सिरहा — सौर्य सिमेन्ट उद्योगमा कार्यरत शिवकुमार यादवलाई उनकै काकाका छोराले हत्या गरेको खुलेको छ । मिर्चैया नगरपालिका–७ का २४ वर्षीय शिवको हत्या मृतकका आफ्नै काकाका छोरा २७ वर्षीय विष्णु यादव र उनका जेठान मिर्चैया–९ का २४ वर्षीय इन्द्रदेव यादवले गरेको स्वीकार गरेका प्रहरीले बताएको छ ।

उनीहरूलाई मंगलबार पुर्पक्षका लागि कारागार चलान गरिएको जिल्ला प्रहरी कार्यालयले जनाएको छ । शिवकुमारको शव हत्या भएको अवस्थामा गत चैत ९ गते बिहान मिर्चैया नगरपालिका–१ स्थित पूर्व–पश्चिम राजमार्ग छेउको आँपको बगैंचामा फेला परेको थियो । शिवकुमारको हत्याको ५ दिनपछि प्रहरीले दुवै अभियुक्त सार्वजनिक गरी अपहरण तथा कर्तव्य ज्यान कसुरमा मुद्दा चलाएको थियो । शिवकुमारको हत्या आफूहरूले नै गरेको उनीहरूले बयान दिएका प्रहरीले बताएको छ ।

परिवारिक रिसइबी साध्ने मनसायले विष्णुले जेठान इन्द्रदेवको सहयोगमा शिवकुमारको हत्या गरेको प्रहरीलाई दिएको बयानमा उल्लेख छ । हत्याका अभियुक्त विष्णु करिब दुई वर्षअघि लागूऔषधसहित पक्राउ परेका थिए । जिल्ला अदालत सिरहाले उनलाई २ वर्षको कैद सजाय सुनाएको थियो । त्यसपछि उनी कारागार चलान भए । उनी कारागारमा रहेका बेला उनका परिवार र शिवकुमारबीच वादविवाद भएको थियो । जेल भुक्तान गरी घर आएपछि विष्णुले शिवकुमारसँग रिसइबी साध्ने योजना बनाए ।

चैत ७ मा चोहर्वामा विष्णु र इन्द्रदेवले हत्याको योजना बुने । त्यस दिन शिवकुमार भारतको जयनगर गएका थिए । फर्केपछि विष्णुले शिवकुमारलाई फोन गरेर भेट्न समय मागे । भाइसँगको कुराकानीपछि साँझ ७ बजेतिर शिवकुमार घरबाट निस्किए । प्रहरीका अनुसार मिर्चैयास्थित एक होटलमा त्यही दिन बेलुका ८ बजेतिर शिवकुमार, विष्णु र इन्द्रदेवको भेट भयो । होटलमा उनीहरूले खाजा खाएर निस्किए ।

मिर्चैयास्थित जीवा खोलानजिक पुगेपछि विष्णुले शिवकुमारलाई काम छ भन्दै आफू सवार मोटरसाइकलमा बस्न लगाए । तीनै जना एउटै मोटरसाइलमा चढेर नजिकैको आँप बगैंचामा गए । त्यहीं विष्णुले धारिलो हतियारले शिवकुमारको हत्या गरे र शवलाई बगैंचामा घरको भत्केको पर्खालले छोपिदिए । उनको मोबाइल पनि त्यहीँ बालुवामा गाडेर दुवैजना भागेका थिए ।

चैत ८ गते बिहान ६ बजेतिर चोहर्वाबाट विष्णु र इन्द्रदेवले शिवकुमारको घरको मोबाइलमा तीन/चार पटक फोन गरे तर उठेन । भाइ घर नफर्केपछि शिवकुमारका दाइ रामकुमारले उही नम्बरमा आफ्नो मोबाइलबाट फोन गरे । उताबाट हिन्दीमा ५० लाख रुपैयाँ लिएर आए मात्रै भाइलाई छोडिदिने नत्र मारिदिने धम्की आयो ।

प्रहरीको गस्ती टोलीले चैत ८ गते राति ११ बजेतिर जीवाखोला पुलनजिक बेवारिसे मोटरसाइकल फेला पार्‍यो । भोलिपल्ट बिहानसम्म मोटरसाइकल खोजी गर्न कोही नआएपछि मोटरसाइकल भेटिएको ठाउँ वरपर जाँचका क्रममा रगतको छिटा लागेको भेटियो । छिटा पछ्याउँदै जाँदा आँपको बगैंचामा शिवकुमारको शव प्रहरीले फेला पारेको थियो ।

इप्रका मिर्चैया र प्रदेश प्रहरी कार्यालयबाट प्रहरी नायब उपरीक्षक ज्ञानकुमार महतो कमान्डको प्रहरी टोलीले अनुसन्धान सुरु गरेर विष्णु र इन्द्रदेवलाई पक्राउ गर्न सफल भएको हो । अन्ततः दुवैले हत्या गरेको स्वीकारसमेत गरेका प्रहरीको भनाइ छ ।

२०७६ वैशाख १८ मा सिरहा अर्नमाकी रञ्जनाको बिहे शिवकुमारसँग भएको थियो । रञ्जनाको काखमा अहिले ३ महिनाकी छोरी छन् । पछिल्लो एक वर्षदेखि शिवकुमार सिमेन्ट उद्योगमा छाना छाउने काम गर्दै आएका थिए । दिनको ड्युटी सकाएर घर आई खाना खाएर पुनः राति पनि काममा जान्थे । दिनहुँ अबेर रातिसम्म भए पनि घर फर्किन्थे । रञ्जनाका अनुसार चैत ७ को साँझ ७ बजेतिर उनी राति पनि काम गर्नुपर्छ भन्दै घरबाट निस्केका थिए । उनले काम छ भनेर १० हजार रुपैयाँ पनि मागेका थिए । तर चैत ८ को बिहान साढे ६ बजेतिर फोन गर्दा लागेन । सबै आत्तिए । खोजी सुरु भयो । अन्ततः भोलिपल्ट मात्रै उनको शव भेटियो ।

त्यसयता रञ्जना विक्षिप्त छिन् । ‘जीवन रहेर पनि सास नभएको जस्तै भयो,’ उनी भन्छिन्, ‘मेरो जीवनको खम्बा नै तोडियो ।’ बुबा जुगुत यादवको मन पीडाले भारी छ । शिवकुमारको हत्यापछि सिंगो परिवारमा यतिखेर सन्नाटा छाएको छ ।