कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: २०९

रौतहटमा असार ७ गतेसम्म निषेधाज्ञा 

शिव पुरी

रौतहट — रौतहटमा जारी निषेधाज्ञा केही खुकुलो पार्दै असार ७ गतेसम्म थपिएको छ । कोरोना संक्रमण नियन्त्रणमा आइनसकेको भन्दै जिल्ला प्रशासन कार्यालयले एक साताको लागि निषेधाज्ञा थप गरेको हो ।

रौतहटमा असार ७ गतेसम्म निषेधाज्ञा 

जिल्ला कोभिड–१९ संकट व्यवस्थापन केन्द्र (डीसीसीएमसी) को बैठकले संक्रमण अझै नियन्त्रणमा आइनसकेकाले निषेधाज्ञा थप्न प्रशासनलाई सिफारिस गर्ने निर्णय गरेको थियो । जेठ ३१ गतेसम्म जारी रहेको निषेधाज्ञालाई निरन्तरता दिइएको प्रमुख जिल्ला अधिकारी ईन्द्रदेव यादवले बताए । प्रशासनले यस पटकको निषेधाज्ञालाई केही खुकुलो बनाएको छ । किराना, फलफूल र तरकारी पसलका साथै बैंक तथा वित्तीय संस्थालाई नियमित संचालनको अनुमति दिइएको छ ।

विद्युत्, खानेपानी, ग्यास, स्वास्थ्य, दूरसञ्चार, दूध, फोहोरमैला व्यवस्थापन, पेट्रोलियम पदार्थ, औषधि, खाद्यान्न, तरकारी आपूर्ति बाहेकका सबै निकाय र सेवालाई निषेध गरिएको छ । एम्बुलेन्स, शव वाहन, दमकललगायत पास प्राप्त सवारीलाई मात्र सचालनको अनुमति दिइएको प्रजिअ यादवले बताए । ‘विवाह, व्रतबन्ध र मृत्यु संस्कार लगायतका काममा भौतिक दूरी कायम गर्दै बढीमा २५ जनासम्म उपस्थित हुन पाउने व्यवस्था गरिएको छ,’उनले भने,‘स्वास्थ्य मापदण्ड अपनाउँदै प्रशासनले जारी गरेको निर्देशनबाहेक गर्न दिँदैनौं । संक्रमण अझै टरीसकेको छैन ।’

कोरोना महामारीको श्रृंखला रोक्न उपयोगी देखिएको भन्दै प्रशासनले निषेधाज्ञालाई निरन्तरता दिइएको जनायो । प्रशासनले जारी गरेको निषेधाज्ञा जेठ ३१ गते रातिबाट सकिएको थियो । पछिल्लो समय जिल्लामा संक्रमितको संख्या घट्दै गएको छ । संक्रमण रोक्न प्रशासनले पाचौ पटक निषेधाज्ञाको अवधि थपेको हो ।

संक्रमणले जिल्लामा मृत्यु हुनेको संख्या १ सय १६ पुगेको छ । मंगलबारसम्म सक्रिय संक्रमितको संख्या ७ सयबाट घटेर १ सय ४८ मा झरेको छ । १ हजार २ सय ९१ संक्रमण पुष्टि भएकोमा अहिलेसम्म १ हजार ९० जना निको भएर घर फर्कका छन् । अब संस्थागत आईसोलेसनमा ३ जनामात्र रहेको स्वास्थ्य कार्यालयले जनाएको छ ।


प्रकाशित : असार १, २०७८ १६:१४
प्रतिक्रिया
पठाउनुहोस्
जनताको राय

नेपाल संघीय लोकतान्त्रिक गणतन्त्र घोषणा भएको १६ वर्ष पुरा भएको छ । गणतन्त्रको गति कस्तो लागिरहेको छ ?