चन्द्रपुरमा व्यवसायी आफैंले बन्द गरे पसल

संक्रमण बढ्न थालेपछि आमनागरिकलाई कोरोना जोखिमबाट जोगाउन पसलहरू बन्द गरेको कपडा तथा फेन्सी व्यवसायी संघ चन्द्रनिगाहपुरका अध्यक्ष श्रीराम न्यौपाने बताए । ‘पसलमा दिनहुँ मानिसको भीड लाग्न थाल्यो । संक्रमण पनि त्यहीअनुसार बढ्दै गएको छ,’ उनले भने, ‘यस्तो अवस्थामा झनै जोखिम हुन्छ । त्यही भएर सल्लाहमै पसलहरू बन्द गराएका हौ ।’ हाललाई वैशाख मसान्तसम्म बन्द गरिएको हो ।

नगरपालिका र स्थानीय प्रशासनले बन्द गराउनुपर्नेमा सम्बन्धित निकायले चासो नदेखाएको व्यवसायीको गुनासो छ । सरकारले संक्रमणका अवस्था हेरी निषेधाज्ञासहित बन्द गर्ने सम्पूर्ण अधिकार प्रशासन र स्थानीय तहलाई दिइएको छ । तर चन्द्रपुरले हाटबजार मात्र बन्द गर्न आग्रह गरेको छ । बजार चोकका पसलमा दिनहुँ भीडभाड हुने गरेको छ । यसतर्फर् नगरपालिकाले चासो नदेखाएको व्यवसायीहरूको भनाइ छ ।

यस्तै, जिल्लास्थित सरकारी कार्यालयहरू पनि धमाधम बन्द गर्न थालिएको छ । संक्रमण बढ्न थालेपछि भीडभाड हुने मालपोत कार्यालय गौर र गरुडा बन्द भएका हुन् । यी दुवै कार्यालयमा सेवाग्राहीको भीड लाग्थ्यो । चन्द्रपुरले नगरपालिका र सबै वडाहरू बन्द गरेको छ ।

संक्रमण बढ्न नदिन कार्यालय बन्द गर्नुपरेको मेयर रामचन्द्र चौधरीले सुनाए । मौलापुर, चन्द्रनिगाहपुरमा रहेको मालपोत कार्यालय भने सुचारु छन् । प्रमुख जिल्ला अधिकारी इन्द्रदेव यादवले अवस्था हेरेर कार्यालयहरू बन्द गर्ने जनाए ।

‘पहिलो चरणमा जिल्लाभरिका सबै हाटबजारहरू बन्द गराएका छौं,’ उनले भने, ‘संक्रमणको अवस्था हेरेर विस्तारै सबै कार्यालय बन्द गराउँछौं ।’ जिल्लामा बुधबारसम्म १ सय ६५ जनामा संक्रमण पुष्टि भइसकेको छ । २ जनाको मृत्यु भएको छ । जिल्लामा बन्द भएका आइसोलेसन धमाधम सञ्चालन गर्न थालिएको प्रशासनले जनायो । अहिले अधिकांश संक्रमितहरू घरमै बसेका छन् । उनीहरूको अवस्था सामान्य छ ।