बाराका सीमा नाका शनिबारदेखि मात्रै खुल्ने

दुवै नाकामा अहिलेपनि पहिले जस्तै तारबार लगाई राखिएको नाकाका सशस्त्र प्रहरीले जनाएको छ । भारतसित जोडिएका यी दुवै नाकामा चहलपहल छैन ।

नाका खोल्न आधिकारिक रूपमा परिपत्र नआइसकेकोले खुल्न नसकेको सिम्रौनगढ सशस्त्र प्रहरीका बीओपी इन्चार्ज प्रहरी निरीक्षक विष्णु श्रेष्ठले बताए । नाका भएका सिम्रौनगढ र कलैया नगरपालिकाका प्रमुख प्रशासकीय अधिकृतहरूलाई शुक्रबार बैठक डाकेर नाका खुलाउन हेल्थ डेस्क स्थापनालगायतका बन्दोबस्त मिलाउन निर्देशन दिइएको प्रमुख जिल्ला अधिकारी दिपकराज नेपालले बताए ।

नाका खुलेपछि यी दुवै छोटी भन्सारमा कर्मचारी राख्न भन्सारका प्रमुखसित समन्वय भइरहेको उनको भनाइ छ । सबै बन्दोबस्त गरेर शनिबारदेखि नाका खोल्ने उनले बताए ।