वीरगन्ज महानगरपालिकाले एकसय शय्याको अस्थायी कोभिड अस्पताल सञ्चालन गर्ने
वीरगन्ज — वीरगन्ज महानगरपालिकाले एक/एक सय शय्या क्षमताको अस्थायी कोभिड अस्पताल र आइसोलेसन सेन्टर सञ्चालन गर्ने भएको छ । अस्पतालमा बिरामी भरिएकाले महानगरपालिकाले शुक्रबारदेखि अस्थायी कोभिड अस्पताल र आइसोलेशन सेन्टर सञ्चालन गर्न लागेको मेयर विजयकुमार सरावगीले जनाए ।
होम आइसोलेसनमा अक्सिजन प्रयोग गरिरहेका बिरामीहरुको अवस्था समेत जटिल बन्न थालेकोले चिकित्सकको निगरानीमा उपचार गर्नका लागि महानगरपालिकाले कोभिड अस्पताल सञ्चालनमा ल्याउन लागेको मेयर सरावगीले बताए । वीरगन्ज महानगरपालिका– १० घडिअर्वास्थित गोपाल मण्डली धर्मशालामा अस्थायी कोभिड अस्पताल र आइसोलेसन सेन्टर सञ्चालन गरिने उनले बताए ।
अस्थायी अस्पतालमा चिकित्सकसहित प्यारामेडिकल स्टाफ समेत रोखर संक्रमितको उपचार गरिनेछ । त्यहाँ अक्सिजनसहितको बेड पनि हुने मेयर सरावगीले बताए । उनले भने, ‘होम आइसोलेसनमा रहेका अक्सिजन प्रयोग गर्नुपर्ने संक्रमितहरुलाई अस्थायी कोभिड अस्पतालमा उपचार गरिनेछ । होम आइसोलेशनमा रहेका बिरामीलाई चिकित्सकको निगरानीमा अक्सिजन दिनुपर्ने अवस्था देखिएको छ, त्यस्ता संक्रमितलाई महानगरको कोभिड अस्पतालमा उपचार गर्छौं।’ कोभिड अस्पतालमा उपचारार्थ भर्ना भएका संक्रमितलाई अक्सिजन, औषधि र खाजा, खाना समेत महानगरपालिकाले निःशुल्क रुपमा उपलब्ध गराउने उनले जनाए ।
महानगरपालिकाले केही दिन अघि मात्र एम्बुलेन्स, शव वाहन सेवा सञ्चालनमा ल्याएको छ । त्यसैगरी लायन्स क्लबको साझेदारीमा कोभिड संक्रमितहरुको निःशुल्क अक्सिजन सिलिण्डर उपलब्ध गराउँदै आएको छ ।
प्रकाशित : वैशाख २१, २०७८ २१:०८