पुनर्निर्माण हुँदै नारायणी रंगशाला- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

पुनर्निर्माण हुँदै नारायणी रंगशाला

शंकर आचार्य

पर्सा — जर्जर बनेको वीरगन्जस्थित नारायणी रंगशालाको पुनर्निर्माण सुरु गरिएको छ । रंगशालाको दक्षिणपूर्वी प्यारापिट भत्काएर नयाँ निर्माण गरिँदै छ । मध्यमाञ्चल क्षेत्रीय खेलकुद विकास समिति वीरगन्जका प्रमुख मोहम्मद जियाउल इस्लामका अनुसार हाल ९ लेनको करिब ८० मिटर लामो प्यारापिट निर्माण गर्न लागिएको हो ।

‘राष्ट्रिय खेलकुद परिषद्को लगानीमा यसवर्ष प्यारापिट निर्माण गर्न लागिएको हो,’ उनले भने, ‘प्यारापिट निर्माणको काम निरन्तर चल्ने आश्वासन हामीले पाएका छौं ।’

नयाँ रंगशालाको संरचना निर्माण गर्न कुल २ अर्ब ६४ करोड रुपैयाँ लागतको डीपीआर तयार गरिएकोमा पहिलो चरणमा आव २०७४/०७५ मा ७५ लाख र २०७५/०७६ मा ५० लाख रुपैयाँ राष्ट्रिय खेलकुद परिषद्ले निकासा गरेकोमा त्यसबाट कम्पाउन्ड वाल निर्माणको काम सकिएको छ । आव २०७६/०७७ मा राखेपले कभर्डहल निर्माणका लागि २ करोड र रंगशाला/प्यारापिट निर्माणका लागि ५ करोड निकासा गरी टेन्डर आह्वान गरी ठेक्कासमेत लागिसकेको थियो ।

तर कोभिड–१९ महामारीका कारण ठेकेदारले काम गर्न नसकेपछि गत वर्ष उक्त रकम फ्रिज भएको इस्लामले बताए । ‘यसपालि परिषद्ले सोही रकम निकासा गरी रंगशालाको प्यारापिट निर्माणको काम गरिरहेको छ,’ उनले भने, ‘हाल ३ करोड ७२ लाख रुपैयाँमा ठेक्का लागेर यो निर्माण काम भइरहेको छ ।’ रोशन/सागर निर्माण कम्पनीले ज्वाइन्ट भेञ्चरमा ठेक्का पाएको हो ।

ठूलो परियोजना रहेकाले हालको रकम रंगशाला निर्माणलाई अत्यन्त कम रहे पनि जर्जर बनेको रंगशालाले नयाँ जीवन पाउन लागेकाले आफूहरू उत्साही रहेको इस्लाम बताउँछन् । उनले भने, ‘कामले निरन्तरता पाउनुपर्छ र रंगशाला निर्माणका लागि कनिका छरेजस्तो रकम नभई एकमुष्ट रकम लगानी गरिए मात्र यो परियोजना सफल हुन्छ, नत्र एकातिर प्यारापिट बन्ने र अर्कोतिर भत्किने क्रम सुरु हुन्छ ।’

२ अर्ब ६४ करोडमा नयाँ रंगशालाको डीपीआरअन्तर्गत क्रिकेट मैदान, ट्र्याक एन्ड फिल्डसहित फुटबल मैदान, कर्भडहल, कम्पाउन्ड वाल निर्माण हुनेछ । हाल भत्काइएको दक्षिणपूर्वी कुनाको प्यारापिटको पूर्वतर्फको गेट नजिक दुई महिनाअघि ठूलो भाग भासिएर झरिसकेको छ । दक्षिणतर्फ पनि प्यारापिटमा ठूलो भ्वाङ परेको छ । हाल नभत्काइएको रंगशालाको पश्चिम, दक्षिण, उत्तरतर्फ पनि प्यारापिट कयौं ठाउँमा भत्केको छ ।

रंगशालाको मैदान पनि मर्मतसम्भार नहँॅदा प्रयोग गर्न लायक छैन । प्यारापिटका ठाउँठाउँमा झारपात उम्रिएको छ । झन्डै ४ दशकअघि निर्मित यो रंगशालाको नियमित मर्मतसम्भार नगरिँदा जर्जर बन्न पुगेको हो । लागूऔषध दुर्व्यसनीले ठाउँठाउँमा प्यारापिट फुटाएर रड झिकेकाले रंगशाला नै कमजोर भएको छ ।


रंगशालाको इतिहास

तत्कालीन अञ्चलाधीश लक्ष्यबहादुर गुरुङको सक्रियतामा करिब चार दशकअघि यो रंगशाला निर्माण गरिएको हो । रंगशाला निर्माणका लागि गुरुङ, तत्कालीन नगर प्रमुख तथा हालका विघटित संघीय संसदका सांसद विमल श्रीवास्तव, समाजसेवी हरिप्रसाद गिरी, पशुपतिविक्रम शाहसहितको टोलीले ठूलो मिहिनेत गरेको थियो । तीनैमध्ये एक पशुपतिविक्रम शाह उतिबेला प्रतिकट्ठा ४ हजार रुपैयाँका दरले रंगशालासँगै अस्पताल, छात्रावास, कभर्डहललाई समेत ३० बिघा जग्गा खरिद गरेको बताउँछन् ।

त्यतिबेला खरिद गरिएको ३० बिघा जग्गामध्ये धेरै जग्गा अतिक्रमणमा परेको छ । ‘रंगशाला निर्माण भएपछि त्यसमा दोस्रो राष्ट्रिय खेलकुद, पञ्चायत रजत जयन्ती कार्यक्रमहरूसमेत आयोजना भए, वीरगन्जवासीले गर्व गर्न लायक धरोहरमध्ये एक यो रंगशाला उतिबेला राजधानीको दशरथ रंगशालापछिकै ठूलो र भव्य रंगशाला मानिएको थियो,’ उनले भने, ‘तर न यसको संरक्षण गरियो, न त नियमित मर्मतसम्भार नै गरियो, त्यसको परिणाम चार दशक पनि रंगशाला टिक्न सकेन ।’

प्रकाशित : फाल्गुन ११, २०७७ ०९:०५
प्रतिक्रिया
पठाउनुहोस्

‘हाम्रो सत्तामा ओली र देउवाले नख्खु जेलमा आराम गर्नेछन्’

कान्तिपुर संवाददाता

काठमाडौँ — विवेकशील साझा पार्टीका अध्यक्ष रवीन्द्र मिश्रले प्रधानमन्त्री केपी शर्मा ओली, नेकपा अध्यक्ष पुष्पकमल दाहाल र कांग्रेस सभापति शेरबहादुर देउवालाई नख्खु जेलमा कोच्ने चेतावनी दिएका छन् ।

सोमबार काठमाडौंको शान्ति वाटिकामा प्रतिनिधिसभा भंग गर्ने प्रधानमन्त्री ओलीको असंवैधानिक कदमविरुद्ध आयोजित विरोधसभालाई सम्बोधन गर्दै उनले आफ्नो पार्टी सरकारमा पुग्नेबित्तिकै ओली र देउवालाई अख्तियार र सर्वोच्च अदालतमा लगेर उपचार गर्ने बताए ।

‘बालुवाटारबाट बालकोट जाने नेतालाई हामी सबभन्दा पहिला अख्तियार र सर्वोच्चमा उपचार गर्छौं, त्यसपछि आराम गर्न नख्खु जेलको चौरमा पु‍र्‍याउँछौं,’ उनले भने, ‘जेलको चौरमा जिन्दगीभर उहाँहरूले आराम गरेर बिताउनुहुनेछ ।’ अध्यक्ष मिश्रले अगाडि भने, ‘ढिलो-चाँडो हामी यो देशको नेतृत्वमा पुग्छौँ, पुग्छौँ। त्यसपछि हामी 'राष्ट्रघाती रोग' लागेकाहरूलाई अख्तियार र सर्वोच्चमा उपचार गर्छौँ र बाँकी जीवन नख्खु कारागारमा आराम गर्न पठाउँछौँ। त्यहाँ बालकोट, बूढानीलकण्ठ र खुमलटारका नेताहरू पनि हुनेछन्।’

आफ्नो पार्टी देशभक्तिको धरातलमा उभिएकाले संख्यामा सानो भए पनि एजेन्डामा अग्रणी रहेको उनको भनाइ थियो । दलीय भागबन्डाका कारण सर्वोच्चमा पार्टीका कार्यकर्ता पुग्ने गरेको भन्दै उनले न्यायालयमाथि नै कालो पोतिएको बताए ।

राज्यका हरेक निकाय पार्टीका भागबन्डामै गाँजिएकाले देशले दुःख पाएको बताउँदै उनले समतामूलक समृद्धिका लागि नागरिकले मन र मत परिवर्तन गर्नुपर्नेमा जोड दिए ।

प्रकाशित : फाल्गुन ११, २०७७ ०८:३८
पूरा पढ्नुहोस्
प्रतिक्रिया
पठाउनुहोस्
×