुख्ने, ज्वरो आउने र पखाला लाग्ने समस्या भएपछि उपचारका लागि गजेन्द्रनारायण सिंह अस्पताल राजविराजमा भर्ना गरिएकी उनको राति साढे ९ बजे मृत्यु भएको अस्पतालका मेडिकल सुपरिटेन्डेन्ट डा. रन्जितकुमार झाले जानकारी दिए । फुड प्वाइजनिङ भइ पखाला लागेको हुनसक्ने अनुमान गरिए पनि ज्वरोसमेत आएकाले के कारणले मृत्यु भएको हो भन्ने विषयमा परीक्षण भइरहेको डा. झाले बताए ।

सोही लक्षणबाट मृत्यु भएकी रजककै परिवारका तीन जनालाई उपचारका लागि गजेन्द्रनारायण सिंह अस्पतालमा भर्ना गरिएको थियो । उनीहरुको अवस्था चिन्ताजनक भएपछि थप उपचारका लागि धरान रिफर गरिएको छ ।

यस्तै, महदेवा गाउँपालिका–२ चकलाटोलसँगै जोडिएको तिलाठी कोईलाडी गाउँपालिका–८ तोपाको उत्तर टोलमा पनि यस्तै लक्षणका २१ जना बिरामी छन् । तिलाठी कोईलाडी –८ का विभिन्न परिवारका सदस्यहरुलाई टाउको दुख्ने, वान्ता हुने, ज्वरो आउने र पखाला लाग्ने समस्या बिहीबार साँझदेखि देखिएको स्थानीय सत्यनारायण यादवले बताए । तीमध्ये उपचारका लागि गजेन्द्रनारायण सिंह अस्पतालमा भर्ना भएका ८ वर्षीय कृष्णकुमार मण्डल, ३० वर्षीया प्रयागीदेवी खंग र ६ वर्षीय पारसकुमार मण्डललाई थप उपचारका लागि धरान रिफर गरिएको अस्पतालले जनाएको छ ।

स्थानीय सत्यनारायण यादवका अनुसार अस्पताल नगएका बिरामीहरुको स्थानीय मेडिकल र घरमै स्लाइन पानी लगाइ उपचार भइरहेको छ ।


महदेवा गाउँपालिकाका स्वास्थ्य शाखा प्रमुख ललित यादवका अनुसार शुक्रबार स्वास्थ्यकर्मीको टोली प्रभावित गाउँमा पुगेको छ । आफन्तको घरबाट आएको कोसेली खाएपछि बिरामी भए पनि मुख्य कारण यकिन हुन नसकेको यादवले बताए । तिलाठी कोइलाडीका स्वास्थ्य शाखा प्रमुख शैलेशकुमार मिश्रका अनुसार प्रारम्भिक जानकारी अनुसार छिमेकीको रोपाइँमा गएकामध्ये भुजा र केराउ खाएका केही बिरामी परेको खुलेको छ । स्वास्थ्यकर्मीको टोली पुगेर बिरामी थपिँदै जानुको कारण पत्ता लगाउन परीक्षण गरिरहेको मिश्रले जनाए ।

प्रकाशित : असार २५, २०७८ १६:३८
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?