सप्तरीमा एकै परिवारका ११ जनामा कोरोना पुष्टि- मधेस - कान्तिपुर समाचार

सप्तरीमा एकै परिवारका ११ जनामा कोरोना पुष्टि

अवधेश झा

राजविराज — सप्तरीमा आइतबार एकै परिवारका ११ जनासहित १५ जनामा कोरोना संक्रमण पुष्टि भएको छ । संक्रमण देखिएका सबैमा लक्षण समेत देखिएको छ ।

डाक्नेश्वरी नगरपालिका तरहीका एकै परिवारका ११ जनामा संक्रमण पुष्टि भएको गजेन्द्रनारायण सिंह अस्पताल राजविराजका मेडिकल सुपरिटेन्डेन्ट डाक्टर रञ्जित झाले जानकारी दिए ।

तरहीकी ९५ वर्षीया महिला उपचारका लागि केही दिनअघि बिपी कोइराला स्वास्थ्य विज्ञान प्रतिष्ठान धरानमा भर्ना हुँदा उनको परीक्षणका क्रममा संक्रमण पुष्टि भएको थियो । वृद्ध महिलामा संक्रमण पुष्टि भएपछि उनको परिवारका १५ जनाको पीसीआर परीक्षण गर्दा ११ जनामा संक्रमण पुष्टि भएको डाक्टर झाले जानकारी दिए ।

ती परिवारका ६० वर्षीय एक पुरुष केही दिनअघि मात्र भारतको राजस्थानबाट फर्किएको डाक्टर झाले जनाए । संक्रमित ११ जना होम आइसोलेसनमा छन् ।

मेसु डाक्टर झाका अनुसार गजेन्द्रनारायण सिंह अस्पतालको प्रयोगशालामा गरिएको परीक्षणका क्रममा अस्पतालको आकस्मिक कक्षमा उपचाररत २ जना, हनुमाननगर कंकालिनी नगरपालिका र तिलाठी कोइलाडी गाउँपालिकाका १-१ जना मा संक्रमण पुष्टि भएको डाक्टर झाले जनाए ।

प्रकाशित : वैशाख १२, २०७८ १८:५६
प्रतिक्रिया
पठाउनुहोस्

ललितपुर प्रशासनमा पनि अत्यावश्यकबाहेकका सेवा एक साताका लागि बन्द 

प्रशान्त माली

ललितपुर — ललितपुर जिल्ला प्रशासन कार्यालयमा सोमबारबाट एक साताका लागि अत्यावश्यकबाहेकका सेवा स्थगित गरिएको छ ।

कोभिड संक्रमित प्रत्येक दिन बढ्दै गएकाले यस्तो निर्णय गरिएको जानकारी सहायक प्रमुख जिल्ला अधिकारी ललितकुमार बस्नेतले दिए । उनले अन्य कार्यालयमा पनि भीडभाड हुन नदिन आलोपालो पद्धतिबाट सेवा दिने व्यवस्था मिलाउन भनिसकेको बताए ।

जिल्लामा मालपोत, नापी, यातायात व्यवस्था कार्यालय, टेलिकम गरेर ६३ वटा कार्यालय छन् । प्रशासनबाट उपलब्ध गराउँदै आएको नयाँ नागरिकता, नागरिकता प्रतिलिपि र नाबालक परिचयपत्र, राहदानी वितरण तथा सिफारिस, हातहतियार, संस्था दर्ता तथा नवीकरण र पत्रपत्रिका दर्ता एक साताका लागि स्थगित गरिएको छ ।

शान्ति सुरक्षासँग सम्बन्धित निवेदन र मुद्दासँग सम्बन्धित काम र अन्य अत्यावश्यक सिफारिसहरु भने सुचारु हुने बस्नेतले बताए ।

प्रकाशित : वैशाख १२, २०७८ १८:५१
पूरा पढ्नुहोस्
प्रतिक्रिया
पठाउनुहोस्
×