गाउँपालिकाको केन्द्र सार्ने विषयमा झडप, प्रहरीद्वारा अश्रुग्यास प्रहार- प्रदेश २ - कान्तिपुर समाचार

गाउँपालिकाको केन्द्र सार्ने विषयमा झडप, प्रहरीद्वारा अश्रुग्यास प्रहार

ओमप्रकाश ठाकुर

काठमाडौँ — सर्लाहीको चन्द्रनगर गाउँपालिकाको केन्द्र सार्न लागेको भन्दै स्थानीयले गाउँपालिकाका अध्यक्ष महेन्द्र महतोका स्वकीय सचिवलाई आक्रमण गर्न खोजेपछि प्रहरीले स्थिति नियन्त्रणमा लिन अश्रुग्यास प्रहार गरेको छ ।

गाउँपालिकाका अध्यक्ष महेन्द्र महतोको स्वकीय सचिव रामकैलाश साहलाई केन्द्र सार्ने निहुँमा स्थानीय आक्रमणमा उत्रिएपछि प्रहरीले समान्य बल प्रयोग गरेका थिए । प्रदर्शनकारीले प्रहरीमाथि नै ढुंगामुढा गर्न थालेपछि १३ राउन्ड अश्रुग्यास प्रहार गरी भीड नियन्त्रणमा लिएको प्रहरी उपरीक्षक सन्तोष सिंह राठौरले बताए । प्रहरीसँगको झडपमा परेर डेढ दर्जन घाइते भएका छन् भने चार प्रहरी घाइते छन् । घाइते सबैको अवस्था सामान्य छ । ‘कार्यालय सार्न खोजेको भन्दै एक समूहले अध्यक्षज्युको स्वकीय सचिवमाथि आक्रमण गर्न थालेपछि हामीले बल प्रयोग गर्‍यौं, हामी माथि पनि ढुंगामुढा हुन थाल्यो,’ उनले भने, ‘स्थिति नियन्त्रणमा लिन नेपाल प्रहरीको तर्फबाट १० र सशस्त्र प्रहरीको तर्फबाट ३ राउन्ड अश्रुग्यास प्रहार गर्नुपर्‍यो, अहिले अवस्था सामान्य छ ।’ गाउँपालिकाको केन्द्र रहेकै वडाको रहेका साहलाई सुरक्षाका लागि सदरमुकाम मलंगवा ल्याइएको प्रहरी उपरीक्षक राठौरको भनाइ छ ।

गाउँपालिकाको वडा नम्बर ७ स्थित नाढी मन तालको छेउमा रहेको कार्यालय वडा नम्बर २ बबरगञ्जमा सार्न खोजेको भन्दै गाउँपालिकाका वडा नम्बर ६ र ७ का स्थानीय विरोधमा उत्रेका थिए । प्रदर्शनकारीहरुले गाउँपालिकाको भवन अहिलेकै स्थान नाढीमन तालमै व्यवस्थापन गरेर राख्नु पर्ने माग राख्दै आएका छन् । प्रदर्शनकारीले भने गाउँपालिकाका अध्यक्षले आफ्नो गाउँमा केन्द्र राख्न चलखेल गरेको आरोप लगाएका छन् । कांग्रेस नेता सत्यदेव सिंहले गाउँपालिकाको केन्द्र सार्न खोजेको भन्दै स्थानीयले विरोध प्रदर्शन गरेको जानकारी दिए । ‘बहुमतको खेलमा लागेर गाउँपालिकाका अध्यक्ष महतोले आफ्नै गाउँमा केन्द्र सार्न खोजेपछि स्थानीयले विरोध जनाएका छन्,’ उनले भने, ‘यो षड्यन्त्रको हामी विरोध गर्छौं ।’ अध्यक्ष महतोले कार्यालयमा गाउँसभा बोलाउनुको साटो बबरगञ्जस्थित आफ्नै घरमा गाउँ सभा बोलाएर षडयन्त्र गरेको स्थानीयको आरोप छ ।

यता गाउँपालिकाका अध्यक्ष महतोले कार्यालय सार्ने निर्णय नै नभएको बताए । उनले शनिबार गाउँपालिकाको विशेष परिषद्बाट निर्णय भएमा मात्र केन्द्र सार्न सकिने जानकारी दिए । महतोले कार्यालय अपायक पर्ने ठाउँ भएकाले केन्द्र सार्न पहिला देखि नै दबाब आइरहेको जनाए । ‘कार्यालय सरिसकेको छैन, भोलि विशेष गाउँपरिषद् बोलाएको छु, परिषद्बाट पास भए मात्र प्रदेश सरकार र संघीय सरकार समक्ष सिफारिस गरिने छ,’ महतोले भने सिफारिस सदर भए मात्र कार्यालय सर्ने छ । उनले प्रस्तावित केन्द्र सबैको पायक पर्ने जानकारी दिए । अध्यक्ष महतोका अनुसार ३९ सदस्यीय गाउँसभामा बहुमत सदस्य केन्द्र सार्नुपर्ने पक्षमा रहेको दाबी गरे ।

प्रकाशित : फाल्गुन २१, २०७७ १८:१६
प्रतिक्रिया
पठाउनुहोस्

सोती घटनाका पीडितलाई न्याय माग्दै माइतीघरमा प्रदर्शन

रीना मोक्तान, तस्बिर : सन्जोग मानन्धर

काठमाडौँ — रुकुम पश्चिमको नरसंहारका साथै देशभरिका जातीय विभेदका विरुद्धविरुद्ध काठमाडौंको माइतीघर शुक्रबार विरोध सभा भएको छ । गत जेठ १० मा नवराजसहित गणेश बुढा, सन्दीप विक, लोकेन्द्र सुनार र टीकाराम सुनारको बर्बर हत्याविरुद्ध दलित अधिकारकर्मीहरुले विरोधसभा गरेका हुन् ।

घटना घटेको झन्डै एक वर्ष बित्न लाग्दा पनि न्याय नपाएको भन्दै दलित अधिकारकर्मीले सभामा आवाज उठाए । सर्वोच्च अदालतमा हुने पेसीमा दबाब दिन उनीहरुले सडकबाट आवाज उठाएका थिए । तर विरोधकै क्रममा पेसी मिति सारिएको खबर प्राप्त भयो ।

राष्ट्रिय दलित आयोगका निवर्तमान कार्यबहाक अध्यक्ष गोविन्द सुनारले न्यायलयले नवराजको पक्षमा न्याय दिनुपर्ने बताए । 'जसले नरसंहारविरुद्ध हत्या गर्‍यो तिनीहरुलाई आजिवन कारबाही हुनुपर्छ । हामी सिंगो दलितहरु हिजोसम्म साधन थियौं । अब साधन होइन हामी शक्तिका रुपमा परिवर्तन भइसकेका छौं । अब हामी चुप लागेर तपाईंहरुको चाकडी गर्न बसेका छैनौं,' उनले भने,'हाम्रा छोरी बहिनीहरु बलात्कृत हुनुपर्ने, हाम्रा छोराहरु यसरी मारिनु पर्ने, यो घटना नदोहोरियोस् । यो देशमा मानव अधिकार छ भने नागरिकले स्वतन्त्रता पाउनुपर्छ, न्यायलयले नवराजको पक्षमा न्याय दिनेछ ।'

दलित मुक्ति जागरण अभियानका राजेश विद्रोहले दलितहरु अझै अन्यायमा रहेको बताए । 'आज हामीले सुन्यौं नवराजको पेसी झार्‍यो । फेरि पनि झारिनेछ । यदि नवराजकै ठाउँमा उनीहरुका सन्तान भइदिएका भए के पटक-पटक पेसी झार्थ्यो त ?, 'प्रश्न गर्दै विद्रोहले भने,'७० वर्षको समयअवधिमा दलित समुदाय अहिलेसम्म पनि किन छुवाछुत, जातिय हिंसाबाट मुक्त छैन ।'

कोरोना महामारीको समयमा नवराज विकलगायत मधेसमा दलितमाथि निर्ममतापूर्वक हत्या र हिंसा घटेको बताउँदै विद्रोहले भने,'कहीँ राजु सदाहरु उपचारबिना मरे । सम्भु सदाहरु प्रहरीको हिरासतमा मारिए । हामीलाई त कानुनको कठघरामा पनि मृतकसरह जीवन छ । न त हामी समाजको विभेदबाट बञ्चित छौं न यो देशको कानुनको अन्याय र अत्याचारबाट बञ्चित छौं ।

अभियान्ता रिता परियारले सर्वोच्चले नवराजकै पक्षमा फैसला सुनाउनेमा आफूहरु आशावादी रहेको कुरा सुनाइन् । 'जाजरकोटमा एकैचोटी ६ जना दलित भाइहरु मारिए । त्यसविरुद्ध एक वर्षदेखि हामी बोलिरहेका छौं । सर्वोच्चले यो मुद्दामा हाम्रै पक्षमा फैसला गर्छ भन्ने कुरामा पूर्ण विश्वास लिएका छौ,' उनले भनिन् ।

विज्ञान र प्रविधिले आकाश चुमिरहेको अवस्थामा दलित अझै आफू मानव अस्तित्वको लागि लड्नुपर्ने अवस्था दुखद रहेको पनि उनले बताइन् ।

अभियान्ता खगेन्द्र सुनारले जातिय हत्या हिंसा विभेदकोविरुद्धमा दलितहरु सडकमा आउने तयारीमा रहेको सुनाए । 'नवराजहरुलाई न्याय दिँदैन भने । हामी लड्न तयार छौं । हाम्रा दिदीबहिनीलाई बलात्कार गर्ने, बाबुहरुको श्रम शोषण गर्ने । मेरो बाबुमाथिको बर्बरातापूर्णको अन्याय रोकिँदैन भने हामी सहिद बन्न तयार छौं । यही सुनाउन हामी काठमाडौं आएका हौं,'उनले भने,' 'हामी मध्य वैशाखमा काठमाडौंमा एक लाख दलित आएर घेर्दैछौं । त्यो दिन दसाैं हजार दमाईहरुले बाजा हान्ने छन् । हजारौं कामीहरुले नारा घन्काउनेछन् । लाखौं दलितहरुले बजाएको बाजाले यहाँका सामन्तीका महलहरुको जग हल्लिनेछ ।'

विरोधसभामा वाग्मति प्रदेशसभा सदस्य कल्पना नेपाली, दलित मुक्ती महासंघका रणबहादुर रम्तेल, जातिय समता समाजका भक्त विक, जात व्यवस्था उन्मुलन मोर्चाका महावीर विश्वकर्मा, दलित उत्थान विकास समिति प्रदेश नं दुईका सन्त मरिक संयुक्त दलित अधिकार मञ्चका पवन, संघिय लोकत्रान्तिक राष्ट्रिय मञ्चका शर्मिला, दलित आयोगका निवर्तमान कार्यवाहक अध्यक्ष लोकेन्द्र सुनार, दलित अधिकारकर्मी सरु सुनार, राजु सुनारलगायत उपस्थित थिए ।

प्रकाशित : फाल्गुन २१, २०७७ १८:०६
पूरा पढ्नुहोस्
प्रतिक्रिया
पठाउनुहोस्
×