पुल बन्द, मुनिबाट आउजाउ
धनुषा — धनुषाको धनौजीस्थित भडरियाबाट भारत प्रवेश गर्ने बेलौती नदीको पुल ११ महिनादेखि बन्द छ । व्यवहारमा भने सीमा खुला नै छ । पुलमुनि र आसपासबाट नदी तरेर आवतजावत भने रोकिएको छैन ।
सुरक्षाकर्मीले सर्वसाधारणलाई आवतजावतमा कडाइ गरे पनि तस्करी भने नियन्त्रण गर्न सकेका छैनन् । दुई देशका सुरक्षा निकायले व्यापारीसँग आर्थिक लेनदेन गरी सीमा बन्द भएका बेला तस्करीको संरक्षण गरेको स्थानीयको आरोप छ ।
दैनिक उपभोग्य बस्तु, कपडालगायतका सामान भारतीय बजार हरिणेबाट चोर बाटो हुँदै नेपालतर्फ आउने गरेको छ । साँझ र बिहान साइकलमा व्यापारीको सामान तस्करी गर्नेहरू धनुषाका विभिन्न बजारसम्म पुग्ने गरेका छन् ।
प्रदेश २ का ८ वटै जिल्ला भारतीय सीमासँग जोडिएका छन् । नाका खुलाउन धनुषासहित प्रदेश २ का जिल्ला प्रशासन कार्यालयहरूमा ज्ञापनपत्र बुझाउँदै स्थानीयले सीमामै धर्नासमेत दिएका थिए । सीमा बन्द हुँदा दैनिक उपभोग्य सामानको मृल्य बढ्नुका साथै औषधि उपचारमा पनि समस्या भएको नेपाल–भारत खुला सीमा संवाद समूहका संयोजक राजीव झाले बताए ।
सीमा बन्दकै कारण छोरी, चेली माइती र ससुराली आवतजावत गर्दा अपमानित भएको र वारिपारि आफन्तको जन्ती र मलामी जान पनि समस्या भइरहेको उनको भनाइ छ । सीमा बन्दले दैनिक जनजीवनसँगै जनकपुरको पर्यटन क्षेत्र प्रभावित भएको होटल व्यवसायी अभिषेक झुनझुनवालाले बताए ।
