पर्सा, सर्लाही — लगातारको वर्षाले पर्सा र सर्लाहीका जिल्ला प्रशासन कार्यालयसहित विभिन्न कार्यालय र बस्तीहरू डुबानमा परेका छन् । वीरगन्जमा जिल्ला प्रशासन कार्यालय पर्सा, कृषि औजार अनुसन्धान केन्द्र रानीघाट वीरगन्ज कार्यालयसहित केही बजार क्षेत्र पनि डुबानमा परेका छन् ।
सर्लाहीको मलंगवास्थित जिल्ला प्रशासन कार्यालयसहित जिल्लाका अन्य दुई प्रहरी युनिट पनि डुबानमा परेका छन् । पानीको निकास नभएर गाउँबस्तीहरू डुबानमा परेका हुन् ।
बिहीबार रातिदेखि अविरल वर्षाको कारण वीरगन्ज महानगरपालिका १० आदर्शनगर क्षेत्रमा मुख्य सडक नै डुबानमा परेको छ । यो क्षेत्र खाल्डो भएकाले सानो पानी पर्दा पनि यहाँ पानी जम्छ । साथै, सिर्सिया खोलाको जलस्तर बढेपछि यो सडक खण्ड हुँदै सिर्सिया खोलामा झारिएको नालाबाट पनि यहाँ पानी आउँछ । उक्त सडक ठाकुरराम क्याम्पस, राष्ट्र बैंक, वीरगन्ज महानगरपालिकाको कार्यालय, नेपाल बैंक लिमिटेडसहित सरकारी कार्यालयमा आउजाउ गर्ने मुख्य सडक हो । यसै क्षेत्रमा २ दर्जन बढी निजी बैंक तथा वित्तीय संस्था, थुप्रै व्यावसायिक घरानाका कार्यालय तथा वीरगन्जकै मुख्य बजार पनि छ । वीरगन्जको ओम आश्रम क्षेत्रमा मुख्य सडकमै पानी जमेर सर्वसाधारणलाई आवागमनमा समस्या भएको छ ।
जिल्ला प्रहरी कार्यालय पर्साका प्रवक्ता डीएसपी ओमप्रकाश खनालका अनुसार पोखरिया ४ का प्रभु साहको फुसको कच्ची घर पानी पसेर ढलेको छ । पकाहामैनपुर गाउँपालिकाअन्तर्गत वडा नं ४ मा रहेको खेस्राहा प्रहरी चौकीमा पानी पसेपछि चौकीलाई १ किमि दूरीमा रहेको हरिहर निमाविमा सारिएको छ । वीरगन्ज २० उदयपुर घुर्मीमा १६ घर, जिराभवानी गाउँपालिका १ बलुवा टोलमा ४ घर, जगरनाथपुर गाउँपालिका ५ दशौतामा ४० घर डुबानमा परेको प्रहरीले जनाएको छ । सिर्सिया खोलाको जलस्तर बढ्दा वीरगन्ज ११ रानीघाट तथा वीरगन्ज २४ रामगढवा खोलाको पानी पसेर धेरै घर तथा सडक डुबानमा परेका छन् । वीरगन्ज २४ खल्वाटोलाका ५ घर विस्थापित भएका छन् । तीमध्ये २ घर वडा कार्यालयमा ३ घर विद्यालय भवनमा आश्रित छन् ।
यस्तै, अविरल वर्षाका कारण सर्लाहीको मलंगवास्थित जिल्ला प्रशासन कार्यालयसहित जिल्लाका अन्य दुई प्रहरी युनिट पनि डुबानमा परेका छन् । पानीको निकास नभएर गाउँबस्तीहरू डुबानमा परेका हुन् । निकासबिनाको विकासले पनि कतिपय बस्ती डुबानमा परेको छ । बर्सेनि लखन्देही खोलाको बाढी पसेर डुबानमा पर्दै आएको मलंगवा नगरपालिका–५ भाँडसरमा भने यस पटक पानीको निकास नभएर डुबानमा परेको हो । त्यहाँ २५ घर डुबानमा परेका छन् ।
लखन्देहीमा यस वर्ष तटबन्ध निर्माण भएपछि बाढी नपसे पनि वर्षाको पानीको निकास नभएर पानी गाउँ घरमा पसेको हो । यस वर्ष वर्षाको पानीले यो बस्ती डुबानमा परेको छ ।
सदरमुकाम मलंगवास्थित जिल्ला प्रशासन कार्यालय पनि ड्बुानमा परेको छ । वर्षाको पानी कार्यालयको कोठाभित्र समेत पसेको सहायक प्रमुख जिल्ला अधिकारी भूमीश्वर पोखरेलले बताए । उनले अब पानीको सतह बढे कोठाभित्र राखिएको फाइल ने डुबेर खराब हुने स्थितिमा पुगेको जानकारी दिए ।
यस्तै औरही प्रहरी चौकी र खुटौनामा रहेको प्रहरी चौकी डुबानमा परेको छ । यहाँको प्रहरी चौकी पुरानो घरमा रहेको र सडकभन्दा होचो स्थानमा भएकाले पानी चौकीमा पसेको जिल्लाका प्रहरी उपरीक्षक सन्तोष सिंह राठौरले बताए । उनले जिल्लाका केही बस्ती वर्षाको पानी निकास नभएर डुबानमा परे पनि जनधनको क्षति नभएको जानकारी दिए ।
प्रकाशित : असार १९, २०७८ १०:३३
