औषधि व्यवसायीमाथि गोली प्रहार- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

औषधि व्यवसायीमाथि गोली प्रहार

भरत जर्घामगर

सिरहा — सिरहाको मिर्चैयाका एक व्यवसायीमाथि शनिबार राति गोली प्रहार भएको छ । तीन–चार जनाको संख्यामा आएको हतियारधारी समूहले मिर्चैया नगरपालिका–५ का ३९ वर्षीय रामसागर साफीलाई गोली हानेको हो । 

मिर्चैयास्थित मंगलम हेल्थ केयरमा उपचार भइरहेका साफीको अवस्था खतरामुक्त रहेको प्रहरीले जनाएको छ । प्रहरीका अनुसार मिर्चैयास्थित मुख्य चोकमा सिद्धि मेडिकल हल सञ्चालन गर्दै आएका साफीमाथि पसलमा हिसाब मिलान गरिरहेका बेला बत्ती गएको मौका छोपी गोली हानिएको थिो ।

घटनास्थल इलाका प्रहरी कार्यालय मिर्चैयाभन्दा ५० मिटरको दुरीमा अवस्थित छ । जिल्ला प्रहरी कार्यालय सिरहाका सूचना अधिकारी डीएसपी शालिग्राम शर्माले घटनाबारे अनुसन्धान भइरहेको र घटनामा संलग्न रहेको अशंकामा केही युवालाई नियन्त्रणमा लिइएको जनाए ।

प्रकाशित : जेष्ठ २३, २०७८ १०:३३
प्रतिक्रिया
पठाउनुहोस्

सिरहामा ६ जना कोरोना संक्रमितको मृत्यु

भरत जर्घामगर

सिरहा — कोभिड– १९ संक्रमणका कारण सिरहामा पछिल्लो २४ घण्टामा थप ६ जनाको मृत्यु भएको छ । योसँगै कोरोना दोस्रो लहर सुरु भएयता सिरहामा ६५ जनाको मृत्यु भएको छ ।

जिल्ला स्वास्थ्य कार्यालय सिरहाका कोभिड स्रोतव्यक्ति उमेश यादवका अनुसार कल्याणपुर नगरपालिका–७ का ५९ वर्षीय पुरुषको कोशी अञ्चल अस्पताल विराटनगरमा, लहान नगरपालिका–२२ का ४० वर्षीय पुरुष र २७ वर्षीया महिलाको लहान अस्पताल, धनगढीमाई नगरपालिका–१० का ७० वर्षीय पुरुषको विराटनगरको नोबेल अस्पतालमा उपचारका क्रममा मृत्यु भएको हो ।

त्यसैगरी, सिरहा नगरपालिका–५ का ४६ वर्षीय पुरुषको प्रादेशिक अस्पताल जनकपुर तथा मिर्चैया नगरपालिका–११ का ५३ वर्षीय पुरुषको कर्जन्हास्थित फुलकुमारी मेमोरियल अस्पतालमा उपचारको क्रममा मृत्यु भएको छ ।

दोस्रो लहर सुरु भएयता सिरहा जिल्लामा कोभिडका कारण अहिलेसम्म ६५ जनाको मृत्यु भएको छ । जसमध्ये पुरुष ४४ जना र महिला २१ जना छन् । ३ हजार १ सय ९७ जनाको पीसीआर परीक्षण गर्दा जिल्लामा संक्रमितको संख्या ९ सय ९४ जना पुगेको छ । त्यसमध्ये अहिलेसम्म ३ सय ८२ जना निको भइसकेका छन् भने ५ सय ४७ जना सक्रिय संक्रमित छन् ।

संक्रमितमध्ये ४ सय ९९ जना होम आइसोलेसनमा, ३८ जनाको समान्य उपचार, ६ जनाको आइसियूमा तथा ४ जनाको एचडियूमा राखेर उपचार भइरहेको जिल्ला स्वास्थ्य कार्यालय सिरहाले जनाएको छ ।

प्रकाशित : जेष्ठ १६, २०७८ १६:५२
पूरा पढ्नुहोस्
प्रतिक्रिया
पठाउनुहोस्
×