उखुबारीमा किशोरीको शव फेला- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

उखुबारीमा किशोरीको शव फेला

कान्तिपुर संवाददाता

रौतहट — वृन्दावन नगरपालिका–४ मा शुक्रबार साँझ १३ वर्षीया सन्जाकुमारी साहको शव शंकास्पद अवस्थामा फेला परेको छ । उनको बलात्कारपछि हत्या भएको आशंका गरिए पनि पुष्टि हुन सकेको छैन । गढीमाई नगरपालिका–१ समनपुर घर भएकी उनी वृन्दावन–४ पलटुवास्थित मामा बैनाथी साहको घरमा बस्दै आएकी थिइन् ।

स्थानीय होसनारायण यादवको उखुबारीमा शुक्रबार बिहान ९ बजे घाँस काट्न गएकी उनी अबेरसम्म नआएपछि खोजी गरिएको थियो । गाउँका रामएकवाल यादवका अनुसार सन्जाको शरीरमा एउटा पनि कपडा थिएन । ‘उनको बलात्कारपछि हत्या गरिएको हुन सक्छ,’ उनले भने, ‘घाँटीमा पनि चोट देखिएकाले घटना शंकास्पद छ । यसको यथार्थ अनुसन्धान हुनुपर्छ ।’ किशोरीका बुबा सीताराम साह कानुले पनि छोरीको हत्या भएको बताएका छन् ।

जिल्ला प्रहरीका डीएसपी भरत श्रेष्ठले किशोरीको शंकास्पद मृत्यु भएको बताए । इलाका प्रहरी गरुडाबाट समेत डीएसपी रवि रावलको टोली घटनास्थल पुगेको छ । किशोरीको शव उखुबारीबाट उठाइएको छैन । राति भएकाले प्रहरीले शनिबार बिहानबाट थप अनुसन्धानमा जुट्ने जनाएको छ ।

प्रकाशित : आश्विन १६, २०७७ २०:५०
प्रतिक्रिया
पठाउनुहोस्

बाजुरामा चार छोराछोरीसहित आमा बेपत्ता

अर्जुन शाह

बाजुरा — बाजुराको हिमाली गाउँपालिका ५ स्थित कवाडीमा शुक्रबार चार छोराछोरीसहित आमा बेपत्ता भएकी छिन् । रुगीन गाउँमा घर भई कवाडीमा बस्दै आएका स्थानीय धर्म नेपालीकी श्रीमती ३० वर्षीया सत्ता नेपाली र उनकी ५ वर्षीया छोरी आरती, ४ वर्षकी सन्तोषी, २ वर्षका छोरा सम्मान र एक वर्षीया छोरी किस्मती बेपत्ता भएको जिल्ला प्रहरी कार्यालयले जनाएको छ । 


आमाले छोराछोरीसहित कवाडी नदीमा हाम फालेर आत्महत्या गरेको हुनसक्ने प्रहरीले प्रारम्भिक अनुमान गरेको छ । ‘एउटा बच्चाको चप्पल र लुगा कवाडी नदीको किनारमा भेटिएको खबर छ,’ डिएसपी मनजीत महराले भने, ‘नेपाली सेना, प्रहरी र स्थानीयले नदी र वरपर संयुक्त रुपमा खोजी कार्य गरिरहेको भए पनि भेटिएका छैनन् ।’

कवाडी बजार कवाडी नदी र कर्णाली नदीको संगमस्थल नजिकै पर्दछ । प्रहरीले उनका श्रीमान् धर्मलाई नियन्त्रणमा लिएको छ । प्रहरीकाअनुसार शुक्रबार बिहान सत्ता नेपाली गाउँमा खलो माग्न गएका थिए । उनी गाउँबाट फर्किंदासम्म घरमा श्रीमान्‌ले खाना नपकाएकाले श्रीमान् श्रीमतीबीच खटपट भएको थियो ।

‘छोरा बुहारीको खटपटपछि बुहारी बच्चाहरुलाई लिएर नदीतिर लागेको देखेको सासुले बताएकी छिन्’ डिएसपी महराले बताए । दलित समुदायका विपन्न परिवारहरुले खेती पाकेपछि घरघरबाट अन्न माग्ने चलनलाई खलो प्रथा भनिन्छ । बाजुराका सबै गाउँतिर खलो माग्ने परम्परा कायमै छ ।


प्रकाशित : आश्विन १६, २०७७ २०:३८
पूरा पढ्नुहोस्
प्रतिक्रिया
पठाउनुहोस्
×