धनुषामा बालिका बलात्कार आरोपमा २ पक्राउ- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

धनुषामा बालिका बलात्कार आरोपमा २ पक्राउ

सन्तोष सिंह

जनकपुरधाम — धनुषामा बालिका बलात्कारको आरोपमा प्रहरीले २ जनालाई पक्राउ गरेको छ । १३ वर्षीया बालिकालाई पटक-पटक बलात्कार गरी गर्भवती बनाएको आरोपमा शम्भु भनिने ओमनारायण यादवलाई पक्राउ गरिएको जिल्ला प्रहरी कार्यालय धनुषाले जनाएको छ ।

बालिका बलात्कार गर्न यादवलाई सहयोग गर्ने मुस्कान खातुनलाई समेत प्रहरीले पक्राउ गरेको छ । प्रहरीका अनुसार मुस्कान खातुनले बालिकालाई आफ्नै कोठामा बोलाएर विभिन्न प्रलोभन र डर देखाएर यादवबाट बलात्कार गर्न लगाएका थिए । खातुन लक्ष्मीनियाँमा कोठा भाडामा लिएर बस्दै आएकी थिइन् ।

मुस्कानले यादव समेतलाई कोठामा बोलाई पीडित बालिकासँग यौन सम्बन्ध राख्न लगाएको जिल्ला प्रहरी कार्यालय धनुषाका प्रहरी उपरीक्षक प्रकाश रानाभाटले बताए । बालिका गर्भवती बनेको घटना परिवारले थाह पाएपछि प्रहरीमा उजुरी गरेका छन् । प्रहरीमा जाहेरी परेपछि जिल्ला अदालतबाट पक्राउ अनुमति लिएर फरार रहेका खातुन र यादवलाई बिहीबार राति लक्ष्मिनियाँ गाउँपालिका –४ बाट पक्राउ गरिएको छ । पक्राउ परेका दुबै जना स्थानीय हुन् ।

गर्भवती बालिकाको प्रादेशिक अस्प्ताल जनकपुरमा नियमित जाँच भइरहेको छ । बालिकाको स्वास्थ्य अवस्थालाई मध्यनजर गर्दै ओरक नेपालको जनकपुरस्थित सेफ हाउसमा राखिएको प्रहरीले जनाएको छ । बालिका ७ महिनाको गर्भवती रहेकोले उनको जन्मिने बच्चाको स्वास्थ्य अवस्थाबारे अस्पतालबाट विस्तृत जानकारी नआएको प्रहरीले बताएको छ । पक्राउ परेका दुबै जनामाथि मानव बेचबिखन तथा जबरजस्ती करणी मुद्दा दर्ता गरी थप अनुसन्धान भइरहेको जिल्ला प्रहरी कार्यालय धनुषाले जनाएको छ ।

प्रकाशित : माघ ३०, २०७७ १७:५४
प्रतिक्रिया
पठाउनुहोस्

पुरुषतर्फ गण्डकी र आर्मी, महिलातर्फ पुलिस र एपीएफ फाइनलमा

दीपक परियार

पोखरा — पोखरामा जारी टाइगर कप आमन्त्रित राष्ट्रिय क्लब भलिबल च्याम्पियनसिपमा पुरुषतर्फ गण्डकी र आर्मी, महिलातर्फ पुलिस र एपीएफ फाइनलमा भिड्ने भएका छन् । 

पोखरा रंगशालामा शुक्रबार पुरुषतर्फ गण्डकीले एपीएफमाथि ३–० को सानदार जित निकाल्दै फाइनलमा स्थान सुरक्षित गरेको हो । पहिलो सेट २५–२१ ले आफ्नो पक्षमा पारेको गण्डकीले दोस्रो सेटमा भने २९–२७ ले अग्रता लियो । तेस्रो सेटमा आफूलाई सुधार्दै गण्डकीले २१–१५ मै एपीएफलाई पाखा लगायो । आर्मीले अर्को विभागीय टिम पुलिसलाई ३–० कै सेटमा हरायो । आर्मीले २६–२४, २५–२२ र २५–१४ को सेटमा पुलिसलाई पराजित गरेर फाइनल पुगेको हो ।

महिलातर्फ भने न्यु डायमन्डले एपीएफसँग शुक्रबार अप्रत्याशित हार व्यहोर्‍यो । बिहीबारसम्म लिगको दोस्रो स्थानमा रहेको न्यु डायमन्डले एपीएफसँग एक सेट समेत जित्न नसक्दा फाइनल पुग्नबाट बञ्चित हुनुपर्‍यो । एपीएफले ३–० को सोझो सेटमा न्यु डायमन्डलाई हराएर फाइनल खेल्ने अवसर पायो । पहिलो सेटमा न्यु डायमन्डलाई २५–२१ ले हराएको एपीएफले दोस्रो सेटमा पनि २५–२१ ले अग्रता लियो । तेस्रो सेट २५–२३ ले आफ्नो पक्षमा पारेर एपीएफले फाइनलमा पुलिससँग भेट पक्का गर्‍यो ।

शनिबार फाइनल हुने प्रतियोगिताको विजेता महिला तथा पुरुषले समान एक लाख ५० हजार रुपैयाँ, उपविजेताले ७५ हजार रुपैयाँ र तृतीयले ३५ हजार रुपैयाँ पुरस्कार प्राप्त गर्ने आयोजक टाइगर ग्रुपका अध्यक्ष नारायण शर्माले बताए । सर्वोत्कृष्ट महिला तथा पुरुष खेलाडीले २०/२० हजार रुपैयाँ प्राप्त गर्नेछन् । विधागत पुरस्कार ५/५ हजार रुपैयाँ पाउनेछन् । टाइगर ग्रुपको आयोजनामा मंगलबारदेखि सुरु भएको प्रतियोगिता कोरोना महामारी पछि देशमै पहिलोपल्ट भएको राष्ट्रियस्तरको भलिबल प्रतियोगिता हो ।

प्रकाशित : माघ ३०, २०७७ १७:४२
पूरा पढ्नुहोस्
प्रतिक्रिया
पठाउनुहोस्
×