प्रादेशिक प्रयोगशालामै छैन जनशक्ति- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

प्रादेशिक प्रयोगशालामै छैन जनशक्ति

एक वर्षदेखि तलब–भत्ता नपाएपछि ३६ जना कर्मचारी चैत दोस्रो सातादेखि काममा आएका छैनन्
श्यामसुन्दर शशि

जनकपुर — कोरोना भाइरसको संक्रमण तीव्र भइरहेको बेला प्रदेश २ को प्रादेशिक जनस्वास्थ्य प्रयोगशालामा कर्मचारी अभाव भएको छ । एक वर्षदेखि तलब–भत्ता नपाएपछि प्रयोगशालामा विभिन्न तहमा कार्यरत ३६ जना कर्मचारी चैत दोस्रो सातादेखि काममा आएका छैनन् । कर्मचारी नहुँदा पीसीआर परीक्षण प्रभावित बनेको छ । 


नियमित कर्मचारीहरूले काम रोके पनि तीन जना प्राविधिकलाई ‘अनरिक्वेस्ट’ मा राखेर स्वाब संकलन तथा परीक्षण भइरहेको प्रयोगशालाका प्रमुख डा.श्रवणकुमार मिश्रले जानकारी दिए । उनका अनुसार पछिल्लो समय स्वाब परीक्षण गर्न आउनेको संख्या ह्वात्तै बढेको छ । परीक्षण गरिएकामध्ये ३३ देखि ४८ प्रतिशतमा कोरोना पुष्टि भइरहेको मिश्रले बताए । संक्रमण देखिएकाको कन्ट्याक्ट ट्रेसिङ ठूलो चुनौती बनेको उनको भनाइ छ । पहिलो लहरको संक्रमणको बेला ट्रेसिङमा स्थानीय तह र प्रहरीले महत्त्वपूर्ण भूमिका निर्वाह गरेका थिए । तर यसपटक ती सबै निकाय मौन छन् ।

संक्रमण बढ्न थालेपछि अध्ययन तथा रोजगारीका लागि भारत गएका नेपालीहरू घर फर्किन थालेका छन् । यसका अतिरिक्त कुनै पनि रोगको शल्यक्रिया गराउनुअघि पीसीआर रिपोर्ट अनिवार्य गरिएको छ । कोरोनाका शंकास्पद बिरामीलाई पनि चिकित्सकहरूले पीसीआर जाँच गराउन सल्लाह दिन्छन् । तर, प्रादेशिक प्रयोगकशालामा जनशक्ति नहुँदा पीसीआर परीक्षणमा ढिलाइ हुने गरेको छ । पहिलो लहरको संक्रमणका बेला ३ मोइक्रोबायोलोजिस्ट, ९ बीएमएलटी, ४ सीएमएलटी, २ ल्याब असिस्टेन्ट, ३ सफाइकर्मी, ३ चालक, ३ गार्ड र केही कार्यालय सहयोगी गरी कुल ३८ जना कर्मचारी प्रयोगशालामा नियुक्त गरिएको थियो । तर, उनीहरूले सुरुको २६ दिनको मात्र तलब पाएका छन् । कोरोना पहिचान र रोकथाममा खटिएकाले उनीहरुले भत्ता समेत पाएनन् । प्रदेश २ सामाजिक विकास मन्त्रालयले मन्त्रीस्तरीय निर्णय गरेर प्रयोगशालामा कर्मचारीलाई करार सेवामा पदपूर्ति गर्न निर्देशन दिएको थियो । प्रयोगशालाले भदौ ७ गते पदपूर्तिसम्बन्धी सूचना पनि प्रकाशित गरेको थियो । त्यही सूचनाअनुसार करार सेवाका ३८ जना कर्मचारी नियुक्त भएका थिए । ‘हामीले विधिवत् नियुक्ति पाएका हौं । तर पनि तलब भत्ताबाट वञ्चित हुनुपरेको छ,’ प्रयोगशालामा ल्याब टेक्निसियन जीवछ मण्डलले भने ।

सामाजिक विकास मन्त्रालयका उपसचिव ठूलोबाबू दाहालले प्रयोगशालामा कार्यरत कर्मचारीको नियुक्ति रीतपूर्वक नभएकाले तलब–भत्ता रोकिएको बताए । दाहालले भने, ‘मन्त्रिपरिषद्बाट दरबन्दी स्वीकृत गराएर मात्र कर्मचारी नियुक्ति गर्न मिल्छ ।’ प्रयोगशालाका प्रमुख मिश्रका अनुसार सामाजिक विकास मन्त्रालयबाट कर्मचारीहरूको दरबन्दी स्वीकिृत गरिएको छैन । ‘प्रयोगशालाको ल्याब सञ्चालन गर्न कर्मचारी अभाव नहोस् भनेर पहल भइरहेको छ । कर्मचारीहरूको मर्कालाई पनि ध्यानमा राखिएको छ,’ मिश्रले भने ।

शनिबार प्रदेश २ मा ६९ जनामा संक्रमण पुष्टि भएको छ, जसमध्ये प्रादेशिक प्रयोगशालामा २६ जनाको मात्र परीक्षण गरिएको छ । हाल प्रदेशभर ३ सय ५३ जना सक्रिय संक्रमित छन् ।

प्रकाशित : वैशाख ५, २०७८ ०९:३४
प्रतिक्रिया
पठाउनुहोस्

अस्पतालमा बिरामी खचाखच

ठाउँ नभएपछि आपत्कालीन कक्षमा र भुइँमा राखेर उपचार
कमल पन्थी

बर्दिया — कोरोना संक्रमितका लागि छुट्टै आइसोलेसन कक्ष र बेड अभाव खट्किएका बेला बर्दियाको जिल्ला अस्पताल बिरामीले भरिएको छ । गर्मी र प्रदूषण बढेपछि विभिन्न रोगीको संख्या बढेको हो ।

बर्दियाको जिल्ला अस्पतालमा उपचाररत बिरामी । तस्बिर : कमल पन्थी/कान्तिपुर

५० शय्याको अस्पतालका बेड भरिभराउ छन् । ठाउँ नभएपछि शनिबार आपत्कालीन कक्षमा समेत बिरामी खचाखच थिए । नयाँ बिरामी भर्ना गरेर उपचार गर्न समस्या भएको छ । छिमेकी जिल्ला बाँकेको नेपालगन्जस्थित अस्पतालमा संक्रमितले गर्दा बेड पाउन समस्या भएपछि यहाँ कोरोनाबाहेकका बिरामीको चाप एक्कासि बढेको बताइएको छ ।

चिकित्सकका अनुसार श्वासप्रश्वास, झाडापखाला, रक्तअल्पता, ज्वरोलगायत बिरामीले अस्पताल भरिएको छ । यसबाहेक पेट र टाउको दुख्ने, मधुमेह, रक्तचापलगायत समस्या भएका बिरामी पनि दिनहुँ बढिरहेका छन् । शुक्रबार तीनवटा शय्या थपेर बिरामीको उपचार गरिएको थियो । शनिबार पनि बिरामी थपिएपछि भुइँमा राखेर उपचार गर्नुपरेको अस्पतालले जनाएको छ । यहाँ अधिकांश बिरामी बर्दिया र केही बाँकेका छन् । दुर्घटनालगायत गम्भीर अवस्थामा आउने बिरामीलाई आपत्कालीन कक्षमा बेड थपेर उपचार गर्न थालिएको छ । यसरी नै बिरामी बढ्दै जाने हो भने थेग्न नसक्ने अस्पतालले जनाएको छ ।

मधुवन नगरपालिका–५ का रोशन खड्का शनिबार मधुमेह बढेपछि जिल्ला अस्पताल आए । विगतमा नेपालगन्ज पुगेर उपचार गराउँदै आएका उनले अहिले कोरोनाको त्रासले त्यहाँ जाने अवस्था नरहेको बताए । ‘राम्रो उपचार यहीं हुन्छ भने कोरोना महामारी फैलिएको नेपालगन्ज किन जाने भनेर यहाँ आएको हुँ,’ उनले भने । उनीजस्तै गुलरिया–१ की देवमाया सुनार पनि रक्तचाप र मधुमेहकी बिरामी हुन् । उनले रेडियो, टीभी र पत्रपत्रिकामा नेपालगन्जमा कोरोनाको त्रासले भयावह अवस्था भएको थाहा पाएपछि उपचारका लागि जिल्ला अस्पताल आएको बताइन् ।

बर्दिया जिल्ला अस्पतालका मेडिकल सुपरिटेन्डेन्ट (मेसु) डा. सुभाष पाण्डेयले बाँकेको कोहलपुर र नेपालगन्जका अस्पताल कोभिडका कारण भरिभराउ भएपछि रिफर गर्ने बिरामी पनि यहीं उपचार गराइरहेको बताए । जनशक्ति कम भए पनि चिकित्सकबाट उपचारमा कुनै कमी नभएको उनले दाबी गरे । जिल्ला अस्पतालमा तीन विशेषज्ञ चिकित्सकको दरबन्दी भए पनि अहिले एक जना मात्र कार्यरत छन् । मेडिकल अधिकृत आठ, नर्सिङ स्टाफ २१ जना कार्यरत रहेको अस्पतालले जनाएको छ । कतिपय बिरामीलाई अक्सिजन चढाएर राखिएको छ । अक्सिजन सिलिन्डर सकिनुअगावै नेपागन्जबाट मगाउने गरिएको मेसु पाण्डेयले जनाए । संक्रमण बढे पनि जिल्ला अस्पतालमा आउने बिरामीलाई जोखिम मोलेरै भए पनि उपचारमा कुनै कमी नगरेको चिकित्सकले जनाएका छन् ।

जिल्ला अस्पतालको बहिरंग सेवामा अहिले दैनिक २ सय ५० देखि ३ सयको हाराहारीमा बिरामी उपचारका लागि आउने गरेको मेडिकल अधिकृत मनु दहितले बताए । कोरोनाको जोखिम मोलेरै चिकित्सकले उपचार गरिरहेको उनले जनाए । बिरामीको संख्या बढ्दै गएपछि चिकित्सकले संक्रमण नफैलियोस् भन्दै सुरक्षित रूपमा उपचारमा लागेका छन् । माइकबाट बोलाएपछि टिकट काटेका बिरामी पालैपालो भित्र छिर्छन् । आईसीयू र भेन्टिलेटर नहुँदा जटिल बिरामी बाध्य भई थप उपचारका लागि बाहिर जानुपर्ने अवस्था छ । जिल्ला अस्पतालमा सिकलसेलको परीक्षण निःशुल्क व्यवस्था गरिएको छ ।

प्रकाशित : वैशाख ५, २०७८ ०९:३०
पूरा पढ्नुहोस्
प्रतिक्रिया
पठाउनुहोस्
×