पर्सामा थपियो निषेधाज्ञा- प्रदेश २ - कान्तिपुर समाचार

पर्सामा थपियो निषेधाज्ञा

शंकर आचार्य

पर्सा — पर्सामा निषेधाज्ञा अवधि थपिएको छ । वैशाख १६ गते बिहान ४ बजेदेखि वैशाख २२ गते राति १२ बजे सम्मका लागि जिल्लाभरि लागू गरिएको निषेधाज्ञालाई वैशाख ३० गते राति १२ बजे सम्मका लागि थपिने भएको छ ।

वैशाख ३० गते राति १२ बजे सम्म निषेधाज्ञा थप्ने निर्णय मंगलबार जिल्ला कोभिड–१९ संकट व्यवस्थापन केन्द्रको बैठकले गरेको सहायक प्रमुख जिल्ला अधिकारी भीमकान्त पौडेलले जानकारी दिए ।

प्रमुख जिल्ला अधिकारी पिताम्बर घिमिरेको अध्यक्षतामा बसेको बैठकले कोभिड–१९ को संक्रमणको श्रृङ्खला तोड्न निषेधाज्ञा उपयोगी रहेको ठहर गर्दै निषेधाज्ञा थप गर्ने निर्णय गरेको उनले बताए ।

बैठकले जिल्लाका अक्सिजन उत्पादक उद्योगहरुलाई पूर्ण क्षमतामा सञ्चालन गर्न अनुरोध गर्ने र यसका लागि चाहिने उद्योगहरुलाई आवश्यक सहयोग गर्ने निर्णय समेत गरेको छ । उद्योगहरुबाट उत्पादन हुने अक्सिजन तत्काललाई अस्पताल क्षेत्र बाहेक अन्य क्षेत्रलाई आपूर्ति गर्न नदिएर हाल उत्पादित अक्सिजन स्वास्थ्य क्षेत्रमा उपलब्ध गराउन मात्र लगाउने निर्णय समेत बैठकले गरेको छ । अक्सिजन उद्योगहरुबाट हुने अक्सिजनको उत्पादन, भण्डारण र बिक्री वितरणको दैनिक अनुगमन र प्रतिवेदन गर्ने व्यवस्था जिल्ला प्रशासन कार्यालयले गर्ने निर्णय समेत बैठकले गरेको छ ।

यसका साथै कोरोना संक्रमितको उपचार गर्न वीरगन्ज महानगरपालिकाको कार्यालयद्वारा वीरगन्ज महानगर क्षेत्रभित्र उपयुक्त स्थानमा १ सय शैया क्षमताको कोभिड–१९ अस्थायी अस्पताल र १ सय शय्या क्षमताको आइसोलेसन सेन्टर स्थापना गरी सञ्चालनमा ल्याउने निर्णय समेत गरेको छ ।

कोरोना परीक्षण कार्यलाई सहज बनाउन वीरगन्ज महानगरपालिकाले उपयुक्त स्थानमा स्वाब संकलन केन्द्र स्थापना गरी संकलित स्वाब परीक्षण नारायणी अस्पतालमा गर्ने व्यवस्था मिलाउने निर्णय पनि बैठकले गरेको सहायक प्रजिअ पौडेलले जानकारी दिए ।

बैठकमा वीरगन्ज महानगरपालिकाका प्रमुख बिजय कुमार सरावगी विशेष आमन्त्रितको रुपमा सहभागी रहेका थिए ।

प्रकाशित : वैशाख २१, २०७८ १६:२७
प्रतिक्रिया
पठाउनुहोस्

उपत्यका बाहिर जान १० दिन क्वारेन्टाइनमा बस्‍ने पालिकाको पत्र अनिवार्य

कान्तिपुर संवाददाता

काठमाडौँ — काठमाडौं उपत्यका बाहिर जानका लागि १० दिन क्वारेन्टाइनमा बस्‍ने सम्बन्धित स्थानीय तहको सिफारिस अनिवार्य हुने भएको छ । मंगलबार बसेको उपत्यकाका तीन जिल्लाका प्रमुख जिल्ला अधिकारीहरुको बैठकले सम्बन्धित गाउँपालिका वा नगरपालिकाले अनिवार्य रुपले १० दिन क्वारेन्टिन राख्ने प्रतिबद्धतासहितको सिफारिसका आधारमा मात्र जान दिने निर्णय गरेको हो ।

त्यस्तै पत्रकार तथा सञ्‍चारकर्मीलाई सूचना विभागको प्रेस पासका आधारमा आवतजावतमा सहजीकरण गर्ने र विभागको प्रेस पास नभएका सञ्‍चारकर्मी/कर्मचारीको हकमा सम्बन्धित सञ्‍चार गृहहरुले न्यूनतम कर्मचारीहरु मात्र खटाउने र सोको विवरण जिल्ला प्रशासन कार्यालयमा उपलब्ध गराउनु पर्ने निर्णय गरिएको छ ।

बैठकले वैशाख १६ गतेदेखि काठमाडौं उपत्यकामा लगाइएको निषेधाज्ञालाई झन् कडा पार्दै २९ गतेसम्म लम्ब्याउने निर्णय गरेको छ ।

बैठकले बैंक तथा वित्तीय संस्थाको हकमा काठमाडौं उपत्यकामा २५ प्रतिशत शाखा कार्यालयहरु मात्र खुला गर्ने र केन्द्रीय कार्यालयहरुले २० प्रतिशत मात्र जनशक्ति प्रयोग गरी कार्य सञ्‍चालन गर्ने व्यवस्था मिलाउने र सो को विवरण नेपाल राष्ट्र बैंक जिल्ला प्रशासन कार्यालयलाई दिनुपर्ने निर्णय गरेको जिल्ला प्रशासन कार्यालय ललितपुरका सहायक प्रमुख जिल्ला अधिकारी ललितकुमार बस्नेतले जानकारी दिए ।

थप निर्णयहरु

  • अत्यावश्यक सेवाबाहेकका सरकारी कार्यालय, सार्वजनिक संस्था संस्थान, बिमा लगायतका कार्यालयहरु एक चौथाइ कर्मचारीमात्र उपस्थित हुने गरी सञ्‍चालन गर्न व्यवस्था मिलाउने ।
  • सरकारी कार्यालयको हकमा मन्त्रालयको सचिव वा विभागीय प्रमुखद्वारा जारी गरेको सवारी पास र परिचय पत्रका आधारमा आवातजावत गर्न दिने ।
  • बैंक तथा वित्तीय संस्थाको हकमा काठमाडौं उपत्यकामा २५ प्रतिशत शाखा कार्यालयहरु मात्र खुला गर्ने र केन्द्रीय कार्यालयहरुले २० प्रतिशत मात्र जनशक्ति प्रयोग गरी कार्य सञ्‍चालन गर्ने व्यवस्था मिलाउने । सो को विवरण नेपाल राष्ट्र बैंक जिल्ला प्रशासन कार्यालयलाई दिने ।
  • बैंक तथा वित्तीय संस्थाका सवारी साधन सञ्‍चालनको हकमा सीमित सवारी पास जारी गरी सो को विवरण नेपाल राष्ट्र बैंक र जिल्ला प्रशासन कार्यालयलाई दिने ।
  • अत्यावश्यक कार्य, बिरामी, कुरुवा, मृत्यु संस्कार तथा मलामीको हकमा विषय खुल्ने कागजात र सम्बन्धित स्थानीय तहको सिफारिसमा जिल्ला प्रशासन कार्यालयले सहजीकरणको व्यवस्था मिलाउने ।
  • विकास निर्माण सम्बन्धमा सम्बन्धित आयोजनाहरुले नै आवासीय कामदार राखी अनिवार्य रुपले स्वास्थ्य मापदण्ड पालना गरी कार्य सञ्‍चालन गर्ने/गराउने
  • फुटपाथ तथा खुला ठाउँ तथा ठेलागाडा वा साइकलमा सञ्‍चालन हुने विभिन्‍न व्यापार व्यवसाय सञ्‍चालन एवं कवाडी स‌ंकलन गर्न रोक लगाउने

प्रकाशित : वैशाख २१, २०७८ १६:२०
पूरा पढ्नुहोस्
प्रतिक्रिया
पठाउनुहोस्
×