कोरोना बढेपछि रौतहटमा शनिबारदेखि निषेधाज्ञा - प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

कोरोना बढेपछि रौतहटमा शनिबारदेखि निषेधाज्ञा 

शिव पुरी

रौतहट — पछिल्लो समय कोरोना संक्रमितको संख्या बढेपछि स्थानीय प्रशासनले शनिबारबाट जिल्लाभरी निषेधाज्ञा जारी गरेको छ । प्रशासनले होटल, रेस्टुरेन्ट, फेन्सी र कपडाका पसलहरु बन्द गराएको छ । जिल्लामा सञ्‍चालित हाटबजारहरु यसअघि नै बन्द गराइसकेको छ ।

जिल्लाका अधिकांश बजार, होटल, रेस्टुरेन्टहरुमा भीडभाड बढी हुन थालेपछि प्रशासनले वैशाख ३१ गतेसम्मका लागि निषेधाज्ञा लगाएको हो । कार, जिप, मोटरसाइकललगायतका निजी सवारीहरु बन्द गराइए पनि निषेधाज्ञामा मानिसलाई पैदल हिँड्न भने छुट दिइएको छ ।

सुरक्षाकर्मीहरु चोकचोकमा बसेर पास बिनाको सवारी रोक्ने र २ घण्टासम्म होल्डमा राख्ने गरेको छ । निषेधाज्ञाका कारण सडक सुनसान छ ।प्रशासनले खाद्यान्न लगायतका पसलहरु खोल्न अनुमति दिए पनि व्यापारीले खोलेका छैनन् ।

प्रमुख जिल्ला अधिकारी ईन्द्रदेव यादवले जिल्लामा संक्रमितको संख्या बढ्न थालेपछि नियन्त्रण गर्न निषेधाज्ञा जारी गरेको बताए । प्रशासनले भीडभाड हुने क्षेत्रहरु सिनेमा हल, जिमखाना, सभा सम्मेलन, हाट बजार, खेलकुद, धार्मिक क्रियाकलापहरु पनि वैशाख मसान्तसम्म बन्द गर्न निर्देशन दिएको छ । साथै एकै पटक १५ जनाभन्दा बढी नबस्न, विभिन्न सामग्रीहरु अनावश्यक नछुने, सामाजिक दुरी कायम गर्ने, अनिवार्य मास्क प्रयोग गर्ने, सेनिटाइजर प्रयोगको व्यवस्थापन गरी खाद्यान्न लगायतका पसलहरु सञचालन गर्न दिर्नेशन दिइएको छ ।

कोरोना संक्रमणका कारण जिल्लामा दुई साताको अवधिमा १३ जनाको मृत्यु भएको छ । अहिलेसम्म जिल्लामा कोरोना संक्रमितको संख्या २ सय ५३ पुगेको छ ।

प्रकाशित : वैशाख २५, २०७८ १५:३९
प्रतिक्रिया
पठाउनुहोस्

पृथ्वीचन्द्र अस्पतालमा कोरोनाबाट एकैदिन ४ को मृत्यु 

नवीन पौडेल

परासी — पश्चिम नवलपरासीमा कोरोना संक्रमणको कारण शनिबार एकै दिन ४ जनाको मृत्यु भएको छ । चारै जनाको पृथ्वीचन्द्र जिल्ला अस्पतालमा उपचारको क्रममा मृत्यु भएको हो ।



मृत्यु हुनेमा बर्दघाट नगरपालिका-४ का ७८ वर्षीय पुरुष, रामग्राम नगरपालिका-१६ का ६२ वर्षीय पुरुष , वडा नम्बर ४ का ४४ वर्षीय एक पुरुष र सुस्ता गाउँपालिका-५ का ३५ वर्षीय पुरुष रहेको स्वास्थ्य कार्यालय पश्चिम नवलपरासीका प्रमुख कृष्णप्रसाद पोखरेलले बताए ।

योसहित दोस्रो लहरको संक्रमणका कारण जिल्लामा १३ जनाले ज्यान गुमाएका छन् ।

यसैगरी पूर्वी नवलपरासीमा कोरना संक्रमणबाट जिल्लाको देवचुली र गैंडाकोट नगरपालिकाका एक/एक जना पुरुषको मृत्यु भएको छ ।

होम आइसोलेसनमा बसेका उनीहरुलाई श्वास प्रश्वासमा समस्या आएपछि उपचारको क्रममा भरतपुर अस्पतालमा मृत्यु भएको स्वास्थ्य कार्यालय पूर्वी नवलपरासीका प्रमुख केशव प्रसाद चापागाईंले बताए ।


प्रकाशित : वैशाख २५, २०७८ १५:३७
पूरा पढ्नुहोस्
प्रतिक्रिया
पठाउनुहोस्
×