गौर र चन्द्रपुर अस्पतालका स्वास्थ्यकर्मीले पाएनन् जोखिम भत्ता- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

गौर र चन्द्रपुर अस्पतालका स्वास्थ्यकर्मीले पाएनन् जोखिम भत्ता

केन्द्र सरकारले बजेट नपठाएको प्रदेश सरकारको भनाइ
शिव पुरी

रौतहट — कोभिड संक्रमणका बेला अग्रपंक्तिमा काम गर्ने स्वास्थ्यकर्मीले जोखिम भत्ता पाएका छैनन् । प्रदेश २ सरकारले चासो नदिँदा गौर र चन्द्रपुर अस्पतालमा कार्यरत स्वास्थ्यकर्मीले गत साउनदेखिको जोखिम भत्ता नपाएका हुन् ।

गौर अस्पतालको पीसीआर ल्याबमा कार्यरत स्वास्थ्यकर्मीले जोखिम भत्तालगायत अन्य सेवासुविधा नपाएको गुनासो गरे । त्यस्तै संक्रमितको उपचारमा खटेका स्वास्थ्यकर्मीले समेत भत्ता पाएका छैनन् । प्रदेश सरकारको सामाजिक विकास मन्त्रालयमा ताकेता गर्दा सुनुवाइ नभएको उनीहरू बताउँछन् । गौर अस्पताल प्रमुख डा. कृष्ण साहले अस्पतालमा कार्यरत एक सयभन्दा बढी स्वास्थ्यकर्मी र कर्मचारीको जोखिम भत्ता बाँकी रहेको जनाए । ‘अस्पताल प्रशासनले सामाजिक विकास मन्त्रालय र मुख्यमन्त्री लालबाबु राउतलाई जोखिम भत्ता उपलब्ध गराइदिन लिखित तथा मौखिक जानकारी गराइसकेको छ,’ उनले भने, ‘अहिलेसम्म भत्ताको रकमबारे कुनै निर्णय भएको छैन ।’

प्रदेशले भने केन्द्र सरकारले बजेट नपठाएकाले जोखिम भत्ता दिन नसकेको जनाउँदै आएको छ । प्रदेश सरकारले अस्पतालको कोभिड वार्ड र पीसीआर ल्याबमा कार्यरत स्वास्थ्यकर्मीलाई छुट्टै खान र बस्नको व्यवस्थासमेत गरेको छैन । संक्रमितको उपचारमा खटिँदा र पीसीआर ल्याबमा काम गर्दा स्वास्थ्यकर्मीलाई पनि संक्रमण हुने उच्च जोखिम छ । अस्पताल र ल्याबमा काम गरेर उनीहरू घर फर्कने गरेका थिए । घर परिवारसम्म संक्रमणको उच्च जोखिम रहेको स्वास्थ्यकर्मीको गुनासो छ ।

पछिल्लो केही समययता ल्याबमा कार्यरत स्वास्थ्यकर्मी आफैंले पैसा उठाएर खाना पकाउने भाँडा, ग्यास र खाद्य सामग्री किनेर अस्पतालको एउटा कोठामा बस्ने व्यवस्था मिलाएका छन् । २४ सै घण्टा ल्याब र संक्रमितको उपचारमा खटिने स्वास्थ्यकर्मीका लागि छुट्टै आइसोलेसन र खान बस्नको व्यवस्था नगरिएको ल्याबका टेक्नोलोजिस्ट रामकृष्ण रायले गुनासो पोखे । रौतहटका १८ वटा स्थानीय तह र छिमेकी जिल्लाबाट गरी दैनिक २/३ सयको हाराहारीमा परीक्षणका लागि स्वाब आउने गरेको छ । स्वास्थ्यकर्मीले २४ सै घण्टा खटेर दैनिक २ सयको हाराहारीमा परीक्षण गर्छन् । एक पटकमा बढीमा ७२ वटा स्वाव परीक्षण गर्न सकिन्छ । त्यसको नतिजा आउन ६ देखि ७ घण्टासम्म लाग्ने गरेको मेडिकल ल्याब टेक्निसियन आयशा सिद्धकीले बताइन् ।

‘जोखिम भत्ताको अत्तोपत्तो नहुँदा पनि काम गरिरहेको अवस्थामा अहिले आएर ओभरटाइमको सुविधासमेत नपाउने भएपछि नर्मल ड्युटी मात्र गरेका छौं,’ उनले भनिन, ‘जति खटे पनि राज्यले मूल्यांकन नगरेपछि कसको के लाग्छ । अब बढी समय खट्दा पनि सुविधा दिने छाँट देखिएन ।’ ल्याबका कर्मचारीले १० देखि ४ बजेसम्म काम गर्दा दैनिक ७२ वटा स्वाब परीक्षण हुन्छ । यसले स्वाबको रिपोर्ट लिन केही दिन कुर्नुपर्ने अवस्था छ । अस्पताल प्रमुख डा. साहलाई ओभरटाइम बापतको पाउनुपर्ने सेवासुविधा दिन मौखिक आग्रह गर्दा सुनुवाइ नभएको उनीहरूको गुनासो छ । चन्द्रपुरस्थित अस्थायी कोभिड अस्पतालमा खटेका स्वास्थ्यकर्मीले समेत साउनदेखि जोखिम भत्ता पाएका छैनन् । उनीहरूले चन्द्रपुरका प्रमुख रामचन्द्र चौधरीलाई गुनासो पोखेपछि भत्ता दिने तयारी गरिएको छ ।

प्रकाशित : जेष्ठ २३, २०७८ १०:३०
प्रतिक्रिया
पठाउनुहोस्

चुमनुब्रीमा पहिलो पटक कोरोना

हरिराम उप्रेती

गोरखा — एघार स्थानीय रहेको जिल्लामा अन्य स्थानीय तहमा कोरोना संक्रमण फैलावट तीव्र हुँदा दुर्गमको चुमनुब्री गाउँपालिका सुरक्षित बन्यो । पहिलो लहरको संक्रमणका बेला चुमनुब्रीमा एक जना संक्रमित पनि थिएनन् । 

दोस्रो लहरको कोरोना संक्रमणको फैलावटको ग्राफ अन्य ठाउँमा बढिरहँदा चुमनुब्रीमा देखिएको थिएन । रुघाखोकीका बिरामी बढेसँगै गत बिहीबार चुमनुब्री–३ पाङसिङमा २० जनाको एन्टिजेन परीक्षण भयो । सबैको रिपोर्ट नेगेटिभ आयो । तर शुक्रबार भने पहिलो पटक कोरोना संक्रमित भेटिएका छन् । एन्टिजेन परीक्षणमा चुमनुब्री–३ घट्टेखोलाका ३ जनामा संक्रमण पुष्टि भएको हो ।

२६ जनाको कोरोना परीक्षण गर्दा ३१ वर्षीया महिला र ६ र २१ वर्षका पुरुषको कोरोना रिपोर्ट पोजिटिभ आएको जिल्ला स्वास्थ्य कार्यालयका सूचना अधिकारी नवराज खड्काले बताए । संक्रमितको स्वास्थ्य अवस्था सामान्य छ । ‘पहिलो लहरको संक्रमणका बेला चुमनुब्री संक्रमणको जोखिम थिएन,’ उनले भने, ‘दोस्रो लहरअन्तर्गत गाउँपालिकामा नै परीक्षण गर्दा पहिलो पटक संक्रमित भेटिएका हुन् ।’ दोस्रो लहरको संक्रमण फैलिएयता चुमनुब्री स्थायी घर भई उपचारका लागि काठमाडौं पुगेका २ जनामा भने पोजिटिभ देखिएको खड्काले बताए । स्वास्थ्य कार्यालयले चुमनुब्रीका लागि ५ सय एन्टिजेन किट पठाएको छ ।

‘एन्टिजेन किट जाँदै छ, आइतबारसम्म पुग्छ,’ खड्काले भने, ‘अब परीक्षणको दायरा बढाउँछौं ।’ चुमनुब्री–३ कै पाती बस्तीमा शनिबार एन्टिजेन परीक्षणका लागि स्वास्थ्यकर्मी पुगेका छन् । कोरोनासँग मिल्दोजुल्दो लक्षण देखिएकाको परीक्षणका लागि बस्तीबस्तीमा स्वास्थ्यकर्मी परिचालन गर्ने गाउँपालिकाका प्रमुख प्रशासकीय अधिकृत भीमसेन श्रेष्ठले बताए । परीक्षणका लागि गाउँपालिका स्वास्थ्य शाखा र सिर्दिवास स्वास्थ्य चौकीका कर्मचारी परिचालन गरिएको उनले बताए । ‘डाक्टरको दरबन्दी नभएको हो, अन्य स्वास्थ्यकर्मी हुनुहुन्छ,’ उनले भने, ‘हाललाई एन्टिजेन किट पनि पर्याप्त छ, स्वास्थ्य समस्या देखिएका ठाउँमा परीक्षण बढाउँदै छौं ।’

सिर्दिवासको बुद्ध माविमा १२ बेड क्षमताको आइसोलेसन बनाइएको छ । मनास्लु पदमार्गअन्तर्गतको चुमनुब्रीमा हाल पर्यटक आवागमन पनि ठप्प छ । होटल बन्द छन् । गाउँपालिका प्रवेश गर्ने जगत नाकामा हेल्थडेक्स स्थापना गरिएको छ ।

हेल्थडेस्कमा खटिएका स्वास्थ्यकर्मीले ज्वरोलगायत सामान्य स्वास्थ्य जाँच गरेपछि मात्र गाउँपालिका प्रवेश गर्ने अनुमति दिने गरेको श्रेष्ठले बताए । तिब्बतसँग जोडिएको सामागाउँ र छेकम्पारको नाका पनि बन्द छ । स्थानीय तिब्बतका बजारबाट दैनिक उपभोग्य सामग्री ढुवानी गर्थे । हाल आरुघाटबाट खच्चडमार्फत सामग्री ढुवानी भइरहेको छ ।

बागलुङको उपल्लाचौर सिल

बागलुङ– सदरमुकामस्थित बागलुङ नगरपालिका–४ को उपल्लाचौरमा मात्रै एक सय जनाभन्दा बढी कोरोना संक्रमित पुगेपछि तीनवटा टोल सिल गरिएको छ । टोलमा कोही पनि छिर्न नपाउने गरी तारबार लगाइएको छ । कोरोना सचेतनासम्बन्धी व्यानर लेखेर टाँगिएको छ । साथै ती बस्तीको चारैतिर जनपथ र सशस्त्र प्रहरीको चौबिसै घण्टा पहरा दिने व्यवस्था मिलाइएको नगरप्रमुख जनकराज पौडेलले बताए ।

श्रीनगरटोलदेखि डुंडुंगा जाने सडकका २५ घरमा ४० बढी संक्रमित छन् । त्यस्तै राइटरचोकदेखि कटरको बोटसम्म र नेपाली सेनाको २३ नम्बर बाहिनीदेखि गौरीधाम जाने सडक पनि पूर्ण रूपमा सिल गरिएको नगर स्वास्थ्य शाखाका प्रमुख रामप्रसाद खनालले बताए । ‘यति धेरै संक्रमण र फैलावटको दर अन्यत्र छैन, त्यसैले टोल सिलको निर्णयमा पुग्यौं,’ खनालले भने, ‘सबै घरमा सरसफाइका सामग्री वितरण गर्ने र लक्षणसहितका बिरामी देखिएमा तत्काल उपचारका लागि अस्पताल पठाउन निगरानी बढाएका छौं ।’

यी सबै टोलमा अत्यावश्यक सामग्री वडाबाट वितरण गर्ने, तर कसैलाई घरबाट निस्कन नदिने योजना बनाइएको वडाध्यक्ष ध्रुबबहादुर केसीले जानकारी दिए । वडा कार्यालय रहेको स्थानमा पनि संक्रमित अत्यधिक बढेपछि कार्यालय बन्द गरेर सबै सेवा ठप्प पारिएको उनले जनाए ।

प्रकाशित : जेष्ठ २३, २०७८ १०:२८
पूरा पढ्नुहोस्
प्रतिक्रिया
पठाउनुहोस्
×