‘सीमा नाका चाँडै खुल्छ’- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

‘सीमा नाका चाँडै खुल्छ’

लक्ष्मी साह

बारा — उपप्रधानमन्त्री ईश्वर पोखरेलले कोभिड–१९ले लामो समयदेखि बन्द रहेको नेपाल–भारत सीमा नाका चाँडै खोलिने बताएका छन् । बाराको कलैयामा सोमबार आयोजित नेकपा ओली समूहको सभालाई सम्बोधन गर्दै उनले यस्तो बताएका हुन् ।

‘सीमा नाका बन्दले मधेसमा विवाह, गाडी आउजाउ, किनमेललगायतको समस्या र चिन्ता छ, यसलाई म यहाँबाट जाने बित्तिकै प्रधानमन्त्रीलाई कुरा गरेर सीमा नाका खुलाउँछु,’ उनले भने, ‘सीसीएमसीको प्रमुखको हैसियतले बैठक बसेर नाका खोल्ने निर्णय गर्छु ।’

सीमा नाका खेलाउन सोमबारै गृह सचिवसित आफूले कुरा गरेको उनले बताए । सीमा खोलिँदा सचेतना भने कायम राख्न आग्रह गरे । ‘कोभिडले कुनै कर्मचारी र समुदाय नछोड्ने भएकाले सीमा नाका खुलेपनि सचेतना अपनाई राख्नुपर्छ,’ उनले भने ।

बारा जिल्लाका सिम्रौनगढ र मटिअर्वा नाकासमेत खोलिने उनले आश्वासन दिए । सम्बोधनको क्रममा मन्त्री पोखरेलले नेकपा अध्यक्ष र प्रधानमन्त्री केपी शर्मा ओलीलाई कसैले अध्यक्ष र प्रधानमन्त्रीबाट हटाउन नसकिने बताए ।

प्रकाशित : पुस २७, २०७७ १७:०६
प्रतिक्रिया
पठाउनुहोस्

ओली पक्षद्वारा मकवानपुरको पार्टी कार्यालयमा तालाबन्दी

सुवास विडारी

मकवानपुर — नेपाल कम्युनिष्ट पार्टी (नेकपा) मकवानपुरको कार्यालयमा ओली पक्षले तालाबन्दी गरेको छ । सोमबार ओली पक्षबाट केहीदिन अघि मात्रै जिल्ला अध्यक्ष घोषित भएका एकालाल श्रेष्ठ र जिल्ला सहइञ्चार्ज रामेश्वर रानाको उपस्थितिमा कार्यालयमा तालाबन्दी गरिएको हो । यसअघि दुवै पक्षले पार्टी कार्यालय कुरेर बस्ने गरेको थियो ।

पार्टी कार्यालय दुरुपयोग गरेर विभिन्न कार्यक्रम आयोजना हुन थालेको भन्दै ओली पक्षले तालाबन्दी गरेको हो । विभिन्न भातृ संगठनका नेताहरुको उपस्थितिमा पार्टी कार्यालयमा कोणसभा आयोजना गरेर तालाबन्दी गरिएको थियो ।

ओली पक्षिय नेताहरुले दाहाल–नेपाल समूहले अनावश्यक कार्यक्रम आयोजना गरेर पार्टी कार्यालयबाटै गुटगत गतिविधि बढाएको आरोप लगाएको छ । ‘हामीले विभिन्न समयमा पार्टी कार्यालयमा कुनै पनि किसिमको गुटगत गतिविधि नगर्न चेतावनी दिएका थियौं । तर, गुटगत भेला नरोकिएपछि तालाबन्दी गरेका हौं,’ नेकपा मकवानपुरका युवा नेता सन्तोष चौलागाईंले भने । ओली पक्षले यसअघि जिल्ला अध्यक्ष मुनु सिग्देल र सचिव प्रेमबहादुर पुलामीलाई कारबाही गरेर पार्टी पदमुक्त गरिसकेको छ ।

नेकपा मकवानपुरमा इञ्चार्ज बिरोध खतिवडा, सहइञ्चार्ज कुमारी मोक्तान, जिल्ला अध्यक्ष मुनु सिग्देल, सचिव प्रेमबहादुर पुलामीलगायत नेकपा दाहाल–नेपाल पक्षमा रहेका छन् । अहिले नेकपा पार्टी कार्यालयको ढोकामा दुईवटा ताल्चा झुण्डिएका छन् ।

प्रकाशित : पुस २७, २०७७ १६:५१
पूरा पढ्नुहोस्
प्रतिक्रिया
पठाउनुहोस्
×