मुसहर बस्तीभर ज्वरोको प्रकोप- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

मुसहर बस्तीभर ज्वरोको प्रकोप

भरत जर्घामगर

सिरहा — सिरहाको लहान नगरपालिका–१५ लग्राहास्थित सिंगो दलित मुसहर बस्तीमा ज्वरोको प्रकोप फैलिएको छ । सिंगो बस्तीमा दुई सातादेखि फैलिएको ज्वरोको प्रकोपबाट काखे बच्चादेखि वृद्धवृद्धासम्म थलिएका छन् । ज्वरोबाट एकै घरका ६ जनासम्म थलिएका छन् ।

लहान नगरपालिका– १५ लग्राहास्थित  दलित मुसहर बस्तीका ५२ वर्षीय गौरी सदा र उनकी श्रीमती । बस्तीका बालबालिकादेखि वृद्धवृद्धा ज्वरोबाट थलिएका छन् । तस्बिर : भरत जर्घामगर/कान्तिपुर

लग्राहामा ३७ घरधुरी दलित मुसहर समुदायको बसोबास रहेको छ । ऐलानी जग्गामा बस्दै आएका बस्तीका उनीहरु दैनिक ज्याला मजदुरी गरी गुजारा चलाउँछन् । दुई सातादेखि ज्वरोले थलिए पनि कोरोना हो कि भन्ने त्रासका कारण उनीहरुले उपचार गराउन सकेका छैनन् ।

‘आफूबाहेक परिवारका सबै सदस्य दुई सातादेखि ज्वरोले थलिएपनि पैसा अभावमा उपचारका लागि अस्पताल पुर्‍याउन सकेको छैन,’ लग्राहाका मुर्तिदेवी सदायले भनिन् ‘गाउँकै औषधि पसलबाट सिटामोल ल्याएर ख्वाएको छु, दुई साता भइसक्यो ज्वरो घटेको छैन ।’

सुरुमा हातगोडा कटकट खाने, जिउ, टाउको र पेट दुख्ने, झाडापखाला लागेपछि ज्वरो आउने गरेको उनले सुनाइन् । बस्तीका रामे सदायका अनुसार बस्तीका घरपिच्छै बिरामी परेका छन् । ‘कतिपयलाई ज्वरो निको हुँदै केही दिनपछि फेरि दोहोरिएर आएको छ’ उनले भने ‘ज्वरो दोहोरिदा गाउँका बालबच्चादेखि वृद्धवृद्धा थलिएका छन् ।’

बस्तीका अधिकांश बालबच्चादेखि वृद्धवृद्धासम्म ज्वरोले थलिएपछि पानी ल्याएर दिने मान्छेसमेत नभएको ५० वर्षीया आशा सदाय मुसहरले सुनाइन् । आशा समेत ज्वरोले थलिएकी छन् । लहान अस्पताल पुग्न ९ किलोमिटर टाढा रहेकाले बस्तीमा अस्पताल पुर्‍याउने मान्छे समेत नभएको उनीहरुले दु:खेसो पोखे ।

सिंगो बस्तीका अधिकांश ज्वरोले थलिएपछि कोरोना भयो कि भन्ने पिरलो लग्राहा मुसहर बस्तीमा परेको छ । ‘ज्वरोको उपचार गर्न सकेका छैनौं,’ ९ दिनदेखि ज्वरोले थलिएकी सुर्जिदेवी सदायले भनिन्, ‘यदि कोरोना लाग्यो भने हामी उपचार गर्न नसकेर ज्वरोले मर्छौं होला ।’ बस्ती पुगेका जोकोहीलाई उनीहरु उपचार गराइदिन आग्रह गर्छन् ।

कोरोनासंक्रमणको पहिलो लहरमा स्थानीय सरकारले दैनिक ज्यालादारी गर्ने, गरिब, विपन्न परिवारलाई स्थानीय सरकारले राहत सामग्री दिएको भए पनि दोस्रो लहर सुरु भएको दुई साताभन्दा बढी बित्दै गर्दा राहत नपाउँदा चुलो बाल्न अप्ठ्यारो परेको उनीहरू बताउँछन् ।

बस्तीमा ज्वरोको प्रकोप फैलिएर काम गर्न सक्नेजति थलिएपछि बिहान–बेलुका हातमुख जोड्न पनि गाह्रो परिरहेको सुर्जीदेवी सदायले बताइन् । ‘बजारमा ठेला मजदुरी गर्न जानेहरू निषेधाज्ञाले घरमै थुनिएर बस्नुपर्दा रोजीरोटी खोसिएको छ,’ सदायले भनिन्, ‘गाउँमा अन्य काम पनि नपाउँदा अप्ठ्यारोमा छौं ।’

लग्राहा दलित मुसहर बस्तीमा दुई सातादेखि ज्वरोको प्रकोप फैलिएपछि वडा कार्यालयले स्वास्थ्यकर्मी टोली परिचालन गरेको छ । उनले ज्वरोले थलिएकामा कोरोना भाइरस संक्रमणको आशंका गरिएको उल्लेख गर्दै त्यसका लागि नगर स्वास्थ्य शाखासँग समन्वय गरी दुई–तीन दिनभित्र वडा कार्यालयमा स्वास्थ्यकर्मीको टोली ल्याएर परीक्षण गरिने योजना रहेको बताए ।

बस्तीमा ज्वरोको प्रकोप फैलिएको जानकारी पाउनासाथ स्वास्थ्यकर्मी टोली परिचालन गरेको लहान नगरपालिका १५ का वडाध्यक्ष तेजनारायण चौधरीले जानकारी दिए । ज्वरो प्रभावित बस्तीमा बिहीबार स्वास्थ्यकर्मी टोली पुगेर उपचार गरिरहेको उनले जानकारी दिए ।

मेनहरवा बस्तीमा समेत ज्वरो

लग्रहासँगै मेनहरवास्थित दलित मुसहर बस्तीमा समेत ज्वरोको प्रकोप फैलिएको छ । स्थानीय रामे सदाय मुसहरका अनुसार केही दिनदेखि बस्तीका धेरैजसोमा ज्वरो देखा परेको छ ।

प्रकाशित : जेष्ठ १३, २०७८ १६:१२
प्रतिक्रिया
पठाउनुहोस्

बजार ठप्प, सीमामा कडाइ

कर्मचारीमा संक्रमण देखिएपछि प्रशासन र अस्पतालका सेवा बन्द
भरत जर्घामगर

सिरहा — सिरहामा बिहीबारदेखि लागू हुने गरी खाद्यान्न पसलबाहेक हाटबजार तथा व्यवसाय बन्द हुने भएको छ । जिल्लामा कोरोना संक्रमणको बढ्दो स्थितिलाई मध्यनजर गर्दै डीसीसीएमसीको मंगलबारको बैठकले यस्तो निर्णय गरेको हो ।

डीसीसीएमसीले सवारीसाधन पनि जोरबिजोर प्रणालीमा मात्रै सञ्चालन हुने पाउने निर्णय गरेको छ । भाडाका यात्रुवाहक, परिचयपत्रधारी कर्मचारीका सवारीसाधनबाहेक निजी सवारीसाधन गतेअनुरूप जोरबिजोरमा मात्रै चल्न पाउनेछन् । बैठकले सिमानाका सिल गरी आवतजावतमा पूर्ण रोक लगाउने निर्णयसमेत गरेको छ । यस्तै हाटबजार, मेला, भेला, सामूहिक भोज, नाचगान तथा जुलुस र्‍याली अर्को निर्णय नहुञ्जेलसम्म गर्न पाइने छैन । खाद्यान्न, फलफूल, तरकारी तथा निर्माण सामग्रीका पसल बिहान ६ बजेदेखि अपराह्न ५ बजेसम्म खोल्न पाइनेछ ।

औषधि पसल, पानी उद्योग, दूध डेरी र पेट्रोल पम्प भने सञ्चालन गर्न पाइने डीसीसीएमसीले निर्णय गरेको छ । ती व्यवसाय सञ्चालन गर्दा सरकारले तोकेको स्वास्थ्य मापदण्ड पूर्ण रूपले पालना गर्नुपर्नेछ । निधो भइसकेका विवाह व्रतबन्ध भने २५ जनाभन्दा बढी नपुग्ने गरी स्थानीय तहबाट अनुमति लिएर मात्रै गर्न पाउने सिरहाका प्रमुख जिल्ला अधिकारी प्रदीपराज कँडेलले बताए ।

यस्तै, कर्मचारीमा संक्रमण देखिएपछि प्रशासनको अत्यावश्यक बाहेकका सम्पूर्ण सेवा अर्को सूचना नभएसम्मका लागि बन्द गरिएको छ । अन्य कर्मचारीको पीसीआर परीक्षण गराइएको र उनीहरूको रिपोर्ट नआएसम्मका लागि सेवा बन्द रहने प्रजिअ कणेलले बताए । यसअघि प्रशासनमा स्थानीय तहगत रूपमा आलोपालो सेवा प्रवाह हुँदै आएको थियो ।

जिल्लाको धनगढीमाई नगरपालिका–९ मा सञ्चालित नयनपुर अस्पतालका चिकित्सक, स्वास्थ्यकर्मीहरूमा संक्रमण देखिएपछि आकस्मिक बाहेकको सेवा बन्द भएको छ । लहानस्थित रामकुमार उमाप्रसाद स्मारक अस्पतालको सेवा पनि प्रभावित भएको छ । नयनपुर अस्पतालमा आकस्मिक बाहेक सबै सेवा बन्द गरिएको छ भने लहानस्थित राउ स्मारक अस्पतालमा आकस्मिक र इन्डोर शाखाको सेवा केही दिनका लागि बन्द गरिएको छ ।

नयनपुर अस्पतालमा कार्यरत एक चिकित्सक र दुई स्वास्थ्यकर्मीमा संक्रमण पुष्टि भएको हो । अस्पताल व्यवस्थापन समितिका अध्यक्ष प्रकाश योन्जनका अनुसार संक्रमित स्वास्थ्यकर्मीहरूको सम्पर्कमा आएका स्वास्थ्यकर्मी तथा कर्मचारीहरूको कन्ट्याक्ट ट्रेसिङ गर्नुपर्ने भएकाले तत्काललाई अस्पताल सिल गरी आकस्मिक सेवा मात्रै सञ्चालन गरिएको छ ।

नयनपुर अस्पतालको आकस्मिक कक्षबाहेक सबै कक्षमा ताल्चा लगाइएको छ । अस्पतालमा रोग निवारक औषधि छर्केर निर्मलीकरण गरेपछि पुनः सञ्चालनमा ल्याइने अध्यक्ष योन्जनले बताएका छन् । यता राउ स्मारक अस्पताल लहानले इमर्जेन्सी शाखा र इन्डोर शाखालाई निर्मलीकरण गर्नका लागि ती शाखाको सेवा बन्द गरिएको छ । अस्पतालमा उपचार गर्न आएका लहान नगरपालिका–३ का ४० वर्षीय पुरुष र साविक विष्णुपुरकट्टी–२ का १८ वर्षीया महिलामा कोरोना पुष्टि भएपछि सेवा बन्द गरिएको हो ।

प्रकाशित : वैशाख २३, २०७८ ११:०७
पूरा पढ्नुहोस्
प्रतिक्रिया
पठाउनुहोस्
×