महिलाको शव फेला : हत्या आरोपमा १६ दिनपछि तीन जना पक्राउ- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

महिलाको शव फेला : हत्या आरोपमा १६ दिनपछि तीन जना पक्राउ

अवधेशकुमार झा

राजविराज — तिरहुत–२ मयनाकडेरीकी महिलाको शव फेला परेको १६ दिनपछि प्रहरीले हत्या आरोपमा तीन जनालाई पक्राउ गरेको छ ।  ५० वर्षीया  दायमनदेवी यादवको हत्या आरोपमा स्थानीय अजयकुमार यादव, राधे भनिने ओमप्रकाश यादव र कञ्चनरूप–११ का बमबहादुर साह पक्राउ परेका हुन् ।

गत असोज ११ मा बस्तीबाट अलि पर रहेको आफ्नै घरमा दायमनदेवीको शव भेटिएको थियो । पति बाहिर रहेका छोराबुहारी भेट्न गएपछि त्यस दिन घरमा उनी एक्लै थिइन् । देउरानीसँग ओमप्रकाशको गोप्य सम्बन्ध रहेको दायमनदेवीले थाहा पाएपछि उनको हत्या गरिएको अनुसन्धानमा खुलेको प्रदेश प्रहरीका प्रवक्ता एसपी कृष्ण प्रसाईंले बताए ।

असोज १० गते राति हत्या गरिएकी उनको शव घरबाहिर बलेँसीमा भेटिएको थियो । तीनै आरोपितले घटनामा संलग्नता स्विकारिसकेको एसपी प्रसाईंले जानकारी दिए । उनका अनुसार बमबहादुरले डोरीले घाँटी कसेर दायमनदेवीको हत्या गरेको र अन्य दुईले घरबाहिर निगरानी गरेको बयान दिएका छन् ।

पक्राउ परेमध्येका अजयले २० वर्षदेखि दायमनदेवीका परिवारको दुई बिघा जग्गा जोतभोग गर्दै आए पनि आम्दानी दिने गरेका थिएनन् । ओमप्रकाशको योजनामा अजयले यही कारणले साथ दिएको खुलेको प्रहरीले जनाएको छ । बमबहादुर यसअघि पनि हत्यामा जेल सजाय काटिसकेका व्यक्ति हुन् । शिक्षक रामनारायण साहको हत्या अभियोगमा पक्राउ परेका उनी आठ वर्ष जेल सजाय भुक्तान गरी दुई वर्षअघि छुटेको खुलेको छ ।

प्रकाशित : आश्विन २७, २०७७ ११:२१
प्रतिक्रिया
पठाउनुहोस्

आईएमईले ल्यायो ‘भरोसा कोष’

कान्तिपुर संवाददाता

काठमाडौँ — कोभिड–१९ संक्रमणबाट विदेशमा मृत्यु भएकाका आफन्तलाई सहयोग गर्ने उद्देश्यका साथ आईएमई ग्रुपले ‘भरोसा कोष’ स्थापना गरेको छ ।

कोषमा २०७६ पुस १६ देखि २०७७ असोज ३० सम्म कोभिड–१९ का कारण विदेशमा मृत्यु भएका नेपाली श्रमिकका आफन्तले आवश्यक विवरणसहित काठमाडौं पानीपोखरीस्थित आईएमई ग्रुपको केन्द्रीय कार्यालयका साथै सातै प्रदेशमा अवस्थित प्रादेशिक कार्यालयमा कात्तिक मसान्तसम्म आवेदन दिन सक्छन् ।

आवेदनमाथि छलफल गरी आर्थिक सहायता उपलब्ध गराइने आईएमईले जनाएको छ ।

प्रकाशित : आश्विन २७, २०७७ ११:२०
पूरा पढ्नुहोस्
प्रतिक्रिया
पठाउनुहोस्
×