फोहोर नउठाउँदा जनकपुर दुर्गन्धित- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

फोहोर नउठाउँदा जनकपुर दुर्गन्धित

सन्तोष सिंह

धनुषा — जनकपुरधाम उपमहानगरपालिकाले फोहोर व्यवस्थापन गर्न नसक्दा नगर क्षेत्र दुर्गन्धित बनेको छ । प्रदेश २ को अस्थायी राजधानी जनकपुरमा जानकी मन्दिर दर्शन गर्न आउने पर्यटक दुर्गन्धका कारण नाक खुम्च्याएर फर्किन बाध्य छन् ।

एक सातादेखि नउठाउँदा जानकी मन्दिर प्रवेश गर्ने ढोका, अन्य मठमन्दिर, पोखरी, तलाव र बजार क्षेत्रमा फोहोर थुप्रिएको हो । बजारको होटल, पसल अगाडीबाट फोहोर उठ्न नसक्दा आवतजावतमा समेत समस्या हुन थालेको छ । जनकपुरधामको प्रमुख चोकहरु, बसपार्क, भैरवचोक, राजदेवी मन्दिर, विश्वकर्मा चोक, विद्यापति चोक, जानकी चोक, रामानन्द चोक, पीडारी चोक, पुलचोकसहितका स्थानमा विहानै फोहोर व्यवस्थापन नहुँदा सहर कुरूप देखिएको हो ।

वर्षौंदेखि सडकमा फालिने फोहोरले नगरवासीको स्वास्थ्य तथा बजार क्षेत्रको सुन्दरतामा असर पारिरहेको छ । उपमहानगरपालिकाको कार्यालयले व्यवस्थापनमा ध्यान नदिएको भन्दै नगरवासीहरूले गुनासो गर्दै आएपनि सुनुवाइ भने अहिलेसम्म पनि भएको छैन ।

स्थानीयले फोहोर फाल्ने ठाउँको व्यवस्था नभएकाले सडक किनारमै फाल्नुपर्ने बाध्यता रहेको बताए । स्मार्ट सिटीको परिकल्पना गरिएको जनकपुर बजारमा दुर्गन्ध बढ्दै गएको भएपनि उपमहानगरपालिकाको ध्यान दिएको छैन ।

फ्याक्ने स्थान नहँदा फोहर संकलन नगरिएको जनकपुरधामका सरसफाइ प्रमुख उपेन्द्र साहले बताए । उपमहानगरले महिनेपिच्छे फोहर थुपार्ने स्थानको समस्या हुँदै आएको जनाएको छ । उपमहानगरले सरसफाइका लागी स्वीपर १ सय जना, ड्राइभर ८ जना, ६ वटा ट्याक्टर, ४ वटा टिपर, २ कन्टेनर र २ लोडर राखेको प्रमुख साहले बताए ।

प्रकाशित : मंसिर २५, २०७७ १७:५५
प्रतिक्रिया
पठाउनुहोस्

हुम्ला टेलिकम कार्यालयमा तालाबन्दी

छपाल लामा

हुम्ला — टेलिफोन, इन्टरनेट र मोबाइल सेवा गुणस्तरीय नभएको भन्दै नागरिक अगुवाले नेपाल टेलिकम, हुम्लामा तालाबन्दी गरेका छन् । टेलिकमका सेवाहरु बेला बेलामा अवरुद्ध हुने गरे पनि मर्मतमा बेवास्ता गरिएपछि बिहीबार तालाबन्दी गरिएको हो ।

जिल्लामा सक्रिय युवा समूह, विभिन्न विद्यार्थी संगठन, महिला सञ्जाल र नागरिक समाजले टेलिकम कार्यालयमा तालाबन्दी गरेका हुन् । टेलिफोन सेवा भरपर्दो नबनाइँदासम्म तालाबन्दी जारी रहने नेविसंघकी उपाध्यक्ष सोनामछिरिङ लामाले बताइन् । ‘टेलिफोन सेवा भरपर्दो नहुँदा अन्य सेवाबाट पनि वञ्चित हुनुपरेको छ,’ उनले भनिन्, ‘महिनौसम्म फोन सेवा अवरुद्ध भएपछि दुर्गम गाउँका बासिन्दाको सदरमुकामसँग सम्पर्कविच्छेद भएको छ ।’ उनका अनुसार झण्डै ६० जनाको समूहले टेलिकममा तालाबन्दी गरेको हो ।

क्षमताभन्दा बढी मोबाइल सीम वितरण गरिएका कारण समस्या भएको टेलिकम प्रमुख शिवप्रसाद भट्टराईले बताए । ‘सम्भव भएसम्म मर्मतलाई पनि निरन्तरता दिएका छौं,’ उनले भने, ‘सेवालाई गुणस्तर बनाउन आवश्यक प्रयास गरिरहेका छौं ।’

प्रकाशित : मंसिर २५, २०७७ १७:५४
पूरा पढ्नुहोस्
प्रतिक्रिया
पठाउनुहोस्
×