वन्यजन्तु निगरानी गर्न जंगलमा क्यामेरा
रौतहट — वन्यजन्तुको संरक्षण र निगरानीका लागि भन्दै डिभिजन वनले जिल्लाका राष्ट्रिय वन क्षेत्रहरुमा क्यामेरा जडान गरेको छ । यसले वन्यजन्तुको गतिविधिका साथै चोरी शिकारीको निगरानीमा समेत मद्दत पुग्ने वन कार्यालयले जनाएको छ ।
वन्यजन्तु अपराध नियन्त्रण इकाई समितिका संयोजक एवं डिभिजन वन प्रमुख विनोद सिंहले पछिल्लो समय बाघ, भालु, चितुवा, सालक जस्ता वन्यजन्तु जिल्लामा देखिन थालेपछि क्यामेरा ट्रायाप राखिएको बताए । राष्ट्रिय वनभित्र वन्यजन्तुको गतिविधि पत्ता लगाउन क्यामेरा जडान गरेको र क्यामेरामा वन्यजन्तुहरु कैद भएको जानकारी दिए ।
विभिन्न क्षेत्रमा १७ जोडी क्यामेरा जडान गरिएको छ । यसका लागि एक महिनादेखि वनका प्राविधिकहरु जंगलभित्र खटेका छन् ।
पर्याप्त घोल, झाडी र सिमसारका कारण यहाँका जंगलहरुमा वन्यजन्तुको उपस्थिती बढेको कार्यालयले जनाएको छ । यहाँका जंगलमा चितवन राष्ट्रिय निकुञ्जबाट गैंडा, हात्ती, बाघ पनि आउने गरेका छन् । दुईवर्ष अघि चितवन निकुञ्जबाट बासस्थानको खोजीमा दुई वटा एकसिंगे गैंडा रौतहटको जंगल आएको थियो । यहाँस्थित चोचो वन सेक्टर अन्तर्गतको आँबुखोला नजिक घोलमा रमाउदै गैंडा बसेको थियो । दुई मध्ये एकलाई सिकारीले गैंडाटारको जंगलभित्र गोली हानी घाइते बनाएको थियो । उपचारका क्रममा उक्त गैंडा केही समयपछि मरेको थियो ।
प्रकाशित : फाल्गुन २, २०७७ १३:४३