सर्लाहीमा १ हजार ८८ किलो पटाका बरामद- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

सर्लाहीमा १ हजार ८८ किलो पटाका बरामद

ओमप्रकाश ठाकुर

सर्लाही — सर्लाही प्रहरीले ट्याक्टरमा राखेर अवैध रूपमा भित्र्याइँदै गरेको १ हजार ८८ किलो पटाका बरामद गरेको छ ।

भारतीय सीमावर्ती बलरा नगरपालिका–८ स्थित सडकबाट उक्त पटाका बरामद गरिएको प्रहरी नायब उपरीक्षक मदन कुँवरले जानकारी दिए । उनका अनुसार बरामद गरिएकामा नागिन, भुइँचम्पा, रकेट, छुरछुरी, राधेचक्रलगायत पटाका छन् ।

इलाका प्रहरी कार्यालय गडहियाबाट गस्तीमा खटिएको टोलीले ज१त २१७६–९ नम्बरको ट्य्राक्टरमा त्रिपालले छोपेर ल्याउँदै गरेको अवस्थामा उक्त पटाका बरामद गरेको हो । प्रहरी देखेपछि चालक भने ट्य्राक्टर छाडेर फरार भएको जिल्ला प्रहरी कार्यालयले जनाएको छ ।

प्रहरी उपरीक्षक सन्तोषसिंह राठौरले घटनाबारे थप अनुसन्धान गरी मुद्दा चलाइने बताए । अदालतको आदेशमा विस्फोटकजन्य सामग्रीको परीक्षण गराई तिनलाई नष्ट गरिने उनको भनाइ छ । ‘ठूलो मात्रामा विस्फोटक पदार्थ बरामद भएको छ, सम्बन्धित व्यक्तिको खोजतलास गरी मुद्दा चलाउँछौं,’ उनले भने, ‘नेपाली नम्बरको ट्य्राक्टर भएकाले यसमा संलग्न उम्किन पाउँदैनन् ।’

प्रकाशित : कार्तिक १८, २०७७ १३:४५
प्रतिक्रिया
पठाउनुहोस्

तिहारलगत्तै देशभरका अदालत पूर्ण रुपमा खुल्ने

कान्तिपुर संवाददाता

काठमाडौँ — तिहार बिदा सकिएलगत्तै देशभरका अदालतबाट सबै कामकारबाही सुुरु हुने भएको छ । कोरोना संक्रमणको जोखिमका कारण केही महिनायता सर्वोच्च अदालतबाट निश्चित मुद्दाको मात्रै सुनुवाइ हुने गरेको थियो ।

सर्वोच्च अदालतले मंगलबार एक सूचना जारी गरी आगामी मंसिर २ गतेदेखि मुद्दाका सबै कामकारबाही नियमित रुपमा सुुरु हुने जनाएको हो । त्यसका लागि सर्वोच्च अदालतले केही मापदण्ड पनि तोकेको छ ।

सर्वोच्चका अनुसार, मुद्दाको सुनुवाइका लागि पक्ष/विपक्षीको तर्फबाट एक/एक कानुन व्यवसायी र उनीहरुका एक/एक कानुन व्यवसायी मात्रै सहभागी हुन पाउने छन् । तीभन्दा बढी भएमा बहस नोट पेस गर्ने व्यवस्था मिलाउन भनिएको छ ।

सर्वोच्चले इजलासमा उपस्थित हुने कानुन व्यवसायीले अनिवार्य रुपमा मास्क लगाउनुपर्ने र त्यो हटाउन नहुने नियम बनाएको छ । इजलास अधिकृतले समेत त्यसको पालना गर्नुपर्नेछ । सर्वोच्चले सम्भव भएसम्म ‘प्लास्टिकको भाइजर’ समेत लगाउन भनेको छ ।

मुद्दाको बहसका क्रममा आवाज कम हुने भएमा पोडियममा माइकको पनि व्यवस्था गर्ने भएको छ । अनि सार्वजनिक सरोकारको विषयमा हुने बहसमा नेपाल बार एसोसिएसनको भवनबाट श्रव्य दृश्य माध्यमबाट बहसको व्यवस्था गरिने भएको छ ।

कानुन व्यवसायीहरु पालो आएपछि मात्रै इजलासमा पस्न पाउने भएका छन् । अनि मुद्दाका क्रममा न्याय प्रशासन सम्बन्धी काम अब अदालतको झ्यालबाट हुने भएकाले छ । सर्वोच्चले बहस नोट र मुद्दा स्थगितको निवेदन दिन इमेलको व्यवस्था गरेको छ ।

प्रकाशित : कार्तिक १८, २०७७ १३:३४
पूरा पढ्नुहोस्
प्रतिक्रिया
पठाउनुहोस्
×